अयोग्य लडाकुं विद्रोह यायेफु
अयोग्यतय् चित्त बुझे याये थाकुयाच्वन
येँ (सन्ध्या टाइम्स)/थीथी शिविरय् च्वनाच्वंपिं माओवादीया 'अयोग्य' लडाकुतय्त यदि चित्त बुझे मजुइक शिविरं चीकेगु ज्या यात धाःसा उमिसं विद्रोह समेत याये फुगु खँ शिविरया कमाण्डरतय्सं धाःगु दु ।
चितवन शक्तिखोर शिविरया डिभिजन कमाण्डर अविरलं थौं 'सन्ध्या टाइम्स'लिसे खँ ल्हासें यदि शिविरय् च्वनाच्वंपिं लडाकुतय् मनोविज्ञानयात वास्ता मयासे अनं चीकेगु ज्या यात धाःसा उकियात स्वीकार मयाइगु खँ कनादिल ।
आः तक थःपिनि शिविरय् अनमिनया टोली मवःनि व गबलय् वइ धइगु जानकारी नं मदुनि धासें वय्कलं थ्व टोलीं अयोग्य धाःपिं लडाकुतय्सं छु खँ व नं न्यनेमाः धयादिल ।
फुक्कं लडाकुत देश व जनताया सेवा याये धकाः हे वःगु व उपिं आः नं सेवा यायेत तयार दनिसा उमिगु थ्व भावनाया सम्मान जुइमाःगु बिचाः नं वय्कलं प्वंकादिल ।
उखे नवलपरासीया हात्तिखोर शिविरया कमाण्डर प्रतिकं नं यदि लडाकुतय् बिचाःयात कदर मयात धाःसा उमित थःपिंसं नं नियन्त्रण याये फइ मखु धयादीगु दु । थौंकन्हय् अनमिनया पुचः थुगु हे शिविरय् वनाः अयोग्य धाःपिं लडाकुतलिसे वार्ता यानाच्वंगु दु । अनमिनलिसे खँ ल्हानाच्वंपिं लडाकुतय्सं धाःसा थःपिंत नेपाली सेना दुने हे समायोजन यायेमाः धासें थ्व बाहेक मेगु विकल्पयात थःपिंसं स्वीकार मयायेगु खँ धायेधुंकूगु दु ।
उगु शिविरय् खँ ल्हानाच्वंगु अनमिन व सरकारया पुचलं अयोग्य धाःपिं लडाकुतय्त चित्त बुझे जुइक लिसः बी मफयाच्वंगु खँ नं धाःगु दु ।
