ल्वाभः बारे प्रमया संवोधन
'भारतं ल्वाभ: वइगु खँ हल्ला जक ख:'
येँ (सन्ध्या टाइम्स)/प्रधानमन्त्री माधव नेपालं थौं सदनय् संवोधन यानादीगु ज्याझ्वः दु ।
रक्षामन्त्रीया भारत भ्रमणया झ्वलय् भारतं ल्वाभः हयेगु खँयात कयाः म्हिगः प्रमुख प्रतिपक्षी दल माओवादीं प्रधानमन्त्रीं थुकिया बारे सदनय् जानकारी यायेमाःगु माग यासें सदन अवरुद्ध यायेवं थौं प्रधानमन्त्री नेपालं संवोधन यायेत्यंगु खः ।
प्रमं थौं याइगु संवोधनय् नेपालय् अप्वया वनाच्वंगु बेसाःभाः व पश्चिम नेपालय् न्यनावंगु झाडा बान्तायात कयाः नं जानकारी याकीगु खँ दु ।
थ्वहे झ्वलय् प्रम नेपालं भारतं ल्वाभः हयेगु निराधार खँ खः धयादीगु दु। एमाले संसदीय ज्याकू सिंहदरवारय् च्वंगु बैठकय् वय्कलं उगु खँ धयादीगु खः ।
वर्तमान इलय् सरकारं भारतं गुगुं नं कथंया ल्वाभः हयेगु थःपिनि योजना मदुगु खँ नं वय्कलं कनादीगु दु। तर वय्कःया उगु लिसलं एमालेया सभासद्तय् चित्त बुझे मजूगु खँ धाःगु दु ।
उखे माओवादी अध्यक्ष प्रचण्डं थौं कांग्रेसया सभापति गिरिजाप्रसाद कोइरालायात नापलानादीगु दु। कोइरालायात नापलायेगु झ्वलय् अध्यक्ष प्रचण्डं वर्तमान सरकारं ल्वाभः हयाः शान्ति प्रक्रियायात स्यंकेत्यन धासें उकिया बारे स्पष्ट जुइमाः धयादीगु खः ।
अथे हे अध्यक्ष प्रचण्डं माओवादी सेना समायोजन बारे वंगु छुं न्हि न्ह्यः सभापति कोइरालां प्वंकादीगु बिचाःयात कयाः नं न्यनेकने यानादीगु खः। लिसलय् सभापति कोइरालां भारतं ल्वाभः हयेत्यंगु खँ हल्ला जक खः धयादीगु खः।
वय्कःपिनि दथुइ सेना समायोजन, शान्ति प्रक्रिया व संविधान निर्माण बारे नं सहलह जूगु खः ।
अथे हे वर्तमान राजनीतिक समस्या ज्यंकेगु निंतिं कांग्रेस, एमाले व माओवादीया शीर्ष नेतात दुथ्याकाः प्रधानमन्त्री नेपाललिसे सहलह व्याकेगु बारे नं सहमति जूगु खः।
वय्कःपिनि दथुइ सरकार संचालनया निंतिं उच्च स्तरीय राजनीतिक संयन्त्र दयेकेगु बारे नं सहलह जूगु खँ माओवादी अध्यक्ष प्रचण्डं धयादीगु दु ।
उखे थौं माओवादीं आह्वान याःगु सर्वदलीय बैठकय् थीथी राजनीतिक पार्टीया नेतातय्सं कांग्रेस, एमाले व माओवादी दथुइ सहमति कायम यायेमाःगु सुझाव बिउगु खँ सीदुगु दु। बैठकय् सरकारं राष्ट्रपतिया कार्यालय प्रमुख सचिव नियुक्ति याःगु खँयात कयाः सरकारया आलोचना याःगु खँ सीदुगु दु ।
