प्रम नेपाल प्रचण्डया छेँय्
बजेट पारित यायेत ग्वाहालि फ्वन
येँ (सन्ध्या टाइम्स)/प्रधानमन्त्री माधव नेपालं एकीकृत नेकपा (माओवादी) या अध्यक्ष प्रचण्डयात थःगु नेतृत्वय् दुगु सरकारय् दुहां वयेत इनाप यानादीगु दु ।
थौं सुथय् प्रचण्ड निवास नयाँ बजारय् झायाः वय्कलं उगु इनाप यानादीगु खः। लिसलय् अध्यक्ष प्रचण्डं थःपिं सरकारय् दुहां वयेगु अवस्था मदु धासें राष्ट्रपतिया पलाः भिंकेमाःगु व प्रधानसेनापति रुक्मांगद कटवालयात कारवाही यायेमाःगु थःपिनि अडान प्रम नेपाल समक्ष हानं तयादीगु खः ।
अध्यक्ष प्रचण्डयात नापलायेगु झ्वलय् प्रम नेपालं थःगु सरकारया ज्यायात ग्वाहालि यायेत व बजेटय् गुगुं नं कथंया पंगः मथनेत नं इनाप यानादीगु खः
।
बजेट बारे सहलह यायेधुंकाःलि उकियात पारित याकेगु ज्याय् माओवादीं हानं अवरोध सिर्जना यायेगु जुइ धकाः ख्याच्वः बिया वयाच्वंगुलिं प्रम नेपालं बजेट पारित यायेत ग्वाहालि यायेत नं प्रचण्डयात इनाप यानादीगु खँ सीदुगु दु ।
प्रधानमन्त्री नेपालं सहकार्य व सहमतिया विकल्प मदु धासें माओवादीयात नं सरकारय् वयाः ग्वाहालि यायेत आग्रह यानादिल ।
'वर्तमान राजनीतिक समस्या ज्यंकेत मिले जुयाः वनेगु बारे सहलह जुल' माओवादी अध्यक्ष प्रचण्डयात नाप लायेधुंकाः पत्रकारत लिसें खँ ल्हासें प्रम नेपालं धयादिल ।
पत्रकारत लिसे खँ ल्हासें वय्कलं अध्यक्ष प्रचण्ड म्हं मफुगुलिं वय्कःयात स्वयेत नं थम्हं नापलाः वयागु खँ कनादीगु खः।
उखे सूत्रया कथं वय्कःपिनि दथुइ अयोग्य माओवादी छापामारतय्त शिविरं पिने तयेगु बारे जुयाच्वंगु तयारीया बारे नं सहलह ब्याकेगु ज्या जूगु खः ।
सहलहया झ्वलय् माओवादी जनसेनायात सेनाय् समायोजना यायेगु प्रक्रिया, सरकार संचालनया निंतिं दयेकीगु उच्चस्तरीय संयन्त्र दयेकेगु व संविधान निर्माण प्रक्रियाय् जुयाच्वंगु ढिलासुस्तीया बारे नं बिचाः ब्याकेगु ज्या जूगु खः ।
प्रम नेपाल म्हिगः तिनि इजिप्टं लिहां झाःम्ह खः। प्यन्हु न्ह्यः वय्कः इजिप्ट वनीगु इलय् माओवादी नेता डा. बाबुराम भट्टराईनं नं वय्कःयात नापलानाः खँल्हाबल्हा याःगु खः । उगु खँल्हाबल्हाया नं विवरण पिहां मवःनि ।
उखे भारतया 'उपचार भ्रमण' क्वचायेकाः लिहां वःम्ह एमाले नेता केपी ओलीं म्हिगः नेकां सभापति गिरिजाप्रसाद कोइरालायात नाप लानाः खँल्हाबल्हा याःगु दु ।
