थौं २२ म्ह सचिव ल्यइगु
भागबन्डा मिले यायेत निम्ह मुख्य सचिव
येँ(सन्ध्या टाइम्स)/मन्त्रिपरिषद प्रशासनिक समितिया थौं च्वनीगु बैठकं सचिवतय् बढुवा सम्बन्धी ज्याया निर्णय यायेत्यंगु दु ।
प्रधानमन्त्री माधव नेपालया अध्यक्षताय् च्वनीगु उगु बैठकय् थीथी मन्त्रालयय् प्वनाच्वंगु २२ म्ह सचिव पदय् बढुवा यानाः न्हूपिं सचिवत हइगु खँ सीदुगु दु। बढुवा समितिं सचिव बढुवा बारे निर्णय याये मफयेवं थौं प्रशासनिक समितिया बैठक च्वनेत्यंगु खः ।
प्रशासनिक समितिया बैठक च्वनेमाःगु कारणं थौं च्वने धाःगु मन्त्रिपरिषद्या बैठक नं स्थगित याःगु दु। आः मन्त्रिपरिषदया बैठक कन्हय् जक च्वनीगु खँ सीदुगु दु।
बढुवा समितिं ६६ म्हेसिया नां सचिव पदय् बढुवाया निंतिं सिफारिस याःगु खःसां २२ म्हेसित जक बढुवा याइगु खँ सीदुगु दु ।
थ्वहे झ्वलय् सीदु कथं मुख्य सचिव भोजराज घिमिरेया म्याद थ्वहे वइगु साउन २२ गते फुइत्यंगु दु। वय्कःया पदावधि फुइत्यंगुलिं वय्कलं आः वइगु आइतवाःनिसें विदा च्वने फइगु खँ सूत्रं धाःगु दु ।
घिमिरेया अवकास लिपा सुयात मुख्य सचिव यायेगु धइगु बारे नं थौं च्वनीगु प्रशासनिक समितिया बैठकं निर्णय याये फइगु खँ धाःगु दु ।
मुख्य सचिवय् जनकराज जोशी, उमेश मैनाली व माधवप्रसाद घिमिरेया नां चर्चाय् वयाच्वंगु दु। थुपिं स्वम्ह मध्यय् जनकराज जोशी वरिष्ठम्ह खः। सरकारं निम्ह मुख्य सचिव तयेफुगु खँ नं धाःगु दु ।
