'अयोग्य' लडाकुतय् मेथाय् पुनःस्थापना

अनमिनं क्वःछिउगु मापदण्डय् मलाःपिं माओवादीया 'अयोग्य' लडाकुतय्त शिविरं चीकाः मेथाय् पुनःस्थापना यायेगु ज्या न्ह्याःगु दु । अनमिनं अयोग्य धकाः किटान यायेधुंकूसां नं माओवादी जनसेनाया शिविरय् तुं च्वनाच्वंपिं थ्व 'अयोग्य' छापामारतय् ल्याः प्यद्वः स्वयां अप्वः दु । उमित आः ससम्मान अनं चीकाः मेथाय् पुनःस्थापना यायेगु ज्या न्ह्यायेत्यंगु खः ।

माओवादीं झिदँ तक न्ह्याकूगु जनयुद्धय् ल्वाःगु इलय् योग्य जूपिं थ्व छापामारतय्त आः युद्ध क्वचायेधुंकाः अयोग्य धकाः चीकेबलय् उमित लाइगु मानसिक लिच्वःयात शुक्ष्म ढंगं अध्ययन यायेमाः। थ्व लिच्वःयात यदि उमिसं गलत रुपं थुइकल धाःसा कन्हय् उकिं मेगु समस्या पिहां वइगु खँयात आः हे वाःचायेकेमाः। आः अयोग्य धाःपिं थ्व लडाकुत अनमिनया मापदण्ड कथं जक अयोग्य जूपिं खः। मखुसा थुमिके बन्दूक चले यायेगु तरिका, गुरिल्ला युद्धया ज्ञान, मेमेगु कथंया घरेलु ल्वाभः दयेकेगु ज्ञान आदि आदि सीप अवश्य नं दु जुइमाः। थनं अयोग्य धकाः यदि थुमित अलपत्र याना बिल धाःसा कन्हय् उमिसं जनयुद्धया दौरानय् सयेकूगु थ्वहे सैन्य सीपयात छ्यलाः जूसां जीविका यायेगु लँपु मालेफु। जनयुद्धय् सयेकूगु सैन्य सीपयात यदि प्यद्वः मनुखं गलत रुपं प्रयोग यात धाःसा उकिं देशय् तःधंगु हे उथलपुथल हयेफु। उमिसं हइगु अज्याःगु उथलपुथलं माओवादीयात जक लिच्वः लाकीगु मखु । थुकिं मुक्कं देय्यात हे बांमलाःगु गालय् थुना बीफु। उकिं आः अयोग्य धाःपिं जनसेनायात शिविरं चीकाः मेथाय् तये यंकेगु जटिल जक मखु अतिकं संवेदनशील ज्या नं खः, थुकियात ल्वमंके मजिउ ।

More Stories Like this