प्रचण्ड हे न्हाप लात का !

निर्मल वज्राचार्य

जिमि चीधिम्ह म्ह्याचं स्कूल वनेगु ज्या अवरुद्ध यात । नकतिनि प्यदँ जक दुम्हेस्यां । कारण छु धायेबलय् 'व मचाया मांया छम्हयां छम्ह जक पतिं वयात फ्यतुइक दयेका बिल हं ।' सत्य सत्य धरोधर्म त्वहः थुलि हे जक खः, मचा स्कूल वने हे मखु हं, छन्हु जक खःला गबलें हे वने मखु हं । ख्याः यानाः धाःगु धकाः च्वनां ला मखु खनिं का ! प्यपां चुइक दःगुया कन्हय् कुन्हु हे स्कूल व हे मवन । अवरुद्ध यात । प्यदँ जक दुम्ह मचां स्कूल वनेगु ज्याय् अवरुद्ध याःगु खनाः जि छखे अजू चाःसा मेखे दुःख नं ताः । जिगु कारणं व स्कूल मवन न्ह्याक्व ह्ययेकूसां मजिउ । ह्ययेकू लिसे झन सदांया निंतिं स्कूलय् वने मखु धकाः धम्की बिल बाः । जि हीमी चाल । ब्वः बिउसां मजिउ हय्येकूसां मजिउ । न्ह्याग्गु याःसां मजिउ । छगू हे अडान स्कूल वने हे मखु ।

जिमि म्ह्याय् वया मांया 'पति' या दथुइ खास तःधंगु खँ छुं हे जूगु मखु । म्ह्याय्यात 'तसकं स्याक्क' हे दयेका बिल, व नं दयेके धकाः हे दयेका बिल धकाः जितः ब्वः बियाच्वंगु दु । उलि जक ला, जिमि म्ह्याचं वयात दयेका बिउगु खँ वया मांयात ला धाइगु जुल, जिमि दाजुयात नं कनाबिल, दाजुया कलाः व काययात वं कनाबिल ।, वया हे थः ततायात कनाबिल, वया तताया निम्ह निम्ह निनिपिंत नं कनाबिल, निनियात जक खःला वया निनिया मांयात तकं 'बढे चढे' यानाः कना जुल । जिमि जःलाखःलायात नं कनाजुल । दक्व जानाः दः ब्वः बीगुयात । 'छं म्ह्याय् छम्हेसित हे म्हालासाला यानातये मसःला ? आः ला फ्यतुइक जक दल, लिपा छ्यनं चुइक दल कि छु यायेगु ?' दक्वस्यां जितः हे पाः यात । 'छं यानाः छिमि चीधिकःम्ह म्ह्याय् स्कूल मवन, स्कूल वनेगु ज्याय् अवरुद्ध यात आः छं हे वयात स्कूल छ्वयेगु वातावरण दयेकि ।' छु यायेगु का.....म्ह्याय् स्कूल मवंगु नं तःन्हु मछि हे दयेधुंकल । छकः निकः मुलय् तयाः बांलाक हय्येकलकि स्कूल वने थें खँ ल्हाइ, लिपा छथुं छु जुइगु खः मसिउ तुरुन्त हे जि स्कूल वने हे मखु धइगु मताःला छं' धकाः कुतिं न्याः वइगु । खँ छु धाःसा वया निनिं वया चीधिकःम्ह भिन्चा उर्फजिमि चीधिकःम्ह म्ह्याय् यात हनुमानध्वाखा चाःहीइका हजि धाल । आज्ञा पालन यासें २-२ घण्टा मछि चाःहीका । ससेज नका । भेज ममः नका । झिर्का वंगु बेलुन न्याना बिया । चाःहिलेधुंकाः छेँय् वया । क्वथाया लुखाय् च्वंगु डोरम्याटय् लाकां त्वयेगु झवलय् 'ब्यालेन्स' मिले मजुयाः थःथम्हं प्यनं चुइक दल । भचा लिपा ह्वाँय् ह्वाँय् ख्वया हल 'बाबां यानाः दःगु ला खः नि, बाबां जितः दयेका बिउगु ला खः नि, आः जि स्कूलय् हे वने मखु......' थय्क स्वया गनं जिं हे जकं दयेकाबियागु खः ला - फ्यतुइक दयेकागु ला मखु । थः हे म्ह्याय्यात नं स्वस्व खंक दयेकी ला ? चान्स हे मरु ।

जि व जिमि म्ह्याय् दथुइ जिगु मुलय् च्वनाः ग्वःगू चरणया वार्ता जुल, दक्वं लिपा वनाः भंग जुइगु । स्कूल वनेगु ला खँ हे मल्हाः । खालि छता हे खँ जक लिसा कयाः धयाच्वनीगु 'बाबां छाय् दयेका बियागु - जि आः गबलें नं स्कूल वने मखु ।' थ्व खँ न्यँन्यं जि छखे दंग जुया आखिर जिमि म्ह्याय् नं प्रचण्ड सिबें कम मजू खनिंका छाय् धाःसां जिमि म्ह्याचं वयात दयेका बिउगुलिं स्कूल वनेगु अवरुद्ध यायेगु अडान व प्रचण्डया राष्ट्रपति नागरिक सर्वोच्चता हनन याःगुलिं संसद अवरुद्ध यायेगु अडानय् हाम्वः ग्वःछि हे पाःगु मखना । प्रचण्ड पाखें संसद अवरुद्ध जू थें जिमि म्ह्याय्पाखें स्कूल वनेगु अवरुद्ध जुयाच्वंगु दु । आः थुलि हे स्वये ल्यं दनि कि अवरुद्ध मयायेगु ज्याय् प्रचण्ड न्हापा लाइ ला वा जिमि चीधिकःम्ह म्ह्याय् न्हापा लाइ । बाप रे ! प्रचण्ड हे न्हाप लात । म्हिगःनिसें अवरुद्ध संसद खुले जुल । न्ह्याबलें प्रचण्डं जक जिमि म्ह्याय्पाखें गुलि प्रेरणा कायेगु ? आः जिमि म्ह्याचं नं प्रचण्डपाखें छुं प्रेरणा कयाः स्कूल अवरुद्ध त्वाःथलीगु खःला ?

More Stories Like this