दवाव बीत ल्वाभःया खँ

सरकारय् माओवादी नं यंकेगु भारतया कुत:

येँ (सन्ध्या टाइम्स)/रक्षा मन्त्री विद्या भण्डारीया भारत भ्रमणया नापनापं नेपालं भारतीय ल्वाभः नं झिके याइ धकाः थन पिहां वयाच्वंगु चर्चाया मू उद्देश्य मेगु हे दुगु दावी छगू विश्वस्त सूत्रं याःगु दु। उगु विज्ञ सूत्रया कथं भारतं ल्वाभः वइ धकाः जुयाच्वंगु थ्व चर्चाया मू उद्देश्य धइगु माओवादीयात नं वर्तमान सरकारय् समावेश याकेगु खः ।

प्रतिपक्षी जुयाच्वंम्ह माओवादीं पिने च्वनाः सरकारयात समस्या पिकयाच्वनी धकाः माओवादीयात नं सरकारय् छ्वयेगु लागिं थौंकन्हय् भारतं विशेष कुतः यानाच्वंगु दु। माओवादीयात नं सरकारय् दुत छ्वयाः थ्वहे सरकारयात राष्ट्रिय सरकारया रुप बीगु कुतः माओवादीं यानाच्वंगु दु।
तर माधव नेपालया सरकारय् दुहां हुँ धकाः भारतं दवाव बियाच्वंसां माओवादीं धाःसा राष्ट्रपतिया पलाः भिंकेगु ज्या मयाःतले सरकारय् वने मखु धयाच्वंगु दु। उकिं माओवादीयात दवाव बीगु ल्याखं थ्व ल्वाभः झिके यायेगु चर्चा जुयाच्वंगु दावी सूत्रं याःगु दु। छुं जुयाः माओवादी सरकारय् मवनीगु जुल धाःसा थ्व ल्वाभः छ्वया हयेगु जुइ धइगु ख्याच्वः बीगु ल्याखं भारतं थ्व चर्चा याके बिउगु दावी नं सूत्रया दु ।

यदि माओवादी सरकारय् वनेत तयार जुल धाःसा थ्व ल्वाभः वइगु चर्चा नं अथें क्वचाया वनी ।

गन तक माओवादीं प्रधान सेनापति रुक्मांगद कटवालयात मचीकूतले थःपिं सरकारय् वने मखु धकाः अडान कयाच्वंगु खँ दु, उकियात संवोधन यायेगु ल्याखं कटवालया म्याद थपे मयायेगु निर्णय सरकारं यायेधुंकूगु दु। कटवालं नं अवकाश काये स्वयां लछि न्ह्यः कायेमाःगु औपचारिक बिदा थनिंनिसें कायेगु जानकारी राष्ट्रपतियात बीधुंकूगु दु। वय्कलं म्हिगः आः थः धुंकाः वइम्ह न्हूम्ह प्रधानसेनापतियात म्हिगः राष्ट्रपति भवनय् यंकाः 'परिचय' याकेगु ज्या याःगु खः। कटवालं थःगु म्याद हानं थपे याकेगु लागिं उकुन्हु कुतः याःगु खःसां उकिया लागिं भारतपाखें हे नकारात्मक संकेत वयेवं वय्कलं थ्व कुतः त्याग याःगु खँ सूत्रं धाःगु दु ।

थ्व धुंकाः आः राष्ट्रपतिया सवालय् नं माओवादीं धयाच्वंगु छुं खँ पूवंका बीगु कुतः जुयाच्वंगु जानकारी सूत्रं बिउगु दु। थुलि जुल कि माओवादीयात सरकारय् दुहां वयेगु वातावरण तयार जुइगु आशा यानातःगु दु। यदि माओवादी सरकारय् दुहां वइगु संकेत वल धाःसा थ्व ल्वाभः छ्वया हयेगु ज्या नं रोके जुइगु खँ धाःगु दु ।