कर्मचारीपाखें सिंहदरवार ठप्प

मन्त्रीत हे मन्त्रालयय् दुहां वने मखं

येँ (सन्ध्या टाइम्स)/सरकारंहःगु आर्थिक दँ २०६६/६७ या बजेटय् कर्मचारीतय् माग कथं तलब वृद्धि मयाःगु विरोधय् निजामति कर्मचारी संगठनतय्सं थौं नं सिंहदरवार न्ह्यःने प्रदर्शन यात। उमिसं सिंहदरवारय् च्वंगु थीथी मन्त्रालय दुहां वनेगु लँय् प्रदर्शन यानाच्वंगुलिं मुक्कं सिंहदरवार लागा हे प्रभावित जूवंगु दु । कर्मचारीतय्सं थौं अर्थ मन्त्रालय न्ह्यःने च्वनाः नाराबाजी नं यानाच्वंगु दु ।

कर्मचारी प्रदर्शनया कारणं उगु लँपु जुयाः चले जुइगु सवारी साधन नं पूर्ण रुपं प्रभावित जुयाच्वंगु दु । आन्दोलनरत कर्मचारीतय्सं सिंहदरवार दुने हे थाय्थासय् गाडी बेथां दिकाः लँ पनातःगुलिं दुनेया यातायात अस्तव्यस्त जुयाच्वंगु दु । गाडी हे यंके मछिंगुलिं सुं हे मन्त्रीत थःपिनि ज्याकुथी दुहां वने मखनाच्वंगु खँ नं धाःगु दु ।

नाराबाजी यानाच्वंपिं कर्मचारीतय्सं मेमेगु मन्त्रालयय् च्वंपिं कर्मचारीतय्त नं पिहां वयाः आन्दोलनय् ब्वति काः वा धकाः आह्वान यानाच्वंगु दु ।

कर्मचारीत आन्दोलनय् लगे जूगुलिं थीथी मन्त्रालयय् यायेमाःगु गुलिखे ज्या ठप्प जुयाच्वंगु खँ नं सीदुगु दु।
उखे तलबवृद्धिया माग तयाः चरणवद्ध आन्दोलन न्ह्याकेगु निंतिं थीथी कर्मचारी संगठनतय् दथुइ सहलह नं न्ह्याकेत्यंगु दु। थौं थीथी कर्मचारी संगठनतय् मंकाः बैठक च्वनाः थप आन्दोलनया घोषणा यायेगु तयारी जुयाच्वंगु दु ।

तलब बढे मजूगु विरोधय् म्हिगः कर्मचारीतय्सं अर्थ मन्त्रालयय् धर्ना बिउगु खःसा थौं थीथी पार्टीया नेतात नापलानाः समस्या प्वंकीगु ज्याझ्वः दु। थौं एमालेया अध्यक्ष झलनाथ खनाल व कांग्रेसया उपसभापति रामचन्द्र पौडेलयात नापलाइगु ज्याझ्वः दु ।