नेपाःया सेवा यायां

सुनिता मानन्धर

थौं जगत सुन्दर ब्वनेकुथि धायेवं सकसिनं सिउ। थुगुसी थुगु ब्वनेकुथिया एसएलसीया लिच्वलं सकसितं अजूचायेका बिउगु दु। थुगु ब्वनेकुथियात धस्वाकेत आपाःसिनं आपालं ग्वाहालि यानादीगु दु। सकसियां ग्वाहालिं हे थौं थुगु ब्वनेकुथिं थःगु लक्ष्य प्राप्त याये फुगु खः ।

जगत सुन्दर ब्वनेकुथियात थःगु आज्जुइ तक थ्यंकेत निरन्तर कथं ग्वाहालि यानाच्वंगु संस्था खः हिकिभा जापान। जापानया ओसाकास्थित हिराकाता सिटीइ च्वंगु थुगु संस्था छगू भोलेन्टर संस्था खः। थुगु हे संस्थाया छगः धिसिलाःगु थां खः ताकासि खाजिता ।

जापानया ओसाकाया हिराकाता सिटिइ च्वनादीम्ह वय्कः दकलय् न्हापां जगत सुन्दर ब्वनेकुथि नीस्वंगु दँय् (ने.सं. ११११ य्) थः पासा इवासितानापं नेपाः झाःगु खः। उगु दिंयात वय्कलं थुकथं लुमंकादी, उगु इलय् जापानय् ब्याहा यानाः च्वनाच्वंम्ह नेपाली सोभना श्रेष्ठ ब्वनेकुथिया स्यनामि माया मानन्धरया पासा जुयाच्वन। वय्कलं नेपालय् ब्वनेकुथि चायेकूगु व थःपिंसं छुं ग्वाहालि याये फइला धइगु प्रस्ताव जिमित तयादिल उगु इलय् जिमिसं शिक्षाया क्षेत्रय् ग्वाहालि यायेया लागिं संस्था नीस्वनाः बंगलादेशय् ग्वाहालि नं यानाच्वनागु खः। मय्जु सोभना श्रेष्ठया खँ न्यनाः जिपिं दकलय् न्हापा थुगु ब्वनेकुथि पलाः तया ।

उगु इलय् ब्वनेकुथिया थःगु छेँ मदु। माल्चाटारय् च्वंगु ब्वनेकुथिया संस्थापक भाजु राजभाइ जकःमि प्यकू क्वथाय् ब्वनेकुथि चायेका तःगु ई। उगु इलय् ब्वनेकुथिया लागिं माःगु साधन मदु। सुकू लानाः मस्तय्त ब्वंकीगु। मेच, टेबल, चक, डस्टर, बोर्ड तकंया अभाव। स्यनामितय्सं तकं स्वयंसेवक कथं ज्या याना न्ह्याकूगु खनाः वय्कःपिनि नुगः थुकी क्वसाल। अनं लिपा ताकासि खाजिता जापान लिहां झायाः ब्वनेकुथिया विवरण बियादिल। वय्कलं बियादीगु विवरण हे जापानया संस्था ब्वनेकुथियात ग्वाहालि यायेगु खँ नं क्वःजित ।

थ्यंमथ्यं ७० दँ दयेधुंकूम्ह वय्कलं नेपाःया बारे मसिउगु खँ म्हो जक हे जुइ। वय्कः दँय् स्वकः प्यकः हे धया थें नेपाः थ्यनी। थुगुसी नापं वय्कः ५९ क्वः नेपालय् थ्यने धुंकल। वय्कलं अंग्रेजी भाय् बांलाक मसः। खस भाय् व नेवाः भाय् नं मसः अथे जूसां सकसिया नापं वय्कःया खँल्हाबल्हा ब्याः। आं यायेवं अलंकार थू धया थें वय्कलं मचांनिसें बुराबुरी थ्यंकया खँ थुइका कायेफु। वय्कःयात नेवाः म्येँ व खस भाय्या म्येँ नं वः। वय्कलं राजमति म्ये हालाः सकसितं अजूचायेकादी ।

उलि जक मखु नेपाःया गांगांनिसें येँदेय्या गल्ली गल्ली तकं वय्कलं सिउ। वय्कः नेपाः थ्यन कि ब्वनेकुथिया ब्वंकीपिनिगु छेँय् छेँय् वनाः उमिगु गतिविधि न्यनेगु नं वय्कलं यानादी। वय्कःयात ब्वनेकुथिया सकलें ब्वँमिपिनिगु नां व ख्वाः बांलाक लुमं ।

दकलय् न्हापा येँया जगत सुन्दर ब्वनेकुथिइ जक ग्वाहालि यानाच्वंगु हिकिभा जापान संस्थां थौं वयाः थिमिया नील बाराही, धादिङ्गया आदमटार, तोखा, मकवानपुरया सुनाचरीनापं धादिङ्गया कुम्पुर आदि थासय् नं ज्या यानाच्वंगु दु। थुगु दक्व थाय्या ब्वनेकुथिइ ताकासि खाजितायात म्हमसिउपिं शायद सुं दइ मखु ।

न्ह्याथे हे जूसां जगत सुन्दर ब्वनेकुथियात छगू धिसिलाःगु ब्वनेकुथि दयेकेत जापानया हिकिभा उकिसनं ताकासि खाजितां गुगु ज्या यानादिल उकियात सकलें नेपाःमितय्सं लुमंके बहः जू ।

More Stories Like this