प्वंकेमखंगु श्रद्धांजिल

सम्पादकजु,

उकुन्हु नेसं ११२९ द्वादशिया न्हि । पासा छम्हेस्यां सुचं दुगु पत्रिकाया किटङ्ग छकू बियाः धाल कि कन्हय्
थ्व ज्याझ्वलय् ब्वति का न्हिं । तर थः चाहिं पिकनिक वनेमानिगु जुयाः वने मलात धकाः चिला वन । उगु किटङ्ग खः मोतिलक्ष्मीया सछिदँ बुन्हि समारोह समितिया इनाप । जितः नं उगु जुलुसय् ब्वति काये मास्ते वल । तर जुलुस गनं न्ह्याइगु खः धइगु खँ उकी च्वयातःगु मखना । सुथय् ६ बजे धकाः जक च्वया तल । जिगु बिचारय् नेवाःतय्गु ज्याझ्वःत अप्वः यानाः बसन्तपुली जुइगु कारणं थ्व नं अनं हे
जुइ धकाः बसन्तपूपाखे ब्वाँय् वना । अन जि सुथय् ६:२० बजे अन थ्यंगु खः । अन सुं हे जिं मखना । ५ मिनेट ति च्वना तर जिं छफुति हे चहलपहल मखना । जिं बिचाः याना शायद ज्याझ्वः असं, भोताहितिइ जुइ का धकाः उखेपाखे ब्वाँय् वना । छाय्धाःसां नेवाःतय्गु ज्याझ्वः जुइगु छगू थाय् व नं खः । असं भोताहितिइ इरुथिरू जुयाच्वना । सुं हे मखना । शायद आशा सफूकुथी मुनीगु खः ला उखे
वना । तर अन नं सुं मखना । जि अन ६:४५ बजे तक च्वना । नेपाःया हे न्हापांम्ह मिसा बाखं च्वमिया १०० दँ बुन्हि कुन्हु नुगलय् लूगु श्रद्धाया छपासः स्वां देछायेगु लागिं इरुथिरु जुयाच्वनाम्ह जि थःम्हेस्यां थःत हे धिक्कार यानाच्वना । थाय् हे मसिउम्ह जि छाय् थथे लिमलाः फमलाः वयाच्वने माःगु खः नुगलय् बुया वःगु स्वां देछाये मखनाः स्वां झ्वाः जुइ न्ह्यः हे देछायेत जि अनं तप्यंक स्वयम्भु वना व अन तथागतया चरणय् स्वां देछाना वया । मोतिलक्ष्मीया १०० दँ बुन्हि समारोह समितिया सुचं खनाः अजू चायाच्वना । वा वा धकाः सुचं बीगु तर गन वयेगु< धकाः मधायेगु । नेवाः मिसातय्त दँ दँ धकाः थनीम्ह मोतिलक्ष्मी उपासिकाया उपासकत थौं तक नं दने मफुगु खनाः अजूचाल । शायद मेगु दँय् थज्याःगु गल्ती जुइ मखु धकाः मनं तुनाच्वना ।

- अनिता कर्माचार्य ।

More Stories Like this