सूर्यग्रहण व नेपाःया हिन्दू मानसिकता

थुगु शताव्दिया हे दकलय् अन्तिम ताःहाकःगु सूर्यग्रहण म्हिगः क्वचाल। लगातार निघौ तक जुयाच्वंगु व दकलय् सघन ग्रहणया इलय् ला खिउँसे हे च्वनीगु थ्व सूर्यग्रहण विज्ञानया लागिं जक मखु सर्वसाधारण मनूतय् लागिं नं छगू रोचक विषय जूगु दु ।

खतुं सूर्यग्रहण खगोलया छगू नियमित प्रक्रिया बाहेक मेगु छुं मखु। थ्व छगू इलय् ब्यलय् वयाच्वनीगु विज्ञानया रोमाञ्चकारी संयोग जक खः। तर न्हापा न्हापा थुकिया वैज्ञानिक पक्ष बारे मसिउगु कारणं मनूतय्सं थुकियात धार्मिक रुपं स्वयेगु याना हल। गुकिं यानाः सूर्यग्रहणया इलय् व याये मजिउ, थ्व याये मजिउ धइगु अनेक अन्धविश्वासत सिर्जना याना तल। खास यानाः हिन्दू धर्मय् विश्वास याइपिंसं सूर्यग्रहणयात नितान्त छगू धार्मिक कर्मया रुपय् कायेगु याः। सूर्यग्रहण न्ह्यः म्वः ल्हुइगु, सिधयेकाः म्वः ल्हुइगु, ग्रहण जुयाच्वंत्तले अप्सं च्वनेगु आदि हिन्दू संस्कार खः। थज्याःगु संस्कार हनेमाःगु कारणं सरकारं सूर्यग्रहण कुन्हु सार्वजनिक बिदा समेत बीगु ज्या याःगु दु। वास्तवय् सूर्यग्रहण कुन्हु अज्याःगु विदाया आवश्यकता मदु। थ्व नितान्त हिन्दू मानसिकतां बिउगु बिदा खः। थौं नेपाः धर्म निरपेक्ष देय् घोषणा जुइधुंकाः हिन्दूतय् जक माने यायेमाःगु थज्याःगु पर्व कुन्हु सार्वजनिक बिदा बीगु धइगु देय्या प्रशासकत अझ नं हिन्दू मानसिकतां पिहां वये मफुनि धइगु खँया हे लिच्वः मखु ला? यदि ग्रहण कुन्हु सुयां तःधंगु कर्मकाण्ड यायेमाःगु खःसा वं बिदा काये फइगु व्यवस्था सरकारं यायेमाःगु खः। छन्हु बिदां खास हे गनं छुं लिच्वः लाकीगु ला मखु तर उकिया लिउने सुलाच्वंगु मानसिकतां धाःसा बांमलाःगु हे लिच्वः लाकीगु खनेदु ।

More Stories Like this