बहुपद प्रणालीया विरोध
कार्यकर्तापाखें माओवादी अध्यक्ष घेराउ
येँ (सन्ध्या टाइम्स)/बहुपदीय प्रणालीइ वनेगु धकाः एनेकपा (माओवादी) पाखें नकतिनि याःगु निर्णययात उगु हे पार्टीया आपालं सभासद् व खास यानाः सैन्य विभागपाखे च्वंपिं कार्यकर्तातय्सं विरोध याःगु दु ।
पार्टीया थज्याःगु निर्णय सार्वजनिक जुइवं म्हिगः करिब न्यय्म्ह सभासद्त पार्टीया केन्द्रीय बैठक जुयाच्वंगु थासय् हे वनाः घेराउ बिसें पार्टीयात बहुपदीय प्रणालीइ मयंकुसे आः थें हे कमाण्ड प्रणालीइ यंकेमाः धकाः माग याःगु खः ।
माओवादी जनसेनाया वर्तमान प्रमुख नन्दकिशोर पुन (पासाङ) या नेतृत्वय् वंगु उगु पुचलय् न्यय्म्ह ति सभासद्त नं दुथ्याःगु खः। उकी माओवादी मजदूर फाँटया प्रमुख शालिकराम जम्कटेल, वाईसीएल येँ जिल्लाया प्रमुख सागर नापं आपालं कार्यकर्तातय्सं नं ब्वति काःगु खः ।
बैठकस्थलय् छक्वलं उलिमछि कार्यकर्तात वयाः पार्टी निर्णय प्रति असन्तोष प्वंकेवं बाघौ ति बैठक हे स्थगित यायेमाःगु खः। उपिंलिसे स्वय्म पार्टी अध्यक्ष पुष्पकमल दाहालं हे खँल्हाबल्हा यानादीगु खः। अध्यक्ष उपिंलिसे वार्ताय् व्यस्त जुयाच्वंतले उखे बैठक दिका तयेमाःगु खः ।
उमिसं अध्यक्ष प्रचण्ड समक्ष बहुपदीय प्रणालीइ वनेगु खःसा महाधिवेशन सःताः अनं हे पारित यायेमाःगु माग नं याःगु खः। अज्याःगु छुं हे भेला मसःतुसे केन्द्रीय बैठकं जक बहुपदीय प्रणालीइ वनेगु धकाः निर्णय यात धाःसा उकियात थःपिंसं स्वीकार याये मफइगु ख्याच्वः नं उमिसं बिया थकूगु खः ।
उमिगु मागयात बांलाक न्यँसें अध्यक्ष प्रचण्डं बहुपदीय प्रणालीइ वनेगु थ्व खँ आःयात सहमति जक खः, निर्णय मखुनि धासें थुकियात कयाः तुरुन्त निर्णय मयायेगु बचं बियादीगु खः ।
प्रचण्डयात नापलाः वंगु उगु पुचलय् दुथ्याःम्ह वाईसीएल येँया प्रमुख एवं सभासद् सागरं थौं 'सन्ध्या टाइम्स' लिसे खँ ल्हासें पार्टीं थौंया सन्दर्भय् गुगु कार्यनीति ज्वंगु खः, उकियात बहुपदीय प्रणालीं पूवंके मफइगु जूगुलिं थःपिंसं उकिया विरोध यानागु खँ कनादिल। 'यदि उकी वहे माःगु खःसा न्हापां महाधिवेशन यायेमाः, वयां लिपा अनं हे पारित याकेमाः' वय्कलं धयादिल ।
उगु पुचलं बहुपदीय प्र्रणाली मखुसें आः थें कमाण्ड प्रणालीइ हे वनेमाः धकाः बः बियाच्वंगु दु। कमाण्ड प्रणालीइ हरेक खँ च्वं निर्णय जुयाः क्वय् वनी। बहुपदीय प्रणालीइ क्वय्या समितितय्सं थःत माःगु निर्णय थःपिंसं हे यानाः पार्टी चले याइ ।
