नेकांय् राज्यया स्वंगू धारणा
पार्टी महाधिवेशन चैत्रं जक जुइगु
येँ (सन्ध्या टाइम्स)/नेपाली कांग्रेसया थौं सुथय् च्वंगु केन्द्रीय समितिया बैठकय् राज्य संरचना सम्बन्धी स्वंगू फरक प्रतिवेदन न्ह्यब्वःगु खँ सीदुगु दु ।
केन्द्रीय समितिया बैठकय् गोपालमान श्रेष्ठं पार्टीया आधिकारीक प्रतिवेदन न्ह्यब्वःगु खःसा नरहरि आचार्य व गोविन्दराज जोशीं बिस्कं बिस्कं प्रतिवेदन न्ह्यब्वयेवं थौं याये धयातःगु राज्य पुनर्संरचना सम्बन्धी सहलह ज्याझ्वः हे स्थगित जूवंगु खः ।
कांग्रेसं उपसभापति गोपालमान श्रेष्ठया संयोजकत्वय् राज्य पुनर्संरचना समिति गठन यानाः प्रतिवेदन तयार यानाच्वंगु खः ।
थौं सुथय् कांग्रेस ज्याकू सानेपाय् च्वंगु बैठकय् स्वंगू फरक प्रतिवेदन वयेवं स्वंगुलिं प्रतिवेदनयात कयाः थप अध्ययन यायेमाःगु खँ केन्द्रीय दुजःतय्सं धायेवं कांग्रेसया थौंया बैठक आइतवाः तकया निंतिं स्थगित याःगु खः ।
आइतवाः तकया दुने स्वंगुलिं प्रतिवेदनया अध्ययन यानाः उकी दुगु बांलाःगु खँयात छथाय् दुथ्याकेगु खँय् सहमति जूगु खँ सीदुगु दु ।
पार्टीया आधिकारिक दस्तावेज तयार यायेगु ज्याया संयोजक श्रेष्ठ जूसां मेपिं केन्द्रीय दुजःतय्सं नं न्ह्यब्वःगु प्रतिवेदनय् च्वंगु बांलाःगु खँत दुथ्यायेमाः धासें थौंया बैठक स्थगित याःगु खः ।
बैठकय् केन्द्रीय दुजःतय्सं सार्वजनिक मस्यौदाया बारे नं सहलह यायेमाःगु अडान काःगु खः ।
बैठकय् पश्चिम नेपाःया झाडा बान्तां पीडिततय् प्रभावकारी स्वास्थ्य उपचार जुइमाःगु खँय् सरकारया ध्यानाकर्षण यायेगु बारे नं सहलह जूगु खः ।
थौंया बैठकय् पार्टीया झिंनिक्वःगु महाधिवेशनया बारे नं सहलह यायेगु खँ धाःसां उगु विषयय् धाःसा दुहां तकं मवंगु खँ काग्रेस स्रोतं धाःगु दु ।
कांग्रेसं थ्वहे वइगु मंसिरं महाधिवेशन यायेगु धकाः क्वःछिनातःगु खःसां उकिया निंतिं पर्याप्त तयारी मजू धासें माघं महाधिवेशन याये धाःगु खःसा आः चैत्रय् जक महाधिवेशन यायेगु खँ पिहां वयाच्वंगु दु ।
थौंया बैठक न्ह्यः हे नेवि संघया कार्यकर्तातय्सं त्रिचन्द्र क्याम्पसय् युथ फोर्सया कार्यकर्तातय्सं गोलीं कयेकाः घाःपाः याना बिउपिं थः कार्यकर्तातय् उपचार यायेमाःगु व घटनाय् संलग्न जूपिंत कारवाही यायेत दवाव बीमाः धासें कांग्रेस कार्यवाहक सभापति सुशिल कोइरालाया ध्यानाकर्षण याकूगु खः ।
