राष्ट्रभक्तिं जक देय् रक्षा याइ

डी. आर. खडगे

गबलय् तक राजनैतिक नेतृत्व वर्गया सोच सकारात्मक जुयाः बांलाःगु सांस्कृतिक विकास याइ मखु अबलय् तक देश व समाजया अवस्था स्यना वनीगु स्वाभाविक खः। थौं झीगु देश न्हापा सिबें झन अप्वः स्यना वनाच्वंगु दु। पुरा समाजय् भय त्रास हिंसाया गतिविधि अप्वयाः समाज जंगली अवस्था थें जुयाच्वंगु दु । गथे जंगलय् जन्तुतय्सं छम्हं मेम्हनाप शत्रुभाव जक तयाच्वनीगु मखु हिंस्रक जुयाः मेम्ह जन्तुया शिकार यायेत स्वयाच्वनी। व थें तुं झीगु समाजय् नं अथे हे जुयाच्वंगु दु । थज्याःगु अवस्था सिर्जना यानाच्वंपिं सु धाःसा व हे अराजक राजनैतिक व्यक्तितय्सं खः। नेपाःया तःधंगु पार्टी धाःपिं ला पार्टीया रुपय् बिकास जुइ मफु खालि समूहया रुपय् जक विकास जुयाच्वंगु दु । पार्टीया रुप काये फुगु खःसां देशय् नियम कानून ठीक ढंगं चले यानाः जनताया सेवा यानाच्वनी। थौं नेपाःया पार्टीत समूहया रुपय् बिकास जुयाच्वंगुलिं पार्टीं हे पत्यक्ष वा अप्रत्यक्ष रुपं अराजक स्थिति सृजना यानाः जनतायात आतंकित यानाच्वन। पार्टीया नेतृत्व वर्गं अराजक स्थिति जक सृजना यानाच्वंगु मखु विदेशीया इशाराय् समेत चले जुयाच्वन । विदेशीया इशाराय् चले जुयाच्वंगुलिं विदेशी विद्रोहीतय्त नेपाःया भूमिइ कवाज म्हितकाः आंतकित यायेत स्वयाच्वन। यदि विदेशी लडाकुतय्त कवाज म्हितकेगु स्वयां तुं च्वन धाःसा देश रणभूमि जू वनेफु ।

२०२८ सालपाखे चीन विरोधी खम्पा जातियात हतियार ज्वंकाः चीन सरकारयात कायल याःगु जक मखु नेपाःया भूमिइ तकं आतंकित याकाच्वन। जब खम्पा पुचःयात जुजु वीरेन्द्रं सैनिक शक्तिं दबे याकल व इलंनिसें खम्पाया गतिविधि सिथिल जुयावंगु खः। खम्पा पुचःयात सक्रिय सहयोग व समर्थन यानाच्वंपिं नं अमेरिका व भारत हे खः धकाः पत्रपत्रिकाय् वयाच्वंगु खनेदु। जब खम्पा पुचःयात नेपाली सेनां दबे यात उबलय् निसें अमेरिका व भारतं नेपाःया राजपरिवारयात चीन पक्षयापिं धकाः द्वपं बीगु याना हःगु खः ।

नेपाः भारतया पराधीन जुइत बाध्य जूगु स्वदेशी व विदेशी षडयन्त्रं यानाः खः। पराधीन जुयां जक नं मगानाः अझ भारतं इलय् ब्यलय् टेन्सन बीगु हिसाबं गबलें चिकं बन्द याइगु, गबलें खाद्य सामाग्री बन्द याना बीगु। थथे नेपाःयात टेन्सन बीगु यानाच्वंगुलिं जुजु वीरेन्द्रं चीननाप नं स्वापू क्वातुकेगु ल्याखं नेपाः व चीनया सीमानाय् अप्वः नाका चायेकाः चीनया उद्योगपति व व्यापारीत हयाः भारतया यकःति व्यापारयात छुं हद तक कम यायेगु पलाः न्ह्याकूगु खः। तर जुजुया कुतः असफल जक जूगु मखु थ्वहे कारणं जुजुया अवसान तकं जुल। जब जुजुया शक्ति खत्तम जुल थनया नेतात फुक्क धइथंे भारतया इशाराय् अप्वः हे प्याखं हुलेगु यात। थ्व हे मौकाय् भारत व अमेरिकाया राजनैतिक चलखेल अप्वः जुयावन। विदेशी शक्तिया चलखेल नं अप्वयावन। विदेशी शक्तिया राजनैतिक चलखेल अप्वः जुयाच्वंगु कारण खः चीनयात टेन्सन बीगु। भारतीय नागरिकतय्त चांचां नेपाःया नागरिकता बीकाच्वंगुया कारण नं राष्ट्रवादी शक्ति व राष्ट्रियता कमजोर याना यंकेगु खः। आःया संसदय् ६०१ म्ह दु, उकी मध्यय् २०० सभासद ला भारतीय मूलया नागरिक जुयाच्वंगु दु। नेपाःया राजनीतिइ नं भारतीय मूलया नेतातय्गु शक्ति झन झन अप्वयाच्वंगु दुसा नेपाःया मूलवासीया शक्ति कमजोर जुजुं वनाच्वंगु दु । यदि थथे हे जुया वनाच्वन धाःसा देय्या अवस्था तसकं स्यना वनी। नेपालय् विदेशीया राजनीतिक चलखेल अप्वः जुयाच्वंगु दु धइगु खँ वंगु वालय् खुम्ह सभासदतय्सं याःगु भारत भ्रमणं क्यना बिल। खुम्ह सभासद भारतया धर्मशालाय् वनाः तिब्बतया पुलांम्ह जुजु दलाई लामायात नापलानाः आश्वासन तकं बिल। नेपालय् स्वतन्त्ररुपं तिब्बतीतय् गतिविधि न्ह्याका बीगु बचं तकं बिल। खुम्ह सभादत बीपी यादव, राजकिशोर यादब व आशाकुमारी सरदार फोरमयापिं खः। विश्वेन्द्र पासवान दलित पार्टी तराईयाम्ह, तमलोपाया इश्वर दयाल मिश्र व रुक्मिनी चौधरी संघीय लोकतान्त्रिक तराई मोर्चायाम्ह खः। थ्व खुम्हं सभासदया पार्टी तराईयात विभाजन यायेमाः धइगु बिचाःयागु खः। प्रत्यक्ष रुपं तराईया पार्टीत न्ह्यःने वयाच्वनसा अप्रत्यक्ष रुपं नेपाःया तःधंगु पार्टीतय् नं ल्हाः मदु धकाः धाये मछिं। यदि तःधंगु पार्टीया प्रत्यक्ष वा अप्रत्यक्ष ल्हाः मदुगु खःसा उच्चतहया नेतातय्सं विखण्डनबादी तिब्बती नेतात नापलायेगु आँट याइ मखु।
निक्वःगु जनआन्दोलनं ला राष्ट्रवादी शक्ति कमजोर याना यंकाच्वंगुलिं विदेशी शक्तिं खुल्ला रुपं राजनीतिक क्षेत्रय् हस्तक्षेप यानाच्वंगु खः। अमेरिकां नेपाःयात केन्द्रबिन्दु यानाच्वंगुया कारण खः चीनयात टेन्सन बी। थुकिया लागि नेपाःया भूमि विद्रोही तिब्बतीतय्त प्रयोग याकाःच्वंगु खः । थौंकन्हय् हिमाली जनताया विकासया नामं भारत, अमेरिका, युरोपियन यूनियन व अष्ट्रेलियां यक्व धनराशी खर्च यानाच्वंगु दु। धनराशी खर्च जुयाच्वंगु क्षेत्र खः विद्यालय निर्माण, लँ निर्माण, गुम्बा निर्माण, धर्मशाला निर्माण आदि। विदेशी राष्ट्रं धनराशी खर्च यानाच्वंगुया मू उद्देश्य खः चीन विरोधी भावना विकास याकाः विद्रोहया लागिं तयारी यायेगु। ल्हासाय् च्वंपिं तिब्बतीतय्त स्वायत्त शासनया लागिं सः तयेकाच्वंगु दुसा ल्हासां पिने च्वंपिं तिब्बतीतय्त सशक्त संघर्ष याकाः तिब्बतं चिनियाँतय्त पितिना छ्वयेगु धकाः शिक्षा व प्रशिक्षित बियाच्वंगु दु ।

खस ब्रम्हू व भारतीय मूलयापिं नेतातय्के राष्ट्रभक्ति कम व व्यक्तिवादी स्वार्थ अप्वः दयाच्वंगुलिं उपिं विदेशीया इशाराय् प्याखं हुलाः धनी जुयाच्वंपिं नेतात खः। उमिसं नेपाःया भूमियात युद्ध मैदानय् परिणत मयाइ धयागु ग्यारेण्टी मदु। अथे जूगुलिं देशभक्त शक्तित फुक्कं छप्पँ जुयाः विदेशीया दवावं मुक्त यानाः देय् विकास याये फयेकेमाः ।

More Stories Like this