यँयाः जात्रा व्यवस्थित यायेगुपाखे

कृष्ण

दँय्दसं हे स्वनिगलय् श्रावण महिनाया गथां मुगः चह्रेनिसें दछियंकं थीथी जात्रा जुइ। उकि दकलय् न्हापां ला गथामुगः चह्रे वइ। गथामुगः चह्रे नाप नापं सापारु व वयां छुं ई लिपा वइगु यँयाः पुन्हि वा इन्द्रजात्रायात हे येँया दकलय् तःजिगु जात्रा कथं कयातःगु दु ।

तर थ्व येँयाः थेंज्याःगु तःजिगु जात्राय् हे थीथी कथं विकृति वयाच्वंगु जक मखु कि छुं छपुचः मनूतय्गु बांमलागु कुतःपाखें प्रभावित जुया जात्रा हे गन्जागोल नं जुयाच्वंगु दु। थगुने हे तिनि इन्द्रजात्राया झ्वलय् गणतान्त्रिक सरकारया गुथि संस्थानं बीमाःगु दां मबिउगुलिं यानाः जात्रा तकं बन्द जूवंगु खः। थज्याःगु हे थीथी कथंया असमजस्यतायात चीकाः सद्भाव कायम यानाः नेवाःतय्गु मू जात्रा यँयाः व्यवस्थित यायेगु ताः तयाः थुगुसी न्हापांखुसी स्थानीय स्तरं इन्जिनियर मोहनकृष्ण डंगोलया अध्यक्षताय् इन्द्रजात्रा व्यवस्थापन समिति २०६६ नीस्वंगु दु ।

देशय् लोकतन्त्र बहाली जुइधुंकाः अझ गणतान्त्रिक सरकार वयेधुंकाः झन जक स्वनिगःया थीथी जात्रायात हेबाय् चबाय् यायेगु चलन अप्वया वंगु दु। थिमि नं नवदुर्गा द्यः गण न्याः हे मलाकुसें लित हयेमाःगु स्थिति वःगु खःसा बिस्काः जात्रां गुथि संस्थानं बीगु आयस्ताय् कटौती याःगु व नवदुर्गा गणयात न्हापा बिया वयाच्वंगु थीथी सुविधा व सहुलियत हे क्वपालेगु लगायतया मितव्ययिताया नामय् नेवाः सांस्कृतिक ख्यलय् जुयाच्वंगु प्रहारं नेवाःत सचेत ।

अथे जनजागरण हयेगु ताः तयाः हे थुकथंया समिति व संस्थात नीस्वना नेवाःतय्त शिक्षित व सचेत यायेगु ज्या न्ह्याकाच्वंगु दु। आः इन्द्रजात्रा व्यवस्थापन समितिपाखें नं याकनं हे थीथी क्लव, संस्था व स्थानीय ल्याय्म्हतय्त मुंकाः थीथी कथंया तालिम बीगु व जात्राय् स्वयम सेवक कथं च्वनाः ल्वापू ख्यापु मदयेक जात्रा क्वचायेकेगु कुतः यानाच्वंगु दु ।

न्हापा न्हापाया इन्द्रजात्रा व्यवस्थित मजूगुलिं आः इन्द्रजात्रायात व्यवस्थित यायेगु ताः तयाः ज्यापु महागुथि येँ महानगर समितिया अध्यक्ष नं जुयाच्वनादीम्ह इन्जिनियर मोहनकृष्ण डंगोलया अध्यक्षताय् थुगु समिति नीस्वंगु खः। उगु समितिं आः याकनं हे थीथी कथंया अन्तर्क्रियात्मक ज्याझ्वः नं ग्वसाः ग्वयेगु ताः तयातःगु दु ।

जात्राया इलय् माः कथंया बजेट मदया नं जात्रा हे दीगु जुयाच्वंगु दु। थगुने अथे हे जूगु खः। अथे जुयाः थुगु व्यवस्थापन समितिं गुथि संस्थान व सम्बन्धित निकायया ध्यानाकर्षण यानाः दां बन्दोबस्त यायेगु नं योजना दयेकाच्वंगु दु ।

सांस्कृतिक उत्सवयात महोत्सवय् हिकेगु निंतिं व्यवस्थापन समितिपाखें आः तत्काल छुं याये धुंकूगु मदुनिसां थ्व हे महिनाय् थीथी क्लबया पदाधिकारीत मुंकाः अन्तर्क्रिया यायेगु, उगु अन्तर्क्रियां पिज्वःगु निर्देशनयात पालना यानाः ज्या न्ह्याकेगु व ल्याय्म्हतय्त स्वयम सेवक कथं परिचालन यायेत तालिम तकं बीगु तयारी नं जुयाच्वंगु दु ।

अज्याःगु हे उद्देश्य तया थीथी पक्षयात मिले याना झिम्ह दुजः दुगु इन्द्रजात्रा व्यवस्थापन समिति नीस्वंगु खः। थुगुसीया इन्द्रजात्रा बांलाना वन धाःसा निरन्तर थुगु व्यवस्थापन समितिपाखें थीथी कथंया जात्राया नं व्यवस्थापन याना वनेगु ताः तयातःगु दु। लिपा आपालं दुजः दयेकाः ज्या न्ह्याकेगु ताः तयातःगु व्यवस्थापन समितिं आः याकनं हे थीथी कथंया जात्राय् यायेमाःगु ज्याखँया बारे ध्वाथुइकेगु ज्या याना वयाच्वंगु दु ।

More Stories Like this