थ्व बाहेक जनतां याये फइगु छु दु ?

नर्मदेश्वर प्रधान

स्वनिगलय् मय्जु ख्यातीया निर्मम हत्या जुइ । घटना तसकं हे दुःखद् । भयावह । हत्यारा वीरेन श्रेष्ठ । ख्यातीया म्हयात ल्वाभलं कुचा कुचा थली । अपराध सुचुकेगु कुतः याइ । ख्यातीया अंगयात थाय् थासय् वांछ्वइ । दुःखद् घटना न्यने । पत्याः हे याये थाकुइ । मनू थुलि नीच जुइ फइला न्हृयसः दनी ।

जनता आक्रोशित जुइ । हत्यारा वीरेनया किपाः अखवारय् वइ । ब्वमिपिंसं वइगु किपातय् चक्कुं भ्वाःभ्वाः सुइ । थ्वयात लाफः पियाः स्यायेमाः । अचार थें नीमाः । जनतां तं प्वंकी । हत्यारायात मृत्युदण्ड बीमाः । र्सार्वजनिक रुपय् वयात कुचा कुचा थलेमाः । स्यायेमाः । हत्याया बदला हत्या हे जुइमाः । प्यखेरं प्रतिशोधया सः थ्वइ । मानव अधिकारवादीतसें धाइ 'मृत्युदण्ड निषेधित' । स्याइम्हेसित स्याये हे माः । थ्व नं मानव अधिकार खः । मानव अधिकारवादीतय्त हाँक वइ । मृत्युदण्डया पक्षय् जनमत खनेदइ । मृत्युदण्ड मनासिव जू वा मजू । व राष्ट्रिय बहसया विषय जुइ । तर थौं न्हृयसः जुइ ख्यातीया हत्यारायात उचित दण्ड बीमाः । धाँधली याये दइ मखु । जनतां सम्बन्धित पक्षयात ख्याच्वः बी ।

घटना क्वाइ । जनतां तं क्यनी । सरकारं सक्रियता क्यनी।इ वनी । घटना ख्वाउँइ । शिथिल जुइ । सु मचा गबलय् अपहरित जुइ । सुयात यंकाः पाली । स्याइ । दुःखद् सम्भावनात पलाः पलाखय् दइ । देशय् सरकारया न्हापांगु दायित्व शान्ति सुरक्षा जुइ । शान्ति सुरक्षाया प्रत्याभूतिं हे देशय् सरकार दुगु अनुभूति बी । दर्ुभाग्य । देशय् थौं शान्ति सुरक्षाया अनुभूति याये फइ मखु । अपराध अनियन्त्रित जुइ । जिउ ज्यान खतराय् लाइ । अनिश्चित जुइ । आतंकित जीवन हनेत जनता बाध्य जुइ ।

देशय् सरकार हिला च्वनी । थौं छगू सरकार । कन्हय् मेगु हे । स्वयात सरकार धायेगु । शान्ति सुरक्षा दइ मखु । सुयात दोष बीगु । नालायक सुयात धायेगु । छम्ह गृहमन्त्री जुइ । शान्ति सुरक्षा बी । विशेष ज्याझवः हये । धाक क्यनी । मन्त्रीं चब्बुइ । मेम्ह गृहमन्त्री वइ । वम्ह मन्त्रीं व हे धाँक त्वःती । फय्गं त्वःती । चम्बुम्ह आलोचक जुइ । देशया शान्ति सुरक्षा मदु । वं भरमार कुं खिनिं । शान्ति सुरक्षाया नामय् जुइगु खेलचक्र थ्वहे खः । अजिव तमाशा । जनता मुकदर्शक ।

शान्ति सुरक्षा कमजोर जुइ । अपराध अनियन्त्रित । सकस्यां मिखा पुलिसपाखे वनी । फुक्क कमजोर पुलिसया कारण जूगु खः । पुलिस प्रशासनयात दोष बी । गुलिसिया असक्षमता अर्कमन्यतां जनता भयावह स्थितिइ लाइ । छप्वाः म्हुतुं धाइ । खः । देशया शान्ति सुरक्षाया दायित्व पुलिसया । पुलिस अंग थुकिया जिम्मेवारी कायेमाः । टि.भी.या छगू ज्याझवः । अपराध वृद्धिया सर्न्दर्भ । पुलिसया छम्ह उच्चपदस्थ हाकिमलिसेया अन्तर्वार्ता । हाकिमं शान्ति सुरक्षाया खँय् थःगु कमजोरी स्वीकार याइ । निःसंकोच । वं धाइ । उपत्यकाय् जनसंख्या अन्धाधुन्ध वृद्धि जुइ । शहरीकरणं तीव्र गति काइ । अपराध असंख्यं वृद्धि जुइ । सुरक्षा व्यवस्थापन कठीन जुइ । तत्तुमत्तु तनी । जटिल जुइ । उकिया अनुपातय् पुलिस प्रशासन विकास जुइ फइ मखु । सिमित जनशक्ति । पुलांगु प्रविधि । अपर्याप्त वजेट । दक्ष जनशक्तिया संकट । खोजी अनुसन्धानया निंतिं गाडीत माः । तर अभाव । दुगु गाडीत स्यनी । दयेकेत वजेट दइ मखु । पेट्रोल चूलाकेत पर्याप्त ध्यबा मदु । सूचना आदान प्रदान यायेमाली । पुलिसं थःगु मोबाइल छ्यलेमाः । थुज्वःगु स्थितिइ पुलिस गय् प्रभावकारी जुइ फइ । दुगु सिमित स्रोत साधन छ्यला पुलिसं ज्या याइ । अर्कमन्यताया लागिं पुलिस पक्ष जक दोषी जुइ फइ मखु । प्रष्ट याइ । पुलिसया हाकिमया खँ न्यने । प्यखेरं अन्धकारं त्वपुना हइ । खिउँसे च्वनी । भिनी । बांलाइ । आशाया रेखा अन्धकारय् विलिन जुइ । मनोवल कुहां वइ । थ्व हे सर्न्दर्भ । अन्तर्वार्ताकारं अर्थ मन्त्रालयलिसे स्वापू तइ । पुलिस प्रशासन वजेटया म्होतिं प्रभावकारी जुइ मफुत । माःगु वजेटया व्यवस्था जुइमाल । जनताया शान्ति सुरक्षा निश्चित जुइमाल । जनतां दुःख सिल । न्हृयसः तइ । अर्थ मन्त्रालयया उपसचिवजु सहानुभूति क्यनी मखु । पुलिसया धापू स्वीकार याइ मखु । अपराध वृद्धिलिसे वजेट वृद्धि याना यंके सम्भव जुइ मखु । सरकार स्वयम्याके ध्यबा मदु । धाक्क ध्यबा बी फइ मखु । उपसचिवया लिसः न्यने । नुगः क्वतुनी । जनता सिनाच्वन । अपराधीतय्सं जनताया लाशय् ताण्डव नृत्य क्यनाच्वन । मस्तय्त अपहरण याइ । गःकी । देश आतंकीत । सम्बन्धित जिम्मेवार निकायतय् खँ न्यने । थःथःगु बचाउ । रक्षा । थःथःगु डम्फु थाइ । निर्धक्क ।

बागमतीइ फि लिकायेके बी मजिउ । पनेमाः । न्हृयसः जनचर्चाय् वइ । टिभीं थीथी सरोकारवालातय् ध्यानाकर्षा याइ । फि लिकायेगु ज्या पनेमाः । दवाव बी । जिम्मेवार कार्यालयलिसे स्वापू तइ । आर्श्चर्य । भवन विभागं गृह मन्त्रालययात चीकी । गृहमन्त्रालयं धाइ जिमिगु क्षेत्र मखु थ्व । स्थानीय विकास मन्त्रालयया ज्या खः । स्थानीय विकास मन्त्रालयं सिडिओ कार्यालयपाखे पतिं सुइ । सिडिओ नं नगरपालिकाय् क्यनी । निष्कर्ष। थ्व गुगु कार्यालय नं यानाः जीमखु । जनतायाके चेतना वयेमाः । होश वयेमाः । अले तिनि समाधान जुइ । जिम्मेवारी मनूतय्सं प्रशासनिक समाधानया खँ ल्हाइ मखु । जनताया चेतनाया खँ हइ । थःगु अर्कमन्यतां सुरक्षित जुइ ।

थौं देशय् हत्या हिंसा सामान्य जुइ । जिउ ज्यानया सुरक्षा दइ मखु । खुलेआम दन्डहिनतां । अपराधीतय् मनोवल थहाँवनी । जनता ग्लानी जुइ । जिम्मेवार निकायतसें दायित्व वं वयात वं वयात चीकी । सरकारया नियत जुइ । शान्ति सुरक्षा कायम यायेत । अपराध पनेतः सरकारं जक फइ मखु । खुँ, डाकु, ज्यानमारा, हत्यारा, गुण्डा, दादात फुकसिकें चेतना वयेमाः । गुखुन्हु उमिसं साधु सन्त, महन्तया जीवन हनी । शान्ति सुरक्षा स्वतः वइ । अपराध स्वतः नियन्त्रित जुइ । देश अले र्स्वर्ग जुइ । शान्ति सुरक्षाया नामय् जनतां व हे स्वर्गीक क्षण पीमाः । अन्तकाल तक हे पीमाः । थ्व बाहेक जनतां थौं याये फइगु छु दु ?

More Stories Like this