छाय् निष्त्रि्कय संविधानसभा?

संविधानसभाय् ज्या मदु। न्यने मात्रं हे नुगः काइँया मिंकीगु खँ खः थ्व। न्हूगु संविधान च्वयेगु लागिं धकाः राज्यं अर्बौं दां खर्च यानाः चुनाव मार्फत निर्वाचित याःगु निकाय खः संविधानसभा। तर थौं उगु संविधानसभाय् छुं ज्या मदु गुकिं यानाः संविधानसभा हे छुं न्हिया लागिं दिकेमाःगु अवस्था वल। यदि छुं ज्या मदइगु खःसा थुकिया ६०१ म्ह सभासद्त छु यायेत? अथें नं न्हूगु संविधान च्वयेगु लागिं बियातःगु ई तसकं म्हो दु। दत्याया दुने संविधान च्वयेगु म्याण्डेट थ्व संविधानसभायात दु। बछि ई ला वने हे धुंकल। छुं ज्या जूगु मदुनि। मनूतय्सं इलय् संविधान च्वये फइ धइगु खँय् शंका याना हयेधुंकूगु दु। थ्व इलय् ला चांन्हि हे ज्या यानाः संविधान च्वये सिधयेके माःथाय् अःखतं ज्या हे मदयेक सुम्क च्वनाच्वनेमाःगु धाथें नं विडम्बनाया खँ खः। छु यानाच्वन संविधान च्वइगु पार्टीया नेतृत्व यानाच्वंपिं नेतात? जनताया हिचःतिइ धँवा दुछ्वयाः सोसे यानातःगु करया दांयात भत्ताय् परिणत यानाः मोजमस्ती यायेत जक ६०१ म्ह सभासदया संविधानसभा दयेकूगु ला पक्कां खइ मखु। जनताया करं भत्ता नसेंलि जनतां बियाछ्वःगु ज्या नं यानाः क्यना बी माल। तर थौंया राजनीतिक पार्टी व सभासद्तय्सं थुकियात वास्ता मयासे संविधान च्वयेगु ज्यायात भ्याः हे महत्व बियाच्वंगु खने मदु। नेतातय्सं क्यनाच्वंगु थ्व पहः स्वयेबलय् थुमि दथुइ संविधान मच्वयेगु मेगु हे कथंया षडयन्त्र यायेगु 'सहमति' जकं दुगु खः लाकि धइगु शंका नं जुया वः। उकिं नेतातय्सं मेगु फुक्क ज्या त्वःताः संविधान च्वयेगु ज्यायात दकलय् महत्व बियाः न्ह्यःने यंके माल। संविधानसभायात ज्या बियाः सक्रिय याये माल ।

More Stories Like this