विरोध जूसां बहुपदीय प्रणाली
आ: माओवादीं जनसंविधान च्वइगु
येँ (सन्ध्या टाइम्स)/ कार्यकर्ताया विरोध व धर्नाया वावजूद नं एनेकपा (माओवादीं) अन्ततः बहुपदीय प्रणालीइ हे वनेगु निर्णय याःगु दु। थन जुयाच्वंगु पार्टीया केन्द्रीय बैठकं पार्टीयात बहुपदीय प्रणालीइ यंकेगु निर्णय पारित यासें आः उकियात कार्यान्वयन यायेगु तयारी समेत शुरु याःगु दु।
थ्व न्हूगु प्रणाली कथं नं पार्टीया अध्यक्ष धाःसा वर्तमान अध्यक्ष प्रचण्ड हे जुइगु जूगु दु। वय्कःया क्वसं वय्कःया हे राजनीतिक गुरु मोहन वैद्य (किरण) यात तःगु दु। वैद्ययात वरिष्ठ उपाध्यक्ष पद बिउगु खः। वयां लिपा डा. बाबुराम भट्टराईयात न्हापांम्ह उपाध्यक्ष व नारायणकाजी श्रेष्ठ (प्रकाश) यात निम्हम्ह उपाध्यक्ष पद बीगु सहमति जूगु दु।
उकथं हे महासचिव पदय् रामबहादुर थापा (बादल) यात हयेगु निर्णय जूगु दुसा सचिव पदय् सीपी गजुरेल व पोष्टबहादुर बागतीयात नियुक्त यायेगु निर्णय नं जूगु दु। कोषाध्यक्ष पदय् धाःसा सहमति कायम जुइ मफुत। उकिं बिस्कं आर्थिक समिति हे गठन यानाः थ्व ज्या याइगु अनुमान जुयाच्वंगु दु। वर्तमान आर्थिक समितिया प्रमुख अमिक शेरचना खःसा आः गठन जुइगु समितिइ वय्कः हे लाइ वा मेम्ह वइ धइगु खँ धाःसा सी मदुनि ।
पार्टीयात बहुपदीय प्रणालीइ यंके मजिउ धकाः म्हीग सभासद् सहित छथ्वः कार्यकर्तां पार्टीया बैठकस्थल घेरे याःगु खःसां म्हिगः धाःसा अध्यक्ष प्रचण्डं अथे घेरे याः वःपिं कार्यकर्तातय् न्ह्यःने हे आः पार्टी बहुपदीय प्रणालीइ वनीगु जुल धकाः घोषणा यानादीगु खः। लिसें वय्कलं थ्व प्रणालीइ च्वनाः आः शान्तिपूर्ण ढंगं जनसंविधान च्वयेगु अभियान न्ह्याकेगु जानकारी नं अन बियादीगु खः। थ्व ज्याय् गनं नं पंगः वल धाःसा उकिया प्रतिकार यायेगु घोषणा नं वय्कलं यानादिल ।
अध्यक्षपाखें आः बहुपदीय प्रणाली हे थःपिनि न्हूगु पार्टी संरचना जुइ धयादीबलय् उकिया विरोध यानाच्वंपिं कार्यकर्तातय्सं नं छुं धाये मफुगु खः। सूत्रं धाः कथं बहुपदीय प्रणालीइ वनेधुंकल कि उकिया विरोध यानाच्वंगु पुचःया छुं नेतातय्त नं दुजः कथं दुकायेगु आश्वासन बिउगुलिं विरोध यानाच्वंपिं सुम्क च्वंगु खः ।
लुमंकेबहः जू, छुं ई न्ह्यः तिनि नेकपा (एमाले) नं महासचिवीय प्रणालीयात त्वःताः बहुपदीय प्रणालीइ दुहां वंगु खः ।
