मनसुन वयेवं क्षति नं शुरु

अन्ततः मनसुन शुरु जुल। येँदेय् नापं देय्या थीथी थासय् वंगु छुं न्हि न्ह्यवंनिसें लगातार वा वयेगु शुरु जूगु दुसा थुकिं यानाः देशय् गुकथंया दैवी विपत्ति वइगु खः अज्याःगु विपत्ति नं वयेगु शुरु जुइधुंकूगु दु। म्हिगः तकया दुने थीथी थासय् खुसिबाः व चलखं ल्हानाः झिंन्याम्ह स्वयां अप्वः मनू सीधुंकूगु दुसा उखे पूर्वय् उकुन्हु तिनि खुसिबाः वःगु कोशीइ हानं अज्याःगु हे बाः वइगु जकं खः लाकि धइगु ग्याःचिकु नं ब्वलंगु दु ।

थुगुसी खुसिबाः वयाः येँय् विष्णुमति थेंज्याःगु धः ल्वाकज्याःगु खुसि तकं तःदँ धाथें खुसि हे थें च्वंक बाः वःगु दु। थुकिं खुसि त्यलाः दयेकातःगु विष्णुमतिया लिंक रोड नं स्यंका बिउगु दु। उखे थिमि लागाय् ला थुगुसी छेँय् छेँय् हे लः बाः वयाः गाडी समेत डुबे जुल ।

वा वयेगु म्हो जुल व शहरया दथुं बाः वनीगु खुसिइ लः मंत धकाः धमाधम खुसि त्यलेगु व फुसा न्हंका हे छ्वयेगु कथंया कुतः जुयाच्वंगु दु। सुख्खा यामय् ला अज्याःगु ज्या याउँक याये नं फइ। तर बर्खाय् वा वइगु मौसमय् धाःसा लः अप्वयाः खुसिं हानं पुलांगु हे धार ज्वनेगु कुतः याइबलय् उकथं दयेकातःगु भौतिक संरचना फुक्क स्यंका बी। जनसंख्या अप्वया वःलिसे छेँ अप्वइगु व छेँ अप्वयेवं थःगु सुविधाया लागिं प्राकृतिक सम्पदाय् अतिक्रमण नं अप्वया वइ। तर इलय् ब्यलय् थथे हे खुसिबाः आदि वयाः उमिगु थुकिं हानी नोक्सानी शुरु याना हइगु घटना झीथाय् बरोबर जुइगु याः। आः नं वास्तवय् अथे हे जूगु खः। न्हापांनिसें दुगु प्राकृतिक सम्पदायात नष्ट यायेगु ज्या यात धाःसा कन्हय् हानं छुं कि छुं रुपं उकिया मार ला हे लाइ धइगु खँ दसु खः थ्व ।

More Stories Like this