मुनाच्वंगु फोहोरद्वँपाखें वयेफुगु खतरा

सिसडोलया स्थानीय जनतां फोहोर पना बिउगु कारणं येँदेय् हानं छक्वः बांमलाक दुर्गन्धित जूगु दु। थज्याःगु दुर्गन्ध नतुनाः म्वायेगु यमितय् लागिं न्हापा नियति खःसां आः बानी जुइधुंकल। तर थुपालय् जाजरकोटय् हैजां कयाः सलंसः मनूत सीधुंकूगु घटनां यानाः धाःसा येँय् मुनाच्वंगु थ्व फोहोरपाखें नं अज्याःगु हे छुं महामारी ब्वलनीगु खः लाकि धइगु तःधंगु चिउताः पिकया बिउगु दु गुगु अस्वाभाविक मखु ।

अथे धकाः अज्याःगु महामारी पिहां वइ मखु धकाः धायेगु छुं आधार नं मदु। आः नकतिनि हे राजधानीया थीथी अस्पतालतय्सं राजधानीइ फोहोरया कारणं विरामीतय् चाप न्हापा स्वयां अप्वःगु जानकारी बिउगु दु। थौंकन्हय् थनया अस्पतालय् फोहोरपाखें संक्रमण जुइगु ल्वचं ग्रस्त जुयाः क्यं वइपिं विरामीत न्हापा स्वयां अप्वःगु खँ वयाच्वंगु दु। थ्व बांलाःगु संकेत मखु। स्वास्थ्य सम्बन्धी गुगुं नं निकायं आः तक थ्व फोहोरद्वँपाखें गज्याःगु लिच्वः लाकी व उकिं छु खतरा पिकाइ धकाः आः तक अध्ययन याःगु खइ मखुनि। उकिं थनया थीथी अस्पतालय् फोहोरपाखें जुइगु ल्वय्या विरामीत अप्वयाच्वन धकाः गुगु खँ पिहां वयाच्वंगु खः थुकिं कन्हय् बिचाः याना सिबें तःधंगु समस्या पिमकाइ धकाः धायेफुगु अवस्था मदु। थ्व संकेतयात सरकारं गम्भीर रुपं कायेमाः। अले थुकियात पनेगु लागिं गुलि फु उलि याकनं माःगु पलाः ल्ह्वनेमाः। यदि फोहोरया व्यवस्थापन यायेगु ज्या तुरुन्त याये मफइगु खःसा बर्खाया थ्व मौसमय् उकिं जुइफइगु महामारीयात पनेगु उपायत जूसां सम्बन्धित निकायपाखें याकनं अवलम्बन यायेमाःगु आवश्यकता दु ।

More Stories Like this