रामदेव विरुद्ध सेलिना

समलैंगिकताया खँय् बाबा रामदेव व सेलिना जेटलीया दथुइ शितयुद्ध न्ह्यानाच्वंगु झ्वलय् लिपांगु इलय् सेलिना रामदेव विरुद्ध आक्रामक शैलीं प्रस्तुत जूगु दु ।

खँ 'समलैंगिकता अपराध मखु' धकाः दिल्लीया हाई कोर्टं याःगु फैसलानिसें सुरु जूगु खः । थ्व फैसला लिपा बाबा रामदेवं 'समलैंगिकता छगू रोग खः, थ्वयात योगं ठिक यायेफु' धकाः प्रचार याना जुल । थुकिया प्रतिवाद यानाः सेलिनां धाल - 'समलिंगीतय्सं थुकियात गबलें रोग कथं काःगु मदु, अले इमिसं मेपिन्त गबलें हे छुं नं कथंया बांमलाःगु भावना स्वःगु मदु । मेपिन्सं जक समिलंगीतय्गु खँय् म्वाः मदुगु कपाः स्याके माःगु छाय्? मनूतय्सं मेपिनिगु बेडरुमय् चियोचर्चा याना जुइगु बांलाः मजू ।'

सेलिनां आक्रामक जुयाः धाल -'रामदेवयाके छुं नं कथंया डिग्री मदु, वं वासः याइगुलिइ छुं नं आधार मदु उकिं थःम्हं मस्यूगु मथूगु खँय् न्वमवाःसा हे बांलाः ।'

सेलिनायात रामदेवं सेल्लाःगु लिसः धाःसा बिइमफुत । रामदेवं थुलि हे जक धाल कि - 'थुमिसं भारतिय संस्कृति धयागु हे मथू । मचांनिसें मांअबुलिसे तापाक्क च्वंगुलिं थुमिके नैतिकता धयागु हे मदु ।'

More Stories Like this