सचिव बढुवाय् नं ब्राम्हणवाद

सरकारं नकतिनि २२ म्ह सचिवतय्त याःगु बढुवा विवादय् लाःगु दु। विवाद नं छगू जक पक्षं मखु, तःता हे पक्षं खः। दकलय् न्हापां ला सरकारं सचिव थेंज्याःगु उच्चस्तरीय प्रशासकतय्त नं पार्टी कार्यकर्ता नियुक्त याये थें बढुवा यायेगु ज्या याःगु दु। सरकारय् दुपिं थीथी पार्टीतय्सं फलाना सचिव थः मनू खः धासें खल्ती खल्तीं उमिगु नां लिकयाः मन्त्रिपरिषद् पेश यायेगु ज्या जुल। थुकिं यानाः आः सचिव थेंज्याःगु पदय् वनेगु लागिं नं कर्मचारीतय्सं थःगु दक्षता व क्षमता क्यनेगु सिबें पार्टी कार्यकर्ताया म्हसीका पौ क्यना जुइमाःगु आवश्यकता जूगु दु ।

मेखे सचिव नियुक्त यायेगु ज्याय् वरिष्ठताक्रमयात पटक्क हे ध्यान मबिसे लिपा वःपिंत न्ह्यःने व न्हापा वःपिंत लिउने लाकाः पूर्ण रुपं पक्षपाती भूमिका म्हितूगु दु। थुकिं यानाः कर्मचारीतय् मनोबलयात क्वकयाः चाकडी यायेगु प्रथायात प्रश्रय बीगु खतरा पिहां वःगु दु ।

अले मेगु दकलय् आपत्तिजनक खँ ला छु धायेबलय् २२ म्ह मछि सचिव ल्यलं नं जातीय रुपं पटक्क हे समावेशी खने
मंत। आः नं न्हापाया कालय् थें हे छगू जक जातियापिं मनूतय् बाहुल्यता यक्व खने दत। देशय् राज्य पुनर्संरचना व समावेशीकरणया थपाय्धंगु आन्दोलन जुयाच्वंगु इलय् नं थ्व सचिव नियुक्तिया ज्याय् धाःसा राजनीतिक पार्टीतय्सं थ्व सवालयात मुक्कं हे नकारे याना बिल। थ्व दकलय् विडम्बनापूर्ण ज्या जूगु दु। आः सरकारय् दुपिं राजनीतिक पार्टी व उकिया नेतृत्व अझ नं पुलांगु हे ब्राम्हणवादी मानसिकतां ग्रस्त तिनि धइगु खँ थुकिं प्रस्ट यात। न्हूगु नेपाः दयेकेगु म्हगस इना जुइपिं थज्याःगु चरित्र तसकं विडम्बनापूर्ण जू ।

More Stories Like this