जनजाति सभासद्तय् मंकाः दबू

संविधानसभाय् दुथ्यानाच्वंपिं थीथी राजनीतिक पार्टीया सभासद्तय्सं न्हूगु संविधान च्वयेगु ज्याय् आदिवासी जनजातिया सःयात अझ छगू हे धाः यानाः न्ह्यःने यंकेगु ताः तयाः ककस निर्माण याःगु दु । जनजाति अधिकारयात कयाः राजनीतिक पार्टीतय् बिस्कं बिस्कं बिचाः दुसां नं अन दुनेया सभासद्तय्सं थःपिनि अधिकार सुनिश्चित यायेगु लागिं गुगु छगू हे दबूया निर्माण याःगु खः, व स्वयमय् हे छगू तःधंगु उपलब्धी खः। उकिसनं थ्व दबुलिं जनजाति अधिकार सुनिश्चित यायेगु लागिं आत्मनिर्णयया अधिकार सहित जातीय स्वशासनयात न्हापांगु मागया रुपय् न्ह्यःने तःगु थुकिया मेगु बांलाःगु पक्ष खः। संविधानसभाय् दुथ्याःगु फुक्कं दलतय्सं अझ नं जातीय स्वशासनया मागयात आत्मसात याःगु खने मदुनि । आः जनजाति सभासद्त छथाय् च्वनाः थ्व माग थ्वयेकीबलय् उपिं नं थुकियात कयाः बिचाः यायेत बाध्य जुइ ।

थीथी पार्टी व थीथी राजनीतिक पृष्ठभूमि ज्वनाः वयाच्वंपिं जूगुलिं थ्व ककस दुने समान बिचाः व समान कार्यक्रम जुइत थाकुइ नं फु । उकिं कम से कम नं जनजातिया अधिकार कायेगु लागिं राजनीतिक वादयात छखे तयाः छगू हे मंकाः नारा व कार्यक्रम थ्व ककसं दयेकेमाः। लिसें थुकियात सुं नं सभासदं थःगु पार्टीया लाइनपाखे ब्वाकेगु ज्या नं याये मजिउ। राजनीतिक अधिकार कायेगु लागिं स्वंगु दबू खःसां थुकी दलगत राजनीतियात प्रवेश याके मजिउ । संविधानसभा, संविधानसभाया थीथी विषयगत समिति व थःथःगु दल दुने थ्व दबुलिं दवाव बीगु ज्या या हे याइ जुइ। थुकिं थीथी दलया कार्यकर्तायात नं छथाय् च्वनाः संघर्ष यायेत प्रेरणा बी ।

More Stories Like this