कोटेश्वरय् प्रहरीलिसे ल्वापु
थिमिइ सीपिं विद्यार्थीया छेँजःपाखें धर्ना
येँ / (सन्ध्या टाइम्स) थिमिइ म्हिगः मचा अपहरण याःगु द्वपनय् स्थानीय वासिन्दां दायाः स्याना बिउपिं विद्यार्थीतय् छेँजः व उपिं ब्वनीगु विद्यालयया विद्यार्थीतय्सं थौं कोटेश्वर, गठ्ठाघर, पेप्सी कोला लागाय् प्रदर्शन यानाः यातायात ठप्प याना बिउगु दु ।
मध्यपुर थिमि नपाया धुँचेपाखा धाःथाय् मचा अपहरण याः वःपिं धकाः लितुमतु लिनाः दायाः स्याःपिं थ्व निम्ह मध्यय् छम्ह स्थानीय आदर्श उच्चमाविइ १२ कक्षाय् ब्वनीम्ह विद्यार्थी सबिन क्षेत्री खः धकाः सीदुगु दु । अथे हे मेम्ह जीवन थापामगर खः । थुपिं खास यानाः धुँचेपाखाया स्थानीय ल्याय्म्हतलिसे ग्याङ फाइट यायेत वःपिं खःसा ल्वापुया झ्वलय् उमित धुँचेपाखांनिसें लिना हःगु खः । तर लिना हहं हे लिनाच्वंपिंसं थुपिं मचा अपहरण याः वःपिं खः धकाः हल्ला याना बीवं थिमिया चपाचोय् च्वंपिं मेपिं मनूतय्सं समेत उमित ज्वनाः दाये फक्व दाःगु खः ।
थ्व पुचलय् न्हय्म्ह मनू दुगु खःसां बिसिउँ वंबलय् स्वम्ह छथाय् व प्यम्ह छथाय् लाःगु खः । उकी मध्यय् प्यम्हेसिया पुचःयात थिमिइ दाःगु खः । प्यम्ह मध्यय् निम्ह सीगु खःसा निम्हेसित अस्पतालय् तयाः वासः याका तःगु दनि ।
मखुपिं मनूतय्त अपहरणकारी धकाः स्याना बिल धासें थौं आदर्श उमाविया विद्यार्थीतय्सं कोटेश्वरय् बन्द याः वःगु खः । उमिसं कोटेश्वर प्रहरी चौकीइ धर्ना बिसें तुरुन्त अपराधीतय्त ज्वने माल धकाः दवाव बिउगु खः । उगु भीडयात चीकेत स्वःबलय् अन निगू पक्ष दथुइ ल्वापु नं जूगु दु । ल्वापुइ प्रहरीं लाठीचार्ज याःबलय् छुं प्रदर्शनकारीत घाःपाः जूगु दुसा प्रदर्शनकारीपाखें याःगु प्रतिकारय् लानाः छम्ह सई समेत न्याम्ह प्रहरी नं घाःपाः जूगु दु ।
प्रदर्शन तच्वया वनाच्वंगु हे झ्वलय् प्रहरीं म्हिगःया घटनाय् ल्हाः दुपिं मनूतय्त मालेगु ज्या नं तीव्र याना हःगु दु । प्रहरीं बिउगु जानकारी कथं प्रहरीं आः तक १५ म्ह मनूयात ज्वनेधुंकूगु दु ।
कोटेश्वरय् जुयाच्वंगु झडप व प्रदर्शनं यानाः उगु लागाय् यातायात अवरुद्ध जुयाच्वंगु जक मखु अतिकं तनावग्रस्त नं जुयाच्वंगु दु । गाडी वये वने मजुयाः येँ-ख्वप यातायात बन्द जुयाच्वंगु दुसा दोल्खा बाह्रबिसे तापाक जुइगु यातायात नं लँय् लँय् हे थानाच्वंगु दु ।
