सर्वोच्चया फैसला: मेगु जेठ १८

उपराष्ट्रपति परमानन्द झां हिन्दी भासं याःगु शपथग्रहणया सर्वोच्च अदालतं खारेज याना बिउगु दु। सर्वोच्चं म्हीग याःगु फैसलां हिन्दी भासं याःगु शपथया कारणं वय्कःया उपराष्ट्रपति पद हे खारेज जुइ ला मधाः तर मात्र मेगु भासं शपथ काःगु कारणं वय्कःया निर्वाचित पदयात हे हाथ्या बीगु ज्या धाःसा याःगु दु। सर्वोच्चया थ्व फैसला लिपा आः वय्कःया पद वनी वा च्वनी ? वय्कलं हानं खँय् भासं शपथ ग्रहण यानादी वा मदी धइगु विवाद शुरु जूगु दु ।

गन तक देय्या गैस खस भाषाभाषीं थ्व फैसलायात छु दृष्टिकोणं स्वयेगु धइगु खँ दु, थुकियात २०५६ सालया जेठ १८ गते येँ व धनुषाया स्थानीय निकायय् नेपालभाषा व मैथिली भाषा नं छ्यले दइ धकाः निर्वाचित निकायं याःगु निर्णय विरुद्ध सर्वोच्च अदालतं गुगु फैसला न्यंकूगु खः, उकिया हे मेगु रूप कथं कायेमाःगु खनेदु। थ्व देय् अझ नं खस बाहेक मेगु भाय् ल्हाइपिनिगु मखुनि धइगु खँ थ्व फैसलां पुष्टि याना बिउगु दु। यदि खँय् भाय् ल्हाये मसःसा सुं नं मनू थ्व देय्या राष्ट्रपति, उपराष्ट्रपति थेंज्याःगु उच्चपदय् च्वने दइ मखु धइगु खँयात नं थुकिं बांलाक हे उला हे बिउगु दु। संविधानय् नेपाःयात बहुभाषिक मुलुक धयातःसां व्यवहारय् थ्व अझ नं खँय् भाय् ल्हाइपिनिगु हे जक देश खःनि धइगु नं थुकिं क्यना बिल। सर्वोच्चया थ्व फैसला हिन्दीया विरोधय् खःसां देय्या थीथी मातृभाषाया समर्थनय् वयेमाःगु खः। तर अथे मजुसे हिन्दीयात न्ह्यःने तयाः नेपाः दुनेया हे मेमेगु मातृभाषीतय्सं नं थःथःगु भासं शपथ काये दइ मखु धइगु खँ थुकिं क्यना बिल। सर्वोच्चया थ्व फैसला परिवर्तित नेपाःया समावेशी स्वरुपया निंतिं उपयुक्त मजू ।

More Stories Like this