थौं न्हूगु बजेट पिहां वइगु

थगुने देय्या आर्थिक किपा बांलाः मजू

‍येँ (सन्ध्या टाइम्स)/अर्थमन्त्री सुरेन्द्र पाण्डें थौं सरकारपाखें न्ह्यब्वइगु आर्थिक दँ २०६६/६७ या बजेट र्सार्वजनिक यानादीगु ज्याझवः दु ।

वय्कलं थौं न्हू वानेश्वरय् च्वंगु संसदया ज्याकुथिं उगु बजेट र्सार्वजनिक यानादी ।

वय्कलं थौं सदनय् २ खर्ब ८५ अर्ब ९३ करोड तकाया अनुमानित बजेट न्ह्यब्वयादीगु खँ सूत्रतय्सं धाःगु दु ।

अर्थमन्त्रीं र्सार्वजनिक यानादीगु बजेटय् समावेशी, गरिबी म्हो यायेगु, सीमान्तकृत बेरोजगारतय्त म्होतिं सछिन्हु तक रोजगारी उपलब्ध याकेगु, कृषि क्षेत्रय् लगानी अप्वयेकेगु आदि खँयात प्रमुख रुपं न्ह्यथनातःगु दु ।

थुगुसी सेनां रक्षा बजेट बढे यायेमाः धकाः सरकारयात निरन्तर बियाच्वंगु दवाव कथं सरकारं छुं भचा रक्षा बजेट अप्वयेकूगु दु ।

रक्षा बजेट अप्वयेकेमाःगुया मू कारण थुगुसी सेनाया दरबन्दी अप्वःगुलिं धकाः क्यंगु दु ।

थ्वहे झवलय् बजेट पेश याये स्वयां छन्हु न्ह्यः म्हिगः सरकारं र्सार्वजनिक याःगु थगुनेया आर्थिक र्सर्वेक्षणय् नेपाःया आर्थिक गतिविधिया खिउँगु किपा क्यंगु दु ।थगुने सरकारं गुलि लक्ष्य तयाः बजेट दयेकूगु खः उकथंया छुं हे उपलब्धी धाःसा मजूगु खँ र्सर्वेक्षणं क्यंगु दु । सरकारं तःगु विकास लक्ष्य पटक्क हे हासिल मजूगु व कुल आर्थिक वृद्धिदर व प्रतिव्यक्ति आय समेत वृद्धि मजूगु खँ र्सर्वेक्षणं क्यंगु दु ।

थगुने सरकारं स्वास्थ्य ख्यलय् थीथी न्हूगु ज्या याःगु खःसां उकिया उपलब्धी धाःसा शुन्य जुयाच्वंगु खँ नं र्सर्वेक्षणं क्यंगु दु । थुकिया हे लिच्वः कथं देशय् आः वइगु आर्थिक वृद्धि नं खास हे बांलाःमजुइगु अनुमान नं अर्थविद्तय्सं याःगु दु ।

उखे सरकारं थौं बजेट पेश याइगु दुसा उकियात नं माओवादीं नीति तथा कायक्रमयात थें तुं महत्व मबीगु खँ सूत्रं धाःगु दु ।