कार्यक्रम खनाः कांग्रेस तम्वल
संशोधन प्रस्ताव तयेत सांसदतय् दवाव
येँ (सन्ध्या टाइम्स)/राष्ट्रपति डा. रामवरण यादवं म्हिगः र्सार्वजनिक यानादीगु सरकारया नीति तथा कार्यक्रमं सत्ता साझोदार पार्टी नेपाली कांग्रेसयात तम्वयेका बिउगु दु । कार्यक्रम एमाले याकःचिगु थें जक च्वं धासें पार्टी दुने उकिया विरुद्ध संशोधन प्रस्ताव दर्ता यायेमाः धकाः समेत दवाव वनाच्वंगु खँ सीदुगु दु ।
कांग्रेसया संसदीय दल दुने नीति तथा कार्यक्रमया विरोध यासें उकिया विरोधय् संशोधन प्रस्ताव हे दर्ता यायेमाः धकाः दवाव वनाच्वंगु दु । सभासद्तय्सं दलया नेता रामचन्द्र पौडेलयात नापलासें तुरुन्त हे दलया बैठक सःताः संशोधन प्रस्तावया तयारी यायेमाः धकाः माग यानाच्वंगु दु । सभासद्तय्सं सरकारय् वनाच्वंपिं पार्टी मन्त्रीत व नीति तथा कार्यक्रम दयेकेगु ज्याय् खटे याःपिं दुजःत निकम्मा जूगुलिं थज्याःगु कार्यक्रम वःगु खः धकाः नं द्वपं बिउगु दु ।
कांग्रेसया भातृ संगठन तरुण दलं नं नीति तथा कार्यक्रमय् ल्याय्म्हतय् बारे छझवः हे च्वया मतः धासें ल्याय्म्हतय् निंतिं विशेष ज्याझवः हयेमाः धकाः थःपिंसं बियागु सुझावयात नं वेवास्ता याःगु द्वपं बिउगु दु । तरुण दलं नं थुकी संशोधन प्रस्ताव दर्ता यायेमाः धकाः पार्टीत इनाप याःगु दु ।
तर पार्टी सचेतक लक्ष्मण घिमिरें धाःसा थः हे सम्मिलित सरकार जूगुलिं वं हःगु नीति तथा कार्यक्रमय् कांग्रेसं संशोधन प्रस्ताव तयेगु बांलाइ मखु धयादीगु दु ।
