एमालेया पुलांगु ज्याझवः हानं
थौं राष्ट्रपतिपाखें नीति तथा कार्यक्रम
येँ / (सन्ध्या टाइम्स) राष्ट्रपति डा. रामवरण यादवं सदनय् थौं सरकारया नीति तथा कार्यक्रम ब्वनाः न्यंकीगु ज्याझवः दु । राष्ट्रपति डा. यादवं न्यंकेत्यंगु थ्वहे न्हापांगु नीति तथा कार्यक्रम खः ।
सूत्रतय्सं बिउगु जानकारी कथं थौं जारी याइगु नीति तथा कार्यक्रमय् एमालें थःपिंसं न्हापा गुला तक चले याःगु सरकारया पालय् हःगु लोकप्रिय कार्यक्रमत हे हानं लागू यायेगु खँ दुथ्याकातःगु दु । आफ्नो गाउँ आफै बनाउँ, ९ स सम्बन्धी कार्यक्रम, वृद्धभत्ता आदि अबलय् एमालें हःगु लोकप्रित कार्यक्रम खः । आः थुकियात हे सामान्य परिमार्जन यानाः लागू यायेगु योजना सरकारं दयेकूगु दु ।
तर्राईवासी व दलिततय् लागिं विशेष राहत प्याकेज हयेगु लिसें विश्वय् वयाच्वंगु पर्यावरणीय परिवर्तनया मुद्दाय् समेत थौंया नीति तथा कार्यक्रमं संवोधन याइगु खँ सूत्रं धाःगु दु ।
सरकारं ज्येष्ठ नागरिकया लागिं वृद्धाश्रम चायेकेगु नापं तर्राई लागाया छेँबुँ मदुपिं नागरिकतय् लागिं 'जनता आवास' धइगु नामं म्हो ध्यबां उपलब्ध जुइगु हाउजिङ्गया व्यवस्था नं यायेत्यंगु दु । अथे हे वृद्ध जुइधुंकूपिं लेखक कलाकारतय् लागिं नं बिस्कं आवासया व्यवस्था यायेगु खँ कार्यक्रमय् वइ धाःगु दु ।
देशय् अप्वयाच्वंगु अशान्ति व अराजकतायात नियन्त्रण यायेगु लागिं शान्ति सुरक्षा सम्बन्धी छगू बिस्कं नारा हे बियाः शान्ति अभियान न्ह्याकेगु खँ नं कार्यक्रमय् उल्लेख जुयाच्वंगु जानकारी सूत्रं बिउगु दु ।
नीति तथा कार्यक्रमय् ठोस ज्या सिबें लोकंह्वाःगु ज्याखँत अप्वः दुथ्याइगु जानकारी नं सूत्रं बिउगु दु ।
माओवादीया सांकेतिक विरोध राष्ट्रपति डा. रामवरण यादवं थौं न्हापांखुसी नीति तथा कार्यक्रम पेश यानादीत्यंगु दुसा वय्कःया न्हापांगु नीति तथा कार्यक्रमयात माओवादीं सांकेतिक रुपं विरोध यायेत्यंगु दु । नीति तथा कार्यक्रमया प्रस्तुतीइ हे विरोध जूगु नं थ्व न्हापांखुसी हे खः । माओवादी सूत्रं धाः कथं थौं सदनय् माओवादीया नेतात सुं हे च्वनी मखु । कनिष्ठपिं छुं सभासदतय्त छ्वयाः नेतातय्सं राष्ट्रपतियात बहिष्कार याइगु खँ धाःगु दु ।
