ताल्लाया बाहाना

खतुं मौसम ताल्लाया खः । तर स्वनिगःया मय्जुपिंसं पुना वइगु वसः खनीबलय् म्हय् चःति मखु भुइचःति वः । मय्जुपिनि वसतं भाजुपिनि म्ह थुरथुर खाकाबी । ताल्लां नं चिकुज्वरो वयेकेफुगु मय्जुपिनि शक्ति झीगु स्वनिगःया विशेषता धाःसां ज्यू ।

शहरय् गुलि गुलि तांन्वःया तापक्रम बढे जुयावनी मय्जुपिनि वसः उलि उलि हे कम जुयावइ । पाइन्टं कट्टु, कट्टुं हाफ कट्टु, हाफ कट्टुं नं पार जुयाः आः माइक्रो मिनिस्कर्टं बजाः कयाच्वंगु दु । थ्व क्वय्या वसः जुल । च्वय्या खँ ल्हायेगु खःसा च्वय्या हालत नं थ्व स्वयां खास बांलाः मजू । ल्यूनेया पूरा पाता हे थौंकन्हय्या 'लोकतन्त्रको भित्तो' थें सार्वजनिक जुयाच्वंगु दइ । व यचुगु न्हाय्कं थेंज्याःगु 'भित्तो'य् मिजंतय्सं फक्व क्वथीक स्वयाः थःगु ख्वाः लुइकेगु कुतः यानाच्वनी ।

मय्जुपिनि थज्याःगु वसः खनीबलय् झीत ताइ तांन्वःया धाथेंगु मज्जा काईपिं ला वास्तवय् मय्जुपिं हे जक खः । तांन्वः उमिगु लागिं फेशनया न्हून्हूगु आयाम पेश यायेगु छगू अवसर जुयाबी । उकिं ताल्ला वल कि मय्जुपिं हथाय् चायेधुंकी थःगु न्हूगु वसः ब्वयेत । यद्यपि उगु इलय् मय्जुपिंसं ब्वइगु वसतय् खास वसः दइमखु सिबाय् छबाला कापः बाहेक ।

अले ताल्ला वल कि भाजुपिं नं हथाय् चायेधुंकी मय्जुपिनि वसः स्वयेत । यद्यपि उमिगु मिखा मय्जुपिनि वसतय् वनाच्वंगु धाःसा खइमखु । न मय्जुपिंसं वसः पुनाः थःगु वसः ब्वः वइ न भाजुपिंसं वसः स्वये धकाः वसः स्वः वइ । वसः छगू बाहाना जक खः । स्वयेगु व क्यनेगु ला अलग्ग हे दु । झीगु ताल्ला बाहानाया छगू रोमांचकारी मौसम जुयाच्वन ।

More Stories Like this