इहिपा याइपिंत सिरपाःया व्यवस्था

थुगुसीया बजेटय् सरकारं हःगु छगू न्हूगु व लोकप्रिय कार्यक्रम लागू जुइ न्ह्यः हे विवादय् लाःगु दु । थीथी कारणं इहिपा मजुसे याकःचा लानाच्वंपिं याकः मिस्त व दलित धयातःपिं मिस्तय्त इहिपा याइम्हेसित म्हितं छसीकथं न्यय्द्व व छगू लाख तका सिरपाः बीगु घोषणा थुगुसीया बजेटय् यानातःगु खः । तर सरकारं याःगु थ्व घोषणायात स्वय्म याकः मिस्त व दलित मिस्तय्सं हे विरोध याना हःगु कारणं सरकारया थ्व कार्यक्रम लागू यायेत हे समस्या पिहां वइगु सम्भावना खने दयावःगु दु ।

याकः मिस्त व दलित मिस्तय् धापू खः इहिपा ध्यबां याकीगु मखु । ध्यबायालागिं याइगु इहिपा टिकाउ नं जुइ मखु । समाजय् प्रतिष्ठित जुयाः च्वनेगु खःसा इहिपा हे यायेमाः धइगु नं मदु । मुख्य खँला दलित व याकःमिसा जुयाः नं समाजय् प्रतिष्ठापूर्वक च्वनेगु वातावरण निर्माण यायेगु खः । राज्यपाखें थखु पाखे कुत: याःसा बांलाइ । देशय् दलित धाल कि अझ नं थी मजिउ थें व्यवहार याइगु याकः मिसायात अपमानपूर्वक स्वइगु अझ भाःत सीम्ह जूसा ला झन सांस्कृतिक रुपं बहिष्कार हे यायेत स्वइगु समस्या ल्यना हे च्वंगु दनि । इहिपा जुल कि थ्व समस्या दइ मखु धायेगु मेगु कथं थ्व समस्यायात ल्यंका हे तयेगु धाःगु खः ।
उकिं राज्यं थ्व समस्यायात हे गय् यानाः मदयेकेगु खः उखेपाखे ध्यान बीमाःगु खनेदु ।

अथे खःसां बजेटं थ्व ख्यलय् गुगु संवोधन यात उकिया तरिका ठीक मजुल खयेफु तर नियत धाःसा गलत
मखु । सरकारं अज्याःगु समस्या मदयेकेगु लागिं हे थ्व व्यवस्था याःगु खः । तर सरोकारवालां हे उकी आपत्ति क्यंगुलिं थप वहस आवश्यक जूगु दु ।

More Stories Like this