भारतीय ल्वाभः वइगु जुल
ल्वाभ ह:सा शान्ति भगं : माओवादी
येँ (सन्ध्या टाइम्स)/रक्षा मन्त्री विद्या भण्डारीया भारत भ्रमणया नापनापं नेपाःयात ल्वाभः बीगु निंतिं भारत सहमत जूगु खँ सीदुगु दु। रक्षा मन्त्रीं ल्वाभः हयेत मिले याना थकूगु व्यवस्था कथं प्रधानमन्त्री माधव नेपालया भारत भ्रमण लिसें तुं नेपालय् न्हापांगु लट ल्वाभः दुहां वइगु खँ सूत्रं धाःगु दु ।
जुजुं 'कू' यानाः शासन थःगु ल्हातय् कायेसातकि भारतं नेपाःयात बिया वयाच्वंगु ल्वाभः बन्द याःगु खः। तर आः नेपाः भारतीय ल्वाभः कायेत हथाय्चाः थें भारत नं नेपाःयात ल्वाभः बीत हथाय् चायाच्वंगु खँ सूत्रं धाःगु दु। श्रीलंकाय् तमिल विद्रोहीतय्त दमन याइ धकाः भारतं श्रीलंकायात ल्वाभः मबिसे तया तःगु खःसा श्रीलंकां चीनपाखें ल्वाभः हयाः तालिमतलिसे युद्ध ल्वाःगु खः। आः छुं जुयाः नेपाःयात ल्वाभः पना तल धाःसा नेपालं नं मेगु देशं ल्वाभः हयेफु धकाः भारत थःगु ल्वाभः बीत हथाय्चाःगु खँ विज्ञ सूत्रं धाःगु दु ।
भारतं नेपाःयात आः इन्सास धाःगु राइफल बीत्यंगु खः। थुकिया छगू लट न्हापा नं वयेधुंकूगु दु। थ्व ल्वाभःया लागिं नेपालं ३० प्रतिशत जक दां पूसां गाः ।
तर थनया विज्ञतय्सं धाःसा भारतं थःगु देशय् दयेकूगु इन्सास धाःगु राइफल नेपालय् परीक्षण याये कथं छ्वया हयाच्वंगु दावी याःगु दु। परीक्षणय् छ्वया हइगु ल्वाभः सितिकं बीमाःथाय् भारतं ३० प्रतिशत ध्यबा कयाः नेपाःयात अःखतं ठगे याःगु द्वपं नं उगु सूत्रं बिउगु दु ।
थुखे नेपालय् धाःसा माओवादीं भारतीय ल्वाभः हल धाःसा शान्ति सम्झौता भंग जुइगु ख्याच्वः बिउगु दु। सरकार व माओवादी दथुइ जूगु सम्झौता कथं निगुलिं सेनां ल्वाभः व सैनिक थपे याये मदु। आः नेपाली सेनां ल्वाभः थपे यात धाःसा उकिं शान्ति सम्झौता भंग जुयाः देशय् हानं द्वन्द्व शुरु जुइफुगु खँ माओवादीं धयाच्वंगु दु ।
माओवादीं धाःसा नेपाली सेना धइगु देय्या राष्ट्रिय सेना जूगुलिं थुकियात हतियारविहिन यानाः तया तये मजिउगु कारणं ल्वाभः महसें मगाःगु तर्क न्ह्यःने हःगु दु ।
थ्वहे झ्वलय् नेपाः व नेपाली सेना बारे जानिफकार भारतीय सेनाया पुलांम्ह जर्नेल अशोक मेहतां भारतीय सरकारं अझ नं नेपाःयात ल्वाभः बीगु औपचारिक निर्णय मयाःनिगु खँ धाःगु दु। नेपाःया रक्षा मन्त्रीं तःगु प्रस्तावयात थःपिंसं बिचाः याये धकाः जक भारतं धाःगु व आःया परिस्थितिइ भारतं ल्वाभः बी थें नं मच्वंगु खँ पूर्व जर्नेल मेहतां कनादीगु दु ।
