सम्झौता बारे प्रम हे अलमल
आः उगुंथुगुं ज्याझ्वलय् वने मखुत : प्रम
येँ (सन्ध्या टाइम्स)/माओवादीया कारणं अवरुद्ध जुयाच्वंगु सदन सुचारु यायेगु निंतिं माओवादी व सरकार दथुइ जूगु सहमति कार्यान्वयन यायेत हे थाकुयाच्वंगु खँ प्रधानमन्त्री माधव नेपालं धयादीगु दु ।
व्यवस्थापिका संसदनया राज्य व्यवस्था समितिइ थौं न्ववायेगु झ्वलय् प्रधानमन्त्री नेपालं उगु खँ धयादीगु खः।
सरकार व माओवादी दथुइ लछिया दुने माओवादीं ल्ह्वंगु मागयात संवोधन यायेगु सहमति जूगु खःसां उकियात गुकथं कार्यान्वयन यायेगु धइगु बारे थः अलमलय् लानाच्वंगु खँ वय्कलं कनादीगु खः ।
तर वय्कलं सहमति कार्यान्वयन यायेगु निंतिं गज्याःगु समस्या वयाच्वंगु दु धइगु खँ धाःसा कनामदी। यदि सरकारं लछिया दुने माओवादीया माग पूमवंकल धाःसा उकुन्हु तिनि हःगु सरकारया बजेट पारित याकेगु ज्याय् थःपिंसं अविरोध पिकायेगु जुइ धकाः माओवादीं ख्याच्वः बियातःगु दु।
बैठकय् न्ववायेगु झ्वलय् वय्कलं रक्षा मन्त्रीया भारत भ्रमण लिपा भारतं हतियार हयेगु धकाः वयाच्वंगु खँयात खण्डन यानादिसें माओवादी सेनायात समायोजन यायेगु निंतिं हे थःपिंसं अनमिनया म्याद खुला तनेगु प्रस्ताव यानागु दाबी नं यानादिल ।
सरकारं सेना समायोजन प्रक्रियायात उच्च प्राथमिकताय् तयागु खँ कनादिसें उकिया निंतिं हे अनमिनया म्याद तनेमाःगु खँ नं वय्कलं धयादिल ।
समितिइ न्ववायेगु झ्वलय् वय्कलं संविधान दयेकेगु ज्या सरकारया प्रमुख प्राथमिकताय् लानाच्वंगु दु धासें उकिया निंतिं फुक्कं राजनीतिक पार्टीया दथुइ सहमति कायम यायेगु कुतः सरकारं यानाच्वंगु दाबी नं यानादिल ।
बैठकय् वय्कलं पश्चिम नेपालय् न्यनावंगु झाडाबान्ता नियन्त्रण, थिकेगु बेसाःभाः नियन्त्रण व सुरक्षा व्यवस्थायात क्वातुकेत फुकसिया सहमति कथं ठोस पलाः ल्ह्वनेत नं सरकारं कुतः यानाच्वंगु खँ कनादिल ।
वय्कलं थः व्यक्तिगत भेटघाट, परामर्श व मेमेगु ज्याय् व्यस्त जुइमाःगुलिं सरकारया ज्याय् उलि ध्यान बी मफयाच्वंगु खँ स्वीकार यानादिसें आवंनिसें औपचारिक ज्याय् म्हो जक सहभागी जुइगु बचं नं बियादिल ।
सरकारं आः बजारय् ब्वलनाच्वंगु बेसाः भाः नियन्त्रण यायेगु निंतिं कडा पलाः ल्ह्वनेगु बचं नं वय्कलं समितिया दुजःतय्त बियादिल ।
