हरिकृष्णयात पियुष पदक

सुनिता मानन्धर

नेवाः जूगुलिं नेपालभाषा सयेका सीका कायेमाः धइगु बिचाः दुम्ह हरिकृष्ण डंगोलयात थुगुसीया पियुष पदक लःल्हात। वय्कलं ब्वनेकुथिनिसें नेपालभाषा विषय ब्वनादीगु खःसां बीए क्वचायेवं ब्वनेज्या त्वःतादिल ।

दकलय् न्हापा एमए ब्वनागु इलय् वय्कलं थुगु पदक त्याके फइ धइगु बिचाः मदुगु खँयात थुकथं उलादी, 'एमएया न्हापांगु दँय् जिमि पासां दकलय् अप्वः ल्याः हयादीगु खः। वय्कःया ल्याः जिगु ल्याः स्वयां ६ नम्बरं जक पाःगु खनेवं जिं नं कुतः याःसा आपाः ल्याः हये फइगु विश्वास याना। अनं लिपा जिं न्हापा स्वयां अप्वः कुतः याना ।'

वय्कलं थुगुसी ८०.१० प्रतिशत ल्याः हयादीगु खः। सदां नेपालभाषाय् नुगः क्वसाःम्ह वय्कःया साहित्यय् विशेष रूची खनेदु। वय्कः नेपालभाषाया छम्ह सक्रिय कार्यकर्ता नं खः। वय्कलं छगू इलय् नेपालभाषाया न्हिपौ 'सन्ध्या टाइम्स'य् छम्ह स्तम्भकार कथं लेख च्वयेगु नं यानादी। वय्कलं स्वतन्त्र कथं राजनीति व भाषिक लेख च्वयादी।
न्हापा थःत रुची दुगु लेख च्वयेगु इलय् थम्हं च्वयागु लेख गय् गथे जुल जुइ धइगु ग्याःचिकु पह दयाच्वनीगु जुयाच्वन। उकिं अझ अप्वः नेपालभाषाया अध्ययन याये फःसा निर्धक्क कथं च्वसा न्ह्याके फइ धकाः नं नेपालभाषाय् एम.ए यानादीगु खः ।

राष्ट्र बैंकया जागिरं शैक्षिक अवकाश कयादी धुंकूम्ह वय्कः थम्हं फत्तले अध्ययन याना वनेगु हे भविष्यया आज्जु जूगु खँ कनादी। वय्कल लोकतान्त्रिक आन्दोलनय् नेपालभाषा बुखँ पौया भूमिकाया विषयय् शोध-पत्र च्वयादीगु खः।
थुगुसी वय्कःयात पियुष पदक कथं झिन्याद्वः दां व दसिपौ लःल्हाःगु खः। थुगु पदक नापं कुमारी प्रकाशन पाखें कुमारी पदक नं लःल्हाःगु खः। लुमंके बहः जू ने.सं १११७ य् भाजु पियुष बहादुर अमात्यं नीस्वनादीगु पियुष पदक नेपालभाषाय् एम.ए यानाः दकलय् अप्वः ल्याः हयादीम्ह भाजु वा मय्जुयात बीगु पदक खः। थुकिया संचालन नेपालभाषा केन्द्रीय विभागं याइ ।

More Stories Like this