प्रम थःहे वासः ज्वनाः चाःहिल
लिबाक व:गुलिं स्थानीय जनता तम्वल
येँ (सन्ध्या टाइम्स)/झाडाबान्ता नियन्त्रण यायेत सरकारं छुं हे कथंया कसर मत्वःतेगु खँ प्रधानमन्त्री माधव नेपालं धयादीगु दु ।
मध्यपश्चिमया झाडाबान्तां प्रभावित क्षेत्र रुकुम व जाजरकोटया निरीक्षण भ्रमण यायेगु झ्वलय् वय्कलं उगु खँ धयादीगु खः । राजनीतिक दल, नागरिक समाज व थीथी स्थानीय संघ संस्थायात झाडाबान्ता नियन्त्रण यायेगु निंतिं सक्रिय जुइत इनाप यासें वय्कलं विरामीया निंतिं माःगु वासः व राहत सामाग्री उपलब्ध यायेगु बचं नं बियादिल ।
उगु इलय् वय्कलं राहतया निंतिं डाक्टर व वासःया गुगुं नं कथंया अभाव जुइ मखु धासें विरामीतय् निंतिं आवश्यक फुक्कं राहत चूलाकेगु प्रतिवद्धता नं प्वंकादीगु खः । झाडाबान्तां प्रभावित थासय् बांलाक वासः मथ्यंगु खँय् असन्तुष्टि प्वंकुसें प्रम माधव नेपाल थौं थःहे वासः ज्वनाः उगु लागाया भ्रमणय् ब्वाँय् वंगु खः ।
भ्रमणया झ्वलय् वय्कलं सीपिनि छेँजःयात प्रति परिवार झिद्वः तका राहत बीगु व विपन्न परिवारयात थप न्याद्वः तका यानाः झिंन्याद्वः तका राहत दां बीगु प्रतिवद्धता नं प्वंकादीगु दु ।
रुकुमया सदरमुकाम मुसिकोटय् थौं सुथय् ग्वसाः ग्वःगु छगू ज्याझ्वलय् खुगू राजनीतिक पार्टीं प्रधानमन्त्री नेपालयात मंकाः माग पत्र नं न्ह्यब्वःगु दु । रुकुमय् जक झाडाबान्तां ३१ म्हेसिया ज्यान वनेधुंकूगु दु । प्रधानमन्त्रीया भ्रमण पुचलय् स्वास्थ्यमन्त्री उमाकान्त चौधरी, प्रेस सल्लाहकार विष्णु रिजाल, नेपाली सेनाया उपरथी डा. सुरज शमसेर राणा, स्वास्थ्य सेवा विभागया महानिर्देशक गोविन्द ओझालिसें थीथी राजनीतिक दलया प्रतिनिधित नं दुथ्याः ।
प्रधानमन्त्रीया थौंया भ्रमणयात रुकुम उद्योग वाणिज्य संघं तसकं लिबाक जूगु भ्रमण धकाः विरोध याःगु दुसा उकियात कयाः उद्योग वाणिज्य संघया पदाधिकारी व प्रम दथुइ सहलह जूगु दु ।
उखे दैलेखय् नं झाडाबान्तां म्हिगः स्वम्ह सीगु दु। अथे हे रोल्पाय् नं छम्ह सीगु दुसा ३२ म्ह विरामी जुयाच्वंगु दु गुकी न्याम्ह गम्भीर अवस्थाय् दु। प्रकोप तच्वया वंसां अन स्लाइन लःया अभाव जूगु खँ स्थानीय चिकित्सकतय्सं धाःगु दु ।
जाजरकोटं शुरु जूगु झाडाबान्ता पश्चिम नेपाःया थीथी जिल्लाय् न्यना वनाः स्वसः स्वयां अप्वः मनू सीधुंकूगु दु ।
