मन्त्रीलिसे वार्ता बहिष्कार

तलब बढे यायेगु जिम्मा अर्थ मन्त्रीयात

येँ (सन्ध्या टाइम्स)/सरकार व कर्मचारी दथुइ अर्थ मन्त्रालयय् जुइ धाःगु वार्ता कर्मचारीतय्सं बहिष्कार याःगु दु। अर्थ मन्त्री लिसे वार्ता यायेत वंपिं प्रतिनिधितय्त अर्थ मन्त्री सुरेन्द्र पाण्डें वेवास्ता याःगु द्वपं बिसें कर्मचारीतय्सं वार्ता वहिष्कार याःगु खः। उमिसं अर्थमन्त्री मन्त्रालय दुने हे च्वनाः नं वार्तास्थलय् मवःगु धासें वार्ता वहिष्कार याःगु खः।
वार्तास्थलय् अर्थ मन्त्रालयया सचिव व अर्थमन्त्रीया स्वकीय सचिव जक च्वनाच्वंगुलिं कर्मचारीत वार्ता मयासें पिहां वःगु खः। अर्थ मन्त्रीलिसे वार्ता यायेगु निंतिं थीथी न्यागू कर्मचारी संगठनया निम्ह निम्ह प्रतिनिधि वंगु खः ।

थ्वहे झ्वलय् अर्थ मन्त्रालयं वार्ता बहिष्कार यानाः नाराबाजी यासें पिहां वःपिं १५० स्वयां अप्वः कर्मचारीतय्त सिंहदरवार परिसरं ज्वना यंकूगु दु। उमित सिंहदरवार दुने प्रदर्शन याःगु धासें प्रहरीं ज्वंगु खः ।

वार्ता असफल जुइधुंकाः आः कर्मचारीतय्सं थप आन्दोलनया घोषणा यायेगु तयारी यानाच्वंगु दुसा ज्वना यंकूपिं कर्मचारीतय्त तुरुन्त त्वःतेत नं उमिसं माग याःगु दु।
थौं कर्मचारीतय्सं सिंहदरवारय् प्रदर्शन याइ धकाः सरकारं कडा सुरक्षा व्यवस्था यानातःगु खःसां नं कर्मचारीतय्सं सुरक्षा व्यवस्थायात तोडे यानाः प्रदर्शन याःगु खः।
थ्वहे झ्वलय् कर्मचारीतय्सं यानाच्वंगु आन्दोलन बारे सहलह यायेत थौं च्वंगु मन्त्रिपरिषद्या आकस्मिक बैठकं कर्मचारीतय् तलब बढे यायेगु निर्णय याःगु दु। थौं सुथय् उपप्रधान तथा कार्यवाहक प्रधानमन्त्री विजयकुमार गच्छदारया अध्यक्षताय् च्वंगु बैठकं कर्मचारीया तलब बढे यायेगु सम्बन्धी अन्तिम निर्णय यायेगु जिम्मा अर्थमन्त्री सुरेन्द्र पाण्डेयात बिउगु खः। बैठकं कर्मचारीतय्त वार्ताय् वयेत नं इनाप याःगु दु ।

म्हिगः निजामती कर्मचारीत जक आन्दोलनय् कुहां वःगु खःसा थौं नेपाल विद्युत प्राधिकरण, नेपाल टेलिकम, खानेपानी संस्थान व वाणिज्य बैंकया कर्मचारीत नं कुहां वयाः धर्ना बियाच्वंगु दु ।

आन्दोलनया झ्वलय् थौं कर्मचारीतय्सं देय्न्यंकं सीडीओ ज्याकुथी नं धर्ना बियाच्वंगु दु। अथे हे थौं नेपाल विद्युत प्राधिकरण, वाणिज्य बैंक, टेलिकम व खानेपानी संस्थानया मू लुखाय् तालं ग्वया बिउगु दु। कर्मचारीतय्सं थःपिंत न्याद्वः तका तलब बढे यायेमाःगु लगायत खुगू बुँदाया माग न्ह्यब्वसें आन्दोलन यानाच्वंगु खः ।

उखे थौं च्वंगु मन्त्रिपरिषद बैठकया समाचार काःवंपिं पत्रकार व प्रहरी दथुइ छझाः विवाद जूगु दु। पत्रकारतय्त प्रहरीं प्रेस पासया म्याद फुइधुंकूगु धासें सिंहदरवारय् दुत मछ्वयेवं विवाद जूगु खः ।