हानं ल्वाभः झिके यायेगु प्रकरण

रक्षा मन्त्री विद्या भण्डारीया भारत भ्रमणया नापनापं भारतं न्हापा पना तःगु ल्वाभः नं नेपाःयात बीगु जुल धइगु चर्चा शुरु जुइवं उकियात कयाः चिउताः प्वंकेगु ज्या नं अप्वया वःगु दु। खास यानाः ल्वाभःपाखें हे जनयुद्ध यानाः आः स्थगनया अवस्थाय् च्वनाच्वंपिं माओवादी पार्टीया नेतातय्सं थ्व विषययात गम्भीर रुपं कयाच्वंगु खनेदु। थ्वहे खँयात कयाः उमिसं हानं संसद अवरुद्ध याःगु दुसा यदि धाथें ल्वाभः हल धाःसा थःपिंसं सरकारलिसे याना तयागु शान्ति सम्झौता नं भंग याये माली धकाः ख्याच्वः समेत बियाहःगु दु ।

वास्तवय् आः नेपालं भारतयाके ल्वाभः कायेगु विषय माओवादी जक मखु सकलें देशवासीया नं चिउताःया विषय जुइमाः। थौं देशय् युद्ध मदु। युद्धयात फयांफछि तापाक तयाः शान्ति प्रक्रियायात अझ गति बीमाःगु ई खः थ्व। अले न्हापा युद्धया इलय् क्षति जूगु पूर्वाधारत जक मखु,व स्वयां तःधंगु मेगु विकासया पूर्वाधारत निर्माण यायां वनेमाःगु ई नं खः थौं। थ्व ज्या यायेत झीत यक्व दां माः। आः झीके दुगु दां अज्याःथाय् खर्च यायेमाः। तर उखेपाखे पटक्क हे ध्यान मबिसे हानं वहे युद्धकालीन इलय् थें ल्वाभः न्यायेथाय् दां खर्च यायेगु धइगु सरकारया हद दर्जाया मूर्खता जुइ। थुकिं शान्ति प्रक्रियायात लिच्वः लाकीगु जक मखु विकासया ज्यायात नं लिउने लाकेगु ज्या याइ। माओवादीं थुकी चिउताः क्यनीगु ला स्वाभाविक हे जुल। यदि सरकारं ल्वाभः हल धाःसा उकी शंका यानाः माओवादीं नं गोप्य रुपं ल्वाभः मुंकेगु ज्या यायेफु। थुकिं देशय् हानं छक्वः द्वन्द्वया वातावरण ब्वलंकाः मुलुकयात पुनः नर्कय् घ्वायेगु ज्या याना बीफु ।

More Stories Like this