सेनाया पती अझं 'श्री ५'
माओवादीपाखें नीति तथा कार्यक्रम बहिष्कार
येँ (सन्ध्या टाइम्स)/वंगु असार २५ गते राष्ट्रपति डा. रामवरण यादवं संसदय् न्ह्यब्वःगु नीति तथा कार्यक्रमया कयाः थौं सुथंनिसें न्ह्याःगु सहलह ज्याझवः माओवादीं बहिष्कार याःगु दु ।
नीति तथा कार्यक्रम बारे सहलह न्ह्यायेवं माओवादी नेता डा. बाबुराम भट्टर्राईनं थःगु पार्टीया धापू तसें सहलह ज्याझवलय् थःपिंसं ब्वति मकायेगु घोषणा यानादीगु खः ।
सदनय् न्ववासें डा. भट्टर्राईनं सरकार असंवैधानिक तरिकां गठन जूगुलिं सरकारं हःगु नीति तथा कार्यक्रमय् ब्वति मकायेगु घोषणा यानादीगु खः । वय्कलं सैनिक सर्वोच्चता स्वीकार यानाः नीस्वंगु सरकारपाखें अग्रगमनया अपेक्षा याये फइ मखु धासें नीति तथा कार्यक्रमया औचित्य मदुगुलिं थुकियात खारेज यायेमाः धयादिल ।
सैनिक सर्वोच्चतां बने जूगु व जनतापाखें तिरस्कृत राष्ट्रिय आत्मर्समर्पणवादी सरकारयात नीति तथा कार्यक्रम हयेगु अधिकार हे मदुगु दावी नं वय्कलं यानादिल ।
अन्तरिम संविधानय् मदुगु अधिकार छ्यलाः राष्ट्रपतिं चान्हय् 'कू' याःगु द्वपं बिसें वय्कलं राष्ट्रपतिया थ्व पलाः मभिंकूतले सरकारयात मान्यता बी फइ मखु धयादिल । वय्कलं प्रधानसेनापति रुक्मांगद कटवालं शान्ति सम्झौता अःखः ब्यारेक ब्यारेकय् चाःहिलाः थीथी कथंया अभिव्यक्ति बियाच्वंगु दु धासें वयात कारवाही यायेमाःगु माग नं यानादिल । वय्कलं धयादिल, 'शिशु गणतन्त्रया हत्या यानाः राजतन्त्रयात म्वाकेगु षडयन्त्र सेनाया अधिकारीतपाखें जुयाच्वंगु दु ।'
वंगु असार २४ गते सेनां च्वयातःगु छगू पौ क्यँसें आः नं सेनां थःगु पतिइ 'श्री ५' व 'शाही नेपाली सेना' धकाः हे च्वयेगु यानाच्वंगु दसि क्यनादिल । उगु पौ सदनय् पेश यासें वय्कलं धयादिल, 'गुगु नं इलय् शिशु गणतन्त्रया हत्या जुइफु, सकलें सचेत जुइमाः ।'
माओवादीया बहिस्कार यायेगु घोषणा लिपा माओवादीया सकलें सभासद्त सदनं पिहां वंगु खः ।
अथे हे मधेशी जनअधिकार फोरमया नेता जयप्रसाद गुप्तां सरकारं न्ह्यब्वःगु नीति तथा कार्यक्रमं मधेशी जनतायात उपेक्षा याःगु द्वपं बियादिल ।
नीति तथा कार्यक्रमय् न्यंगु न्ह्यसःया लिसः थौं हे प्रधानमन्त्री माधव नेपालं बियादीगु ज्याझवः दु ।
