ख्वपया लाय्कू न्हूगु जुइन

कृष्ण

न्यय्न्यापाः झयाः दरवार ल्ह्वनेगु क्वचायेवं तलेजुया थीथी लागा नापं मूल चुक व कुमारी चुक तकं न्हूगु ढंगं दयेकेगु शुरु यायेवं ख्वपया लाय्कू दरवार न्हूगु जुइत्यंगु दु । ख्वपय् उकिया लागिं थौंकन्हय् दरवार दुने युद्धस्तरं ज्या नं न्ह्याकाच्वंगु दु । निदँ न्ह्यवंनिसें शुरु याःगु न्यय्न्यापाः झयाः दरवार दयेकेगु ज्या पूवनेवं आः उगु दरवारय् ख्वप नगरपालिकाया ज्याकू सरे यानाः ख्वप नगरपालिकाया भवनयात न्हूगु ढंगं दयेकेगु शुरु यायेत्यंगु दु । झिंन्यादँ न्ह्यः ख्वप नगरपालिका वडा नम्बर १ य् च्वंगु भुलां पुखुली ख्वप नगरपालिका भवन दयेकूगु खः । तर नगरपालिका ज्याकू उगु लागाय् सरे जुइवं लाय्कू दरवार सुरक्षित मजुइगु तायेकाः आः तकं उगु थासय् नगरपालिका ज्याकू सरे मयासे ख्वप नगरपालिकां चले यानाच्वंगु ख्वप कलेज जक सञ्चालन याना वयाच्वंगु खः । आः लाय्कूया पुलांगु भवन हे न्हूगु यानाः दयेके मालाः नं तयारी भवनय् ज्याकू सरे यायेगु स्वयां विश्व सम्पदास्थल जुयाच्वंगु न्यय्न्यापाः झयाः दरवारया छ्यली ख्वप नगरपालिकाया ज्याकू तयेत स्वयाच्वंगु दु । तर उकिया तीब्र विरोध नं जुयाच्वंगु दु ।

सम्पदा व संस्कृत्रि्रेमितय्सं विश्व सम्पदास्थल जुयाच्वंगु उगु न्यय्न्यापाः झयाः दरवार दुने थुकथंया नगरपालिका ज्याकू तयेके मजिउगु दावी याना वयाच्वंगु दु । तर ख्वप नगरपालिकाया निर्वाचित मेयर प्रेम सुवाल व उपमेयर चैत्यराज शाक्यं धाःसा उगु थासय् न्हापा नं थीथी कथंया ज्याकू तयातःगु व आः उगु थाय् खाली जुयाच्वंगु ल्याखं नगरपालिकाया भवन निर्माण यायेगु अवधि तक जक अन नगरपालिकाया ज्याकू अस्थायी रुपं सरे यायेत्यनागु खँ धयादीगु दु । आः नं न्यय्न्यापाः झयाः दरवारय् राष्ट्रिय कला संग्रहालय तयातःगु दु । नापं छ्यली न्हापा नगरपालिकाया हे सम्पदा शाखा तयातःगु खःसा अन भक्तपुर महोत्सव जूगु इलय् नं सफू ब्वज्या यायेगु छगू स्टल तयेत स्वयेवं अबलय् छक्वः अन स्टल तयेकेगु वा मतयेकेगु धइगु खँय् नं विवाद ब्वलंगु खः । नापं अन थीथी ज्याकू नं तयाः सुरक्षा यानातःगु खः । मेमेगु ज्याकू तःसां नगरपालिकाया थःगु हे ज्याकू तयेगु खँ जुइवं धाःसा आः तलेजु गुथि, सम्पदा विभाग व पुरातत्व विभाग दथुइ खँ मिले मजूगु कारणं आः तक नं ज्या अथें थानाच्वंगु दनि ।

तलेजुया दुने च्वंगु बेक्वः चुकया नापं च्वंगु लुँहितिइ च्वंगु छगू तुंथि धाःसा न्हूगु ढंगं तयार यायेत स्वयाच्वंगु दु । नीदँ स्वीदँति न्ह्यः हे अन मल्लकालीन तुं अथें ज्या मवयेवं ल्हानाछ्वःगु खः । तर आः लःया अभाव व तलेजुइ नित्य जलदान यायेत लः अभाव जूगु कारणं उगु मल्लकालीन तुं म्हुइगु शुरु जूगु खँ तलेजुया मूल पूजारी नरेन्द्र प्रसाद जोशीं सन्ध्या टाइम्सयात कनादिल । नापं उगु ज्या पूवनेवं हे आः याकनं अन परम्परागत ढंगं दयेकातःगु अति सुन्दर कुमारी चुकया जीर्णोद्धार शुरु जुइत्यंगु दु । अन पौ स्यनाः लः ज्वयाः कुमारी छेँया फुक्कं हे कलात्मक बुट्टात जीर्ण जुइगु अवस्थाय् लानाच्वंगु दु । उकिया लागिं पुरा- तत्व विभाग, गुथि संस्थान व स्थानीय निकायपाखें माक्व ध्यान मतःगुलिं सिँ ब्यवस्था यायेगु व उगुंथुगुं तयारी ज्या थानाच्वंगु नं नरेन्द्र प्रसाद जोशीं कनादिल । थ्वहे इलय् लाक्क न्यय्न्यापाः झयाः दरवार दुने हे नगरपालिका भवन तयेगु खँ वयेवं धाःसा थप विवाद नं ब्वलना वयाच्वंगु दु । ख्वप नगरपालिका श्रोतं धाःसा नगरपालिका ज्याकू तयां सम्पदा संर-क्षणय् छुं पंगः ब्वलनी मखु धइगु तर्क तया वयाच्वंगु दु । यदि अन नगरपालिका भवन तयेगु खःसा लाय्कू लागा नापं थःपिनि सुरक्षा अप्वः दइगु नं उमिगु तर्क दु । उकिं आः तलेजु नापं ख्वप दरवारया सुरक्षाया लागिं हे नगरपालिका भवनयात न्हूगु ढंगं लाय्कुली लाःगु न्यय्न्यापाः झयाः दरवारया छ्यली तयाः ख्वपया विश्व सम्पदा बचे यायेत स्वयाच्वनागु दावी यानाच्वंगु दु ।

More Stories Like this