साधनाय् लिप्त छम्ह साधक च्वमि

सुनिता मानन्धर

बौद्ध विद्वान नानीमैंया मानन्धरयात थुगुसीया मोतिलक्ष्मी सिरपाः लःल्हात। वय्कलं नेपालभाषा व बौद्ध साहित्यय् यानादीगु ज्यायात कदर यासें नेपालभाषा परिषदं थुगु दँया मोतिलक्ष्मी सिरपाः वय्कःयात लःल्हाःगु खः ।

खतुं वय्कःयात आपालं संघ संस्थां हनापौ आदि बिया तयेधुंकूगु दु। अथे खःसां सिरपाः कथं वय्कलं कयादीगु न्हापांगु सिरपाः धाःसा थ्वहे खः। वय्कलं धयादी 'धर्मया सेवा यानाः जितः गुगु सिरपाः बिल उकी जि तसकं लय्ताः।'

पंचनारायण मानन्धर व कृष्णमाया मानन्धरया क्वखं जन्म जूम्ह वय्कः थौंकन्हय् साधनाया क्षेत्रय् सक्रिय जुया च्वनादीगु दु। थम्हं साधना ख्यलय् पलाः न्ह्याकागुया प्रेरणा श्राेत कथं वय्कल सुमंगल भन्तेयात लुमंकादी। भन्तेया प्रेरणायात वय्कलं थुकथं लुमंकादी - सन् १९७१/७२ पाखे परियत्ति शिक्षा ब्वनाच्वनागु इलय् सुमंगल भन्तें ध्यान स्वयेत जक जूसां वा धायेवं दकलय् न्हापां जि झिन्हुया लागिं ध्यान च्वं वना । अनं लिपाया जिगु पलाः साधनाया क्षेत्रय् हे न्ह्यात ।

वय्कः साधनाया हे झ्वलय् थीथी देय् नापं नेपाःया हे आपालं जिल्लाय् थ्यनेधुंकूगु दु। वय्कलं भारतया सिलगुडी, राजगृह, दार्जलिङ्ग, कालिम्पोंग आदि नापं म्यानमार, मलेसिया, सिंगापुर, थाइल्याण्ड, श्रीलंका, ल्हासा, चीन, वर्मा, हङ्गकङ्ग, पाकिस्तान, अष्ट्रेलिया, फिलिपिन्स, जापानय् थःगु साधना यात्रा यानादीधुंकूगु दु ।

वय्कः दकलय् न्हापां भारतया राजगृह झाःगु इलय् अन ध्यान केन्द्र तकं मदु। ध्यान तयेमाल धकाः माग वयेवं अन त्रिपाल ग्वयाः थःपिंसं ध्यान तयागु घटना लुमंकादी। अथे ला साधनाया क्षेत्रय् वय्कलं यक्व हे अनुभव यानादीधुंकल। साधना ख्यलय् थम्हं यानागु अनेक घटनायात हे अविस्मरणीय क्षण कथं कयादी ।

लेखनया झ्वलय् वय्कलं शुरुइ 'गोरखापत्र'य् छपु निपु च्वसु च्वयेगु यानादीगु खः। अनंलि छम्ह पासां नेपालभाषाया 'सितु' पत्रिकाया लागिं नं च्वसु बिउ धायेवं उकिया लागिं नं च्वयेगु यानादिल। थौंकन्हय् नं वय्कलं थीथी पत्रपत्रिकाय् बुद्ध धर्मनाप स्वापू दुगु साधना सम्बन्धी च्वसुत च्वयेगु यानादी ।

थौंकन्हय् वय्कः धम्मपद अट्टकथा गाथाया घटना च्वयेगु ज्याय् व्यस्त जुयाच्वनादीगु दु। धम्मपद अट्टकथा गाथाया प्यंगू ब्व पिहां वयेधुंकूगु दुसा न्यागूगु ब्व प्रेसय् वने धुंकल। खुगूगु ब्व वय्कलं तयार यानाच्वनादीगु दु ।

१९७१ निसें थौंतक हे वय्कःया पलाः निरन्तर रुपं साधनाय् न्ह्यानाच्वंगु दु। थेरवाद बुद्ध शासन चिरस्थायी यायेगु तातुनां वय्कःया पहलं येँया नयाँ बजाःया पहिकोय् विहार दयेकेगु ज्या नं जुयाच्वंगु दु। वय्कलं थुगुसी मोतिलक्ष्मी सिरपाः कथं त्याकादीगु झिंन्याद्वः दां थुगु हे विहारया नामय् तयादीगु दु ।

More Stories Like this