तलब अप्वइगु अनिश्चित
वार्ताय् सरकारं थःगु समस्या कनीगु
येँ (सन्ध्या टाइम्स)/कर्मचारीतय् तलब थकायेत सरकार सहमत जुइवं थौं सरकार व आन्दोलनरत कर्मचारी दथुइ वार्ता जुइत्यंगु दु। म्हिगः आकाझाकां च्वंगु मन्त्रिपरिषद बैठकं कर्मचारीतय् तलब थकायेगु निर्णय याःगु खः। सरकारपाखें थ्व निर्णय वयेवं उकियात लसकुस यासें कर्मचारीतय्सं थनिंनिसें आन्दोलनया ज्याझ्वः नं स्थगित याःगु दु ।
तर सरकारय् बजेट दयेकेगु ज्याय् संलग्न छगू सूत्रं धाःसा सरकारं तलब बढे याना बी धकाः निर्णय याःसां व कर्मचारीतय्सं बिचाः याना च्वं थेंज्याःगु वृद्धि धाःसा मजुइगु खँ धाःगु दु । बजेटय् गनं गनं लानाच्वंगु छुं जगेडा ध्यबायात हे कर्मचारीया तलबय् खर्च यायेगु कथं छुं भचा वृद्धि यायेगु ज्या जुइफु धासें सूत्रं वयां अप्वः याये फइगु अवस्था मदुगु दावी यात ।
देशय् १३ प्रतिशत मूल्यवृद्धि जूगु हिसाबं उमित १२ प्रतिशत भत्ता बिउगु पाय्छि हे खः धासें यदि वयां अप्वः तलब थपे याये माःगु अवस्था वल धाःसा उकुन्हुया बजेट हे गोलमाल जुइगु खँ नं सूत्रं याःगु दु ।
मूल्यवृद्धि व उकियात ध्यानय् तयाः बजेटय् यानातःगु व्यवस्था बारे बांलाक खँ थुल धाःसा कर्मचारीतय्सं नं अप्वः दवाव मबीगु आशा सूत्रं याःगु दु ।
वार्ता थौं न्हिनय् १ बजे अर्थ मन्त्रालयय् जुइगु ग्वसाः दु ।
