असुरक्षा व अराजकताया राजधानी

दिलिप शाही 'शान्तियज्जु'

देशय् थौं सामाजिक अराजकता अप्वया वनाच्वंगु दु । छुं खितिक जुल कि हे बन्द हडताल यायेगु लिसें मनू स्यायेगु तकया ज्या मनूतय्सं यानाच्वंगु दु । न्हापा स्वनिगलं पिने जक जुयाच्वंगु थज्याःगु अराजकता थौं स्वनिगलय् नं थ्यनेधुंकूगु दु ।

वंगु छुं न्हि न्ह्यः जक किपुली निगू पुचःया दथुइ जूगु ल्वापुयात मचा अपहरण थेंज्याःगु गम्भीर आरोप बियाः किपू देय् बन्द यायेगु ज्या जुल । वयां छुं न्हि लिपा हे ग्वंगःबुँइ नं थुकथं हे मचा अपहरण याना यंकेत्यंगु द्वपनय् छम्ह मनूयात सितुपातु वंक दाया बिल ।

थज्याःगु घटना क्वचाये मलायेकं हे थिमिइ नं निगू पुचः दथुया ल्वापुयात अपहरणया रंग इलेगु जक मखु अनावश्यक रुपं निम्ह ल्याय्म्ह विद्यार्थीतय् ज्यान तकं वंके मालसा निम्ह गम्भीर अवस्थाय् लानाच्वंगु खँ र्सार्वजनिक जूगु दु ।

थौं देय्या राजधानीइ अप्वया वनाच्वंगु थज्याःगु आपराधिक अराजकताया दोषी सु खः धइगु मालेमाःगु अवस्था ब्वलंगु दु ।

गुगु देय्या सरकार आम जनतायात शान्ति सुरक्षाया अनुभूति बीत असफल जुइ उगु देय्या जनतां थःत असुरक्षित जक तायेकीगु मखु थःगु सुरक्षाया निंतिं थःहे न्ह्यचिलेमाःगु आवश्यकता समेत न्ह्यःने वया बी । अथे जुयाः राज्यया दकलय् न्हापांगु दायित्व धइगु जनतायात शान्तिपूर्वक जीवन यापन याके बीगु खः । तर थौं सरकार जनतायात शान्ति सुरक्षा बीगु स्वयां नं थःगु कुर्सि गुकथं ल्यंकेगु धइगु खँय् ब्वाँय् जुइ माःगुलिं यानाः देय्या शान्ति सुरक्षा स्वयां नं सत्ताया सुरक्षा यायेत राजनीतिक पार्टीगे जुइ मालाच्वंगु दु गुकिया कारणं हे थौं देशय् थज्याःगु अवस्था ब्वलंगु खः धायेत लिफः स्वयेमाःगु मदु ।

खतुं स्वनिगलं पिने नं आपालं निर्दोष मनूतय्त मचा अपहरण याः वःगु द्वपनय् म्वाःम्वाकं च्याकेगु ज्या जुया वयाच्वंगु खः । तर्राई लागाय् जक थुकथंया द्वपनय् १६ म्ह स्वयां अप्वः मनूतय्सं ज्यान वंकेमाःगु खः । तर तर्राई लागाया उगु ल्वय् आः गनं देय्या राजधानीइ जक थ्यंकः वःगु जक मखु ला धइगु न्ह्यसः नं थन ब्वलंगु दु ।

राजधानीया दकलय् लिपा ख्वपया घटनां थुकिया भयावह अवस्था ब्वलंका बिउगु दु ।

ख्वपया घटनायात बांलाक वाला स्वयेगु झवलय् मूलतः उगु घटना निगू पुचःया ल्वापुया उपज खः धइगु खँ स्पष्ट जुइधुंकूगु दु । अले निगू पुचःया दथुइ जूगु ल्वापुयात मेगु हे कथं छम्हेस्यां प्रचार यायेवं थुकथं गां हे दना वयाः द्वपं लानाच्वंपिंत दायेगु नं गुलि तक उचित धइगु न्ह्यसः नं थन ब्वलनावःगु दु ।

खतुं अपराधशास्त्रीतय् कथं सरकार व सुरक्षा निकाय प्रति जनतायाके गबलय् विश्वास दइ मखु अज्याःगु इलय् थज्याःगु घटना जुइगु खः । अले नेपाःया वर्तमानर् इयात दुवाला स्वयेगु खःसा नेपाःमि जनतां न त सरकारयात विश्वास याये फयाच्वंगु दु न सुरक्षा निकाययात विश्वास याये फयाच्वंगु दु । थथे जुयाच्वंगु मू कारण धइगु सरकारया असफल सुरक्षा नीति व सुरक्ष्ँा निकाय दुने ब्वलनाच्वंगु उदासिनता हे खः धायेत लिफः स्वयेमाःगु मदु । अझ गुलिखे मामलाय् ला स्वयम् सुरक्षाकर्मित हे थज्याःगु अपराधय् लिप्त जुयाच्वंगुलिं जनतां छुं नं घटनायात कयाः सुरक्षा निकाययात जानकारी बीगु स्वयां नं थःपिंसं हे कारवाही यायेत न्ह्यःचिउगु खः धइगु विश्लेषण समाजशास्त्री वा अपराधशास्त्रीतय् दु ।

थीथी थासय् ब्वलनावःगु थज्याःगु घटनां मानवीय संवेदनायात हे आघात याना बिउगु महसुस नं थौं आम र्सवसाधारण जनतां यायेमाःगु अवस्था ब्वलंगु दु । थौं यदि सुं छम्ह मचा तंगु खःसां नं आः उम्ह मचायात मानवीय भावना तयाः उद्धार यायेत तकं ग्यायेमाःगु अवस्था वःगु दु ।

अथे जुयाः सरकार व सम्बन्धित सुरक्षा निकायं आः थुकी थःगु सक्रियता क्यनेमाःगु आवश्यकता ब्वलंगु दु । मेखे जनतापाखंे थःगु साख तंकेधुंकूगु सुरक्षा निकायं नं थःगु अस्तित्व क्यनेगु खःसा थः दुने दुगु कमिकमजोरीत याकनं भिंकेमाःगु आवश्यकता दु ।

यदि थ्व क्रम इलय् दिके मफुत धाःसा भयावह रुप काइगु निश्चित दु । गथे थौं कलाःभाःत ल्वापु जूसां लँय् चक्काजाम जुइगु अवस्था ब्वलन थुकथं हे कन्हय् निम्ह तिपूया ल्वापुयात नं थथे हे अपराधया द्वपं बियाः सीगु स्यायेगु ज्या मजुइ धाये फुगु अवस्था मदु ।

मेखे राजधानीइ हे न्हिथं धइथें खुलेआम लुटे यायेगु ज्या नं तच्वया वनाच्वंगु दु । वंगु स्वन्हु न्ह्यः जक ज्याथा थेंज्याःगु येँया व्यस्त थासय् पेस्तोल क्यनाः लुटे याना यंकल । लछि ति न्ह्यः येँया हे बुरांख्यलय् नं थज्याःगु हे घटना जूगु खः । थ्व निगुलिं घटना प्रतिनिधिमूलक घटना जक खः । पिहां मवःगु थज्याःगु घटना आपालं दु । अथे खःसां सुरक्षा निकायं अज्याःपिं अपराधीतय्त ज्वनेगु वा कारवाही यायेफुगु अवस्था धाःसा आः तकं मवःनि ।

राजधानी थेंज्याःगु जनघनत्व अप्वः दुगु थासय् आपालं सुरक्षाकर्मीया उपस्थिति दुसां थुकथं न्हिनय् हे लुटे यायेगु ज्या जुइ धाःसा जनतां सुरक्षाकर्मीपाखें मेगु छु आशा यायेगु ?

खतुं राजधानीइ अपहरणय् लाःम्ह ख्याती श्रेष्ठया हत्या लिपा जनताया दथुइ ब्वलनाच्वंगु ग्याःचिकु व आक्रोशं नं र्सवसाधारण जनतां थःपिंत असुरक्षित व आक्रोशित महसुस यानाच्वंगुलिं नं मनू हे स्यायेगु थेंज्याःगु ज्या यायेत जनता न्ह्यज्याना च्वंगुया छगू नमुना थिमिइ जूगु घटना खः धायेत लिफः स्वयेमाःगु मदु ।

More Stories Like this