पियुष पदक हरिकृष्णयात, चैन लाकौल सिरपाः श्रीतियात

थुगुसीया पियुष पदक व चैन लाकौल सिरपाः छगू ज्याझ्वःया दथुइ त्रिभुवन विश्व विद्यालयया रजिष्ट्रार भीमराज अधिकारीजुं छसिकथ भाजु हरिकृष्ण डंगोल व मय्जु श्रीति शाक्ययात लःल्हानादिल ।

नेपालभाषा केन्द्रीय विभागया सिद्धिदास सभाकक्षय् जूगु उगु ज्याझ्वलय् मू पाहां रजिष्ट्रार अधिकारीजुं भाषाया माध्यमं अन्तराष्ट्रिय ख्यलय् संस्कृति कालबिल याय्त ग्वाहालि जुइगुलिं थुकियात संरक्षण नापं विकास याना यंकेमाःगु खँ धयादिल । नापं सिरपाः त्याकादीपिं भाजु मय्जुपिंस थुगु क्षेत्रयात अझ तब्याका यंकेमाःगु थप दायित्व जूगु खँ नं कनादिल ।

नेपालभाषा केन्द्रीय विभागया नायः प्रा. प्रेमशान्ति तुलाधरया सभापतित्वय् जूगु उगु ज्याझ्वलय् प्रा. माणिकलाल श्रेष्ठं लसकुस यानादीगु खःसा प्रा.डा. सुन्दरकृष्ण जोशीजुं नेपालभाषाया अध्यापनय् खने दयाच्वंगु समस्याया बारे कनादिसें थुकियात विश्वविद्यालयपाखें समस्या ज्यंकेगु नितिं पहल यानादीत रजिष्ट्रार भीमराज अधिकारीयात इनाप यानादीगु दु ।

थुगुसीनिसें नेपालभाषा स्नातकोत्तर तिगंमय् दक्कलय् अप्वः ल्याः हयादीपिं भाजु व मय्जुयात कुमारी स्वर्ण पदक लःल्हाय्गु ज्या जूगु दु । कुमारी प्रकाशनया सल्लाहकार बद्रीलाल श्रेष्ठं थुगु पदक तयादीगु खः । थौंया उगु ज्याझ्वलय् बद्रीलाल श्रेष्ठपाखें हे उगु पदक भाजु हरिकृष्ण डंगोल व मय्जु श्रीति शाक्ययात लःल्हानादिल । उगु ज्याझ्वःस सिरपाः त्याकादीपिं भाजु मय्जु नापं चैन लाकौल सिरपाःया दाता श्रीकण्ठ लाकौलं नं थःगु नुगः खँ प्वंकादीगु खः ।

More Stories Like this