झाडाबान्ताया वासः इइउँ प्रधानमन्त्री

जाजरकोट व वया जःखः लाःगु जिल्लाय् वंगु छुं वाः न्ह्यवंनिसें ब्वलनाच्वंगु झाडाबान्ताया प्रकोप पनेगु लागिं सरकारं बियातःगु छुं हे निर्देशन पालना मजुइवं आखिर प्रधानमन्त्री माधव नेपाल थः हे वासःप्वः ज्वनाः उगु लागाया भ्रमणय् झाःगु दु। देशय् ब्वलंगु थ्व महाप्रकोपय् प्रधानमन्त्री स्वयम्पाखें थपाय्धंगु चिउताः क्यनेगु निश्चय नं उत्साहवर्धक खँ खः, तर प्रम नेपालं क्यनादीगु चिउताः तसकं लिबाक वःगुलिं धाःसा उगु लागाया जनता खास लय्ताये फुगु खने मदु ।

जाजरकोटया थ्व प्रकरणया झ्वलय् देय्या प्रशासन गय् यानाः सञ्चालन जुयाच्वंगु खः, उकियात कयाः धाःसा गम्भीर रूपं बिचाः यायेमाःगु स्थिति वःगु दु। झाडाबान्ताया प्रकोप शुरु जुयाः मनू सिनाच्वन धइगु समाचार न्हिंन्हिं हे वयाच्वनं नं देशय् स्वास्थ्य सम्बन्धी ज्या याइगु प्रशासनं छुं हे याये मफु। मनू हे सीगु थेंज्याःगु विकराल अवस्थाय् तक नं प्रशासन संवेदनशील जुइ मफुगु तःधंगु विडम्बनाया विषय खः। जाजरकोटया समस्या छु खः धइगु सीधुंकाः नं अन सामान्य वासः तकं गय् जुयाः थ्यंके मफुगु खः उकिया बारे छानबिन यानाः निर्देशनया पालना मयाःपिं कर्मचारीतय्त कारवाही हे यायेमाः। झाडाबान्ता दैवी विपत्ति नं मखु, आकस्मिक घटना नं मखु। थ्व पूर्ण रुपं मानवसिर्जित विपत्ति खः। थुकिया सिर्जना सुनां याःगु खः वयात कारवाही यायेगु नं देशय् छगू कथं दण्डहिनताया अवस्था उन्मुलन यायेगुपाखेया हे छगू पलाः जुइ। यदि जिल्ला जिल्लाय् झाडाबान्ताया वासः इनेगु थेंज्याःगु ज्या तकं प्रधानमन्त्री थम्हं हे याये मालाच्वन धाःसा गबलय् निर्माण जुइ थ्व देय् ?

More Stories Like this