झी फुक्कं छप्पँ जुइमाः

डी. आर. खड्गे

युरोपया फ्रान्स व बेलायतया सामन्ती राजतन्त्रयात जनताया बलं चकनाचुर यानाः जनताया शासन जनतां यायेगु लागिं प्रजातान्त्रिक ब्यवस्था हल। तर क्रान्तिं वःम्ह सरकारं नं जनतायात सन्तोष बी मफुगु जक मखु नेतातय्गु प्रवृत्ति ब्यवहार व शोक (रवाफं) यानाः जनतां नेतातय्त घृणा यायेगु यात। मभिंपिं नेतातय्त जन समुहं भौतिक कारवाही यायेत तक बाध्य जुल। यदि जनतां मभिंपिं नेतातय्त सशक्त रुपं भौतिक कारवाही मयाःगु जूसा युरोप देश आः तक विकास मजूनि जुइ। सामन्ती शासनं दमन उत्पीडन जुयाच्वंपिं देशवासीया हालत क्रान्ति लिपा नं खराब जुयाच्वंगुलिं नेता विरुद्ध विद्रोह याइगु नं स्वाभाविक खः। देशवासीया इच्छा व चाहना खः राज्यं फुक्कं जनतायात समानुपातिक ढंगं सुविधा व अधिकार बीमाः धइगु इच्छा खः। फ्रान्स व बेलायतय् जनक्रान्ति लिपा गांगांया जनता शहरय् वयेगु शुरु जुल। राजधानी थुलि अस्तब्यस्त जुल कि व स्थितियात नियन्त्रण यायेत तसकं थाकुल। खराब स्थितियात नियन्त्रण याये मफुगु धइगु नेतात स्वयम् अराजक पुचःनाप सम्बन्ध तयाच्वंगुलिं खः। युरोपय् अराजक पुचः यक्व सक्रिय जुयाच्वंगुलिं हत्या हिंसा लुटपाट अपहरण नं चरम अवस्थाय् थ्यन। हत्या अपहरण व लुटपाटं यानाः समाज भय व त्रासया वातावरणय् म्वायेत बाध्य जुल। हत्या हिंसा लुटपाटं यानाः देय्या विकासया ज्या ठप्प जुल। बजारया भाः नं अति तच्वः जुयाः जनता कंगाल जुजुं वनाच्वन। देशय् अपराधी गतिविधि व बजार भाः तसकं अप्वयाच्वंगुलिं युरोपया संक्रमणकालय् देशभक्त तानाशाही जन्म जुल। व खः नेपोलियन बोनापार्ट। जब नेपोलियनं फ्रान्सया सत्ता थःगु ल्हातय् काल वं कानूनयात क्वातुकाः अपराधी पुचःयात खतम यानाः समाजय् शान्ति स्थापना यात। नेपोलियनं मेगु बांलाःगु ज्या याना क्यन व खः देशबासीयात शिक्षा व स्वास्थ्य निःशुल्क याना बियाः जनताया मन त्याकल। जनतां नं देशया लागिं ज्या यायेमाः धकाः कडा परिश्रम यानाः फ्रान्स देशयात शक्तिशाली याना क्यन ।

युरोपयात याकनं विकास यायेफुगु कारण खः देशभक्त विवेकी सवल सक्षम नेतां देश सञ्चालन याःगु। झीगु देश विकास मजूगु जक मखु ध्वगिक स्यनाच्वंगु कारण खः विदेशीया दलाल जुयाः देशघाती ज्या यानाच्वंगुलिं। मेमेगु देशय् जनसंघर्षं जनताया बलं सफल यानाः तानाशाही शासक चीका छ्वइ। झीथाय् धाःसा जनताया बलं जनसंघर्ष मयासे विदेशीया ग्वाहालि व समर्थन कयाः संघर्षं सत्ता कायेत सफल जूगुलिं विदेशीया इसाराय् प्याखं हुले मालीगु बाध्यता खः। सफल आन्दोलन-२ पाखें देय् झन बर्बाद जूगु कारण थ्व खः कि देय्या कार्यपालिका, न्यायपालिका व ब्यवस्थापिकाया ज्या नं विदेशी शक्तिं इसारा मबिउतले छुं हे महत्वपूर्ण ज्या जुइ मखु। थ्वहे कारणं यानाः जनता झन झन हे पीडित जुया वनाच्वंगु खः। छखे देशय् अराजक पुचःत सक्रिय जुयाः हत्या हिंसा लुटपाट व अपहरणया घटना अप्वया च्वनसा मेखे बजार भाः अति चर्को ढंगं बढे जुयाच्वंगुलिं जनता म्वाये फइगु स्थिति तकं मदयाच्वंगु दु। थज्याःगु भयावह स्थिति सिर्जना यानाच्वंगु खः नेपाःया राजनीतिक पार्टीया गलत भूमिका ।

थौंकन्हय् नेपाःया सत्ता सञ्चालन यानाच्वंपिं खस ब्रम्हू व भारतीय कूलया नेतातय्सं खः। थ्व निथ्वः जातिया उद्देश्य खः नेपाःया बहुसंख्यक आदिवासी जातियात शोषण दमन व फुट नीति हयाः विस्थापित याना यंकेगु खः। थ्व निथ्वः जाति राज्य सञ्चालन यासांनिसें देय् झन झन स्यना वनाः इपिं धाःसा चांचां तःमि जुजुं वनाच्वंगु दु। स्वनिगःबासीया मिखां खनाच्वंगु दु नेतातय्सं जक पजेरो, प्राडो गाडी सवार यानाच्वंगु मखु नेताया सन्तानतय्सं तक नं गाडी गयाः झीत हीमी चायेकाच्वंगु दु ।

असार २३ गते थिमिया चपाचो त्वालय् ल्वापु जुयाः जीवन मगर, सविन क्षेत्री व बसन्त लामा मंत धकाः पत्रिकाय् खबर वल। थ्व घटना स्थानीयबासी व पिनें वयाच्वंपिं गैर नेवाःया दथुइ ल्वापु जूगु खा पुष्टि जुल। स्थानीयबासीया धापू खः मचात अपहरण यायेगु कुतः याःगुलिं थ्व घटना जुल। गैर नेवाःतय्सं धाःसा थःपिं अपहरण यायेत वयापिं मखु धाल। वास्तवय् अपहरण यायेत वःपिं खः मखु अनुसन्धानया विषय खः। तर उगु पुचः गुण्डातय् पुचः धाःसा अवश्य खत। छाय् धाःसां गुण्डा ग्रुप मखुसा नेवाः बस्ती वयाः उकथं दादागिरी यायेगु कुतः याइ मखु। थ्व घटनाया लिउने तःधंगु षडयन्त्र सुलाच्वंगु दु। षडयन्त्र थ्व खः नेवाःतय्त न्ह्यागु हठकण्डा यानाःसां दबे यायेगु कुतः यानाच्वंगु खः। छाय् धाःसा गैर नेवाःया उद्देश्य झीत शासन यानाः झीत हे खत्तम यायेगु खः। अथे जूगुलिं नेवाःतय्त अझ सातुं वंकाः ख्यायेगु हिसाबं स्थानीयबासी मदन छुजु, रवि बोडे व विशाल स्याझ्यायात मानसिक तनाव बियाः हत्यारा साबित यायेत स्वयाच्वंगु खः। थ्व घटनायात खालि स्थानीयवासीया समस्या खः धकाः बिचाः यात धाःसा तःधंगु पश्चाताप याये मालेफु। थ्व घटनाया लिउने तःधंगु षडयन्त्र सुलाच्वंगु दु धकाः बिचाः यानाः झी फुक्कं छप्पा जुइमाः। अले जक गैर नेवाःतय्सं झीत ख्यायेगु आँट याइ मखु ।

झीगु धापू स्वनिगलं पिनं वःपिं गैर नेवाःत स्वनिगलय् दुकाये हे मखु धायेगु मखु। गैर नेवाःत दुकाये जिउ तर भिंपिं वल धाःसा आपत्ति मदु। थन मभिंपिं धमाधम वयाः सुन्दर शान्त स्वनिगःयात ध्वस्त यानाच्वंगु जक मखु नेवाःतय्त हे विस्थापित यायेत स्वयाच्वंगुुलिं यानाः नेवाःत छप्पा छधी जुयाः अपहरणकारीतय्त नियन्त्रण यायेत स्वयेमाः। अझ थुपिं सिबें नं देश स्यंकाच्वंगु पार्टीया नेताय्त नियन्त्रण याये फःसा जक झी मखु देय्या हे अस्तित्वय् तकं बचे याये फइ ।

More Stories Like this