विद्युत प्राधिकरणय् छम्ह सर्वसाधारण

सुशाल नेवाः

स्वनिगलय् तःधंगु व यक्व कर्मचारी दुगु छगू निकाय नेपाल विद्युत प्राधिकरण नं खः। थुगु प्राधिकरणय् छुं नं कथंया ज्या याये माःसा गुलि थाकुक सनेमाः धइगु खँया छगू नमूना थन न्ह्यब्वयेगु कुतः यानाच्वना ।

नेपाल विद्युत प्राधिकरणय् ज्या याइपिं कर्मचारी प्राविधिकंनिसें कयाः मिटर रिडर, न्हू मिटर जडान, लगत खारेज आदि हरेक ज्याया निंतिं नेवाः कर्मचारीतय्त हे नियुक्त यायेमाःगु दवाब बी हथाय् जूगु दु। छाय्कि झीगु स्वनिगलय् व प्रत्येक छेँखापति वनाः मिटर रिडिङ्ग यायेगु व मिटर जडान सम्बन्धी फुक्क ज्या खस कर्मचारीतय्सं अनेक कथं कृत्य यानाः दुःख बीगु व ज्या सुथां लाकेत ध्यबा घुस नकाः ज्या याकेमाःगु भुक्तभोगीतय्सं मचाःगु मखु। प्राधिकरणय् जुइगु छुं छुं अनियमितता बारे थन न्ह्यब्वये।
लछिया छकः छेँखापतिं वनाः मिटर रिडिङ्ग यायेगु ज्याय् हरेक कथं मिटर रिडिङ्ग मिले मजुइक च्वयां जिल ला वा मिटर रिडिङ्ग हे मयासे तालाबन्दी धकाः च्वयां जिल ला नेवाःतय्त दुःख बीगु ज्या याना वयाच्वंगु दु। थज्याःगु ज्यायात याकनं पनेमाःगु दु। लिसें न्हूगु मिटर जडान यायेमाःसा झन अनेक कथं दुःख बीगु ज्या यानाच्वंगु दु खस कर्मचारीतय्सं ।

न्हूगु मिटर जडान व पुलांगु छेँय् पुलांगु मिटर लिकयाः (लगत खारेजं) यानाः न्हूगु मिटर कायेमाःसा झन हे दुःख बीगु यानाच्वंगु दु। न्हूगु मिटर जडान यायेत निवेदन दर्ता जुइधुंकाः दकलय् न्हापां मिटर जडान जुइगु छेँय् वयाः इस्टिमेट यायेमाः धकाः कर्मचारी छ्वया हइ, तर कर्मचारी थः स्वयम् वयाः जाँच याः वइ मखु। वयात मिटर जडान याये माःम्ह सम्बन्धित मनू वनाः ट्याक्सीइ तयाः वा थःगु वाहनय् तयाः ब्वना यंकेमाः। लिसें इस्टिमेट यायेगु नामं वये वनेगु निंतिं धकाः खर्च नजराना कायेगु अले जक माःगु पलाः न्ह्याकी। मखुसा थ्व मिले मजू व मिले मजू धइगु त्वहः तयाः लां लां तक दुःख बीगु ज्या जुयाच्वंगु दु ।

मिटर जडानया निंतिं छकः जक स्थल चेकिङ्ग धकाः ट्रान्समिटर वनाः पावर चेक याये मानि, थौं मखु कंस वा धइगु त्वह तइ। कंस वंसा मनू नाप मलाः। हाकनं ट्रान्समिटरया पावर मगाः थुलि एम्पियरया मिटर जडान जुइ मखु धइगु जानकारी बी। तर च्या खर्च बिउसा एम्पियर नं गाः, भोल्ट नं गाः जुइ।
थुगु पलाः धिसिलायेधुंकाः हाकनं मिटर रिडिङ्ग शाखाय् वंसा टेबुल दइ, मेच दइ, तर मिटर रिडर दइ मखु। छम्ह निम्ह कर्मचारी दःसां थ्व इलाका जिगु मखु फलनाम्ह मनू नाप ला धाइ। फलनाम्ह मनू धकाः माः जुइमाः। फलनाम्ह मनू जि खः धइगु कपालय् च्वयातःगु दइ ला मखु, गथे यानाः मनू म्हसीकेगु ?

उखेंथुखें न्यनाः मनू नाप लाःसा थौं मखु कन्हय् वा धइगु लिसः बी। हाकनं कन्हय् वंसा व हे मनू माले माःगु व घण्टौं पियाः जूसां ज्या क्वचायेकेत च्वने हे माल। उखे थुखे ब्वाँय् जुयाः न्यंसा मिटर रिडिङ्गय् पिहां वन थौं वइ मखु कन्हय् वा धइगु लिसः जक वइ। हाकनं कन्हय् कुन्हु वंसा ज्या जुइ मखुनि। लेजर स्वये मानि धकाः घण्टौं पीकाः याये ला मयाये ला लेजर पुइकाः स्वयेगु ज्या जुइ ।

थौं ला ज्या जुइगु जुल का धइगु आश ब्वलनी तर फलाना नम्बर दु, फलना नम्बर मदु थ्व गय् धइगु न्ह्यसः ग्राहकयात हे न्यनी। बिचरा ग्राहकं छु सिउ... सय् थ्व ब्लाय्क लिस्टय् लाःगु ला मखु ला धकाः ब्लाय्क लिस्ट पुइकेगु ज्या याइ। छिगु छेँय् न्हापा तयातःगु मिटर ब्लाय्क लिस्टय् लाःगु ला मखुला? आदि इत्यादि न्ह्यसः न्यनेगु ज्या जुइ ।

बिचरा ग्राहक पुलांगु छेँ न्यानाः च्वंवंम्ह जूसा वं न्हापाया मिटर लगत खारेज यानाः न्हूगु मिटर जडान याकेत वंम्ह मनुखं छु सिउ? व छेँय् न्हापा मिटर ब्लाय्क लिस्टय् लाःगु खः वा मखु? हाकनं मिटरया ध्यबा मपूसा स्वलाया दुने मत चाना बीगु यानाच्वंगु दु प्राधिकरणं। थुगु ज्या सुथां लाक्क न्ह्यानाच्वंसां बिजुली ध्यबा मपूपिनिगु ब्लाय्क लिस्ट करोडौंया बाँकी गय् जुयाः जुल ?

मत लाइन चायेधुंकाः व छेँय् मेगु मिटर जडान गय् यानाः यात? ब्लाय्क लिस्टय् नां दर्ता जूगु छेँय् मेगु मत गय् यानाः तल? थ्व फुक्कया लिसः प्राधिकरणया उच्च निकाययाके दु लाकि मदु? मखुगु ज्या यानाः मिटर हिलेत वनीपिं सुं दुसा वं थुगु ताःहाकःगु पलाः न्ह्याकाः ज्या सना जुइला? तप्यंक वहे कर्मचारीयात नजराना खल्तीइ तया बीगु जूगुलिं हे यानाः ब्लाय्क लिस्टया पाना तप्पँ जुजुं वनाच्वंगु जकं मखुला? थज्याःपिं कर्मचारीतय्त पाता कसे यायेत पलाः छीपिं सुं दु ला ?

मिटर रिडरया अनेक न्ह्यसःया लिसः छिं बीगु यात धाःसा छिगु ज्या जुइ मखु। छुं मधासे न्यँ जक न्यनाः वं गथे धाल अथे यानाच्वंसा जक छिगु फाइल न्ह्याइ। मखुसा मन दुसां मदुसां करं क्यंकाः नजराना बीगु ज्या यायेमाली। मिटर नम्बर वयेधुंकाः छि हाकनं इस्टिमेट याःम्ह कर्मचारीया थाय् लिथ्यने माल। अले छिगु फाइल कयाः हाकनं कन्हय् कुन्हु तिनि माःगु सामानया लिस्ट तयार यानाः ध्यबा पुलेगु रसिद च्वया बी। ध्यबा फुटकर काउन्टरय् पुलेधुंकाः रसिद नापं फाइलय् तया बीमाल। छितः सामानया माःगु ज्वलंया लिस्ट बियाः जडानया न्हि कुन्हु कर्मचारीयात ब्वना यंकेकुन्हु सःती। लिसें छिगु मिटर लगत खारेज यानाः न्हूगु जडान याये त्यनागु खःसा लगत खारेज जूगु पत्र नापं फाइलय् तयेमाःगु जुल ।

लगत खारेजया पत्र कायेत नं अनेक पलाः छीमाः। छिगु लगत खारेजया फाइल थासय् यंकेधुंकाः मिटर लिकायेत कर्मचारी नापं ब्वना यंकेमाल। अले उम्ह कर्मचारीया अनेक घुसखोरीया चाल न्ह्याइ। मिटर लिकायेत पहिला शील चेक जाँच जुइ। शीलय् नम्बर दु लाकि मदु? शील स्यंकातःगु दु ला? मिटर गुलि एम्पियरया स्वीकृति कयातःगु खः? स्वीकृति नाप मिले जुइक एमसीबी तयातःगु खः कि मखु? न्हापा मिटर स्वीकृति ५ एम्पियरया कयातःगु जूसां उलि हे एम्पियरया एमसीबी वा फ्यूज तयातःगु जुइ माल मखुसा छिगु रिपोर्ट अफिसय् थ्यन कि जरिवाना लिसे चोरीया आरोप लिसे फुक्क कथंया शुल्क मपू तले लगत खारेजया पत्र तयार जुइ मखु। उकिं छि दुम्ह कर्मचारीयात गुलि धाल उलि हे घुस वा नजराना बीमाल। अले लगत खारेजया पत्र च्वया बी ।

मिटर जडान कुन्हु छिं हाकनं न्हू मिटर जडान शाखाय् पिउ वनेमाल। लिसे जडानयात माःगु सामान तयार जूगु खःसा एमसीबी व मेगु छु छु सामान ज्वना वा धाल व सामान यंकाः इन्जिनियर भाजुया ल्हाःचिं तयेके माःगु जुल। जडानया नितिं कर्मचारीत निम्ह निसें प्यम्ह तकं दयेफु नापं न्यागः निसें झिगः तक मिटर जडान यायेमाःगु नं जुइफु। अले गन न्हापा वनाः मिटर जडान याः वनेगु धइगु धेंधेंबल्लाः जुइ।
सुनां ह्ययेकाः वा नजराना बियाः ब्वना यंकेफत वयाथाय् न्हापा जडानया रुट तयार जुइ। मखुसा उगु दिनय् नं छिगु थाय् मिटर जडान जुइ मखु वा जडान यायां लिमलात धइगु लिसः न्यने माली। थथे मिटर जडानया निंतिं निवाः निसें निला तकं ई कायेफु। थ्व फुक्क ढिला सुस्ती व घुसखोरी कर्मचारी अप्वः यानाः खस जातिया कर्मचारीतय्गु ल्हाः दयाच्वंगु दु ।

अथे जूगु हुनिं यानाः नेवाः लागाय् नेवाः स्वायत राज्य जुइमाः धइगु माग याना न्ह्यानाच्वंगु पलाःयात सुथां लाकेत थीथी सरकारी व गैरसरकारी निकायय् ज्या याइपिं कर्मचारीतय्त निं दकलय् न्हापां नेवाः लागाय् हरेक सरकारी गैर सरकारी निकायय् नेवाः हे कर्मचारी नियुक्ति यायेमाःगु दु। थुगु पलाःयात दवाबमुलक पलाः छिनाः जूसां वा नेवाः समाजं छेँखापतिं खस कर्मचारीतय्त मिटर रिडिङ्ग तकं मयाकुसे विरोध यानां जूसां नेवाः स्वायत्त राज्यया माग यानाच्वंपिं थीथी पार्टीया खलः पुचः व भातृ संगठनतय्सं याकनं पलाः न्ह्याके माःगु दु ।

More Stories Like this