थुगुसीया एसएलसीइ नेपालभाषाय् टप जूम्ह रीना
कृष्ण
रीना बज्राचार्य २०६५ सालया एस.एल.सी. परीक्षाय् नेपालभाषा विषय कयाः दकलय् अप्वः ल्याः हयाः पास यानादीम्ह विद्यार्थी खः । वय्कलं येँया २० वडास्थित भिंद्यः त्वालय् च्वंगु परोपकार उच्च मा.विं एस.एल.सी. बियादीगु खःसा नेपालभाषा विषयय् एसएलसी टप जुयादीगु खः । वय्कलं नेपालभाषा विषयय् ८० ल्याः हयादीगु दु । अथेला मेमेगु विषयय् नं रीनाया नम्बर बांमलाः मजू । अथे खःसां न्हापांनिसें नेपालभाषाय् यक्व हे ध्यान दुगु व थः दाजु सुरज बज्राचार्यं नं नेपालभाषा कयाः ब्वँ धकाः हौसला बियाच्वनीगुलिं थः नेपालभाषाय् उत्कृष्ट ल्याः हयेत ताःलाःगु खः धकाः रीनां कनादी ।
थनिं झिंखुदँ न्ह्यः झोछेँय् बू्म्ह रीना बज्राचार्य थौंकन्हय् नःघलय् च्वनादीगु दु । जगतसुन्दर ब्वनेकुथि लगायत थीथी स्कूलं ग्वसाः ग्वःगु चिनाखँ कासाय् ब्वति कयाः थःगु प्रतिभा क्यनाः चिनाखँ विधाय् सिरपाः नं त्याकादी धुंकूम्ह रीनां एसएलसीया उत्कृष्टयात आःतक थम्हं कयागु उत्कृष्टत मध्यय् नं दकलय् उत्कृष्ट धयादी ।
एसएलसीइ उत्कृष्ट जूगुलिं नेवाः जागरण विद्यार्थी मञ्च व अन्तर क्याम्पस नेपालभाषा साहित्य पालापाखें मंकाः कथं याःगु हना ज्याझवलय् वय्कलं उत्कृष्टताया सिरपाः कयादीगु खः ।
न्यादँ ति न्ह्यः अबु सुरेन्द्र बज्राचार्य मदयेधुंकाः रीनाया ब्वनेगु व ग्वाहालि यायेगु ज्या मां रीता बज्राचार्य व दाजु सुरज बज्राचार्यं यानाच्वंगु दु । अथे जुयाः अबु मदुसां रीनाया ब्वनेज्याय् छुं पंगः मदु । अय्नं छगू सामान्य परिवारय् च्वनाः ब्वनाः नं रीनां थुगुसी नेपालभाषाय् दकलय् अप्वः ल्याः हःगुयात सकस्यां वय्कःया मेहनतया फल धाःगु दु ।
एसएलसी परीक्षाय् नेपालभाषा विषयय् उत्कृष्ट हयेधुंकाः रीना बज्राचार्यं थःगु रुची कथं अन्नपूर्ण कलेज ध्वाखाबहालय् प्लस टु भर्ना जुयादीगु दु । वय्कलं ब्यवस्थापन संकाय कयाः ब्वनादीगु खः । अथे खःसां दच्छि लिपा नेपालभाषा केन्द्रीय विभाग अर्न्तर्गतया पाटन संयुक्त क्याम्पसय् भर्ना जुयाः नेपालभाषा विषयय् हे दसिपौ तगिंनिसें ब्वनेगु थःगु ग्वसाः दुगु खँ नं वय्कलं कनादिल ।
स्कूलय् नं वय्कलं कक्षा १ निसें ५ तक नेपालभाषा कयाः हे ब्वनादीगु खः । कक्षा १ निसें हे नियमित रुपं परोपकार उच्च माविइ ब्वनादीम्ह वय्कलं न्यागू तगिं तक नेपालभाषा ब्वनेधुंकाः हाकनं कक्षा ९ व १० य् नेपालभाषा विषय कयाः ब्वनादिल ।
प्रारम्भिक कक्षा देवीडन स्कूलय् शुरु यानादीम्ह वय्कलं आः नेपाल लिपि सयेकेगु इच्छा तयादीगु दु । उकिया लागिं वय्कःया कका महेन्द्र बज्राचार्यं यलय् ब्वंकाच्वंगु लिपि कक्षाय् संलग्न जुइत स्वयाच्वंगु दु । ८ श्रावणंनिसें सुथय् कलेज वनाः न्हिनय् छेँज्या याये मालीगु बाध्यतां याना: इ धाःसा चूलानाच्वंगु मदु । अथे खःसां गन इच्छा अन उपाय धइथें वय्कलं नेपालभाषा, नेपाल लिपि व नेवाः जाति प्रति धाःसा थःगु मन क्वसाले धुंकूगुलिं थःत वःगु हौसलायात सही ढंगं सदुपयोग यायेत हे स्वयाच्वंगु दु ।
More Stories Like this
जातीय संघीयताया खँय् नेमकिपा प्राडो, पाजेरो ब्वाकेगु ख्यः मखु राष्ट्रपति प्रणाली बारे विवाद नेवाःतय्त जागृत याइगु 'नेपाःमिया नुगः सः' खँ स्वनिगःया
