जनतायात राहत ग्व ?

कृष्ण प्रजापित

देशय् न्हय्गू राजनीतिक दल व माओवादी जानाः याःगु आन्दोलनं गणतन्त्र नं वल । संविधानसभाया चुनाव नं क्वचाल । जनयुद्ध मार्फत सत्ताय् वःगु माओवादीं गुला तक शासन नं यात । तर आखिर नेपाली जनतायात छु दत ? थौं तक नेपाली जनतायात राहत चूलाःगु अनुभूति मजूनि । आर्थिक परिवर्तन मजुइकं वा राज्ययाके हे फुक्कं अर्थ ब्यवस्थापन यायेगु ह्वःताः चूमलाकं वास्तवय् जनतायात राहत चूमलाइगु हे जुयाच्वन । नेपाली जनतां थःगु हक अधिकार चूलाकेगु निंतिं बारम्बार आन्दोलन यात । तर उकिया फाइदा धाःसा छपुचः सम्भ्रान्त वर्गं हे जक काल । २००७ सालया क्रान्तिं राणा शासन अन्त नं जूगु खः तर उगु इलय् नं राणा प्रधानमन्त्री मोहन शमशेरया नेतृत्वय् हे न्हूगु सरकार नीस्वन । वयां लिपा तिनि आन्दोलनकारी नेपाली कांग्रेसया नेतृत्वय् सरकार स्वन । आः नं अथे हे आन्दोलनकारी शक्तिया ल्हातय् सिबें मेपिनि ल्हातिइ सत्ता लानाच्वंगु दु ।

म्हिगः आन्दोलनय् संलग्न न्हय्गू राजनीतिक दल थौं अन लाः थन लाः मदयाच्वंगु दु । थीथी कथं चुनाव त्याका वःगु नीन्यागू दलं नं सरकारयात कजे याये मफु । सरकार सदन प्रति जवाफदेही जुइ धाःसां थौं सदन हे चले याये मफयाच्वंगु कारणं सरकारया नीति तथा कार्यक्रम तकं अन लाः थन लाः मदयाच्वंगु दु । नीति तथा कार्यक्रमया आधारय् हे तयार यायेमाःगु राज्यया बजेट तकं ठेगान मदयाच्वंगु दुसा उकिं यानाः कर्मचारीतय् तलब ब्यवस्थाय् तकं लिच्वः लाइगु अनुमान यानाहःगु दु । थज्याःगु हे इलय् राजनीतिक पार्टीतय् दथुइ अस्वस्थ प्रतिस्पर्धा व खिंचातानी अप्वयाच्वंगु दुसा मेखे सरकारय् हे संलग्न निगू राजनीतिक पार्टीया विद्यार्थी संगठन दथुइ थवंथः ल्वापु जुयाः गोली समेत चले यायेगु ज्या जूगु दु । न्याक्वः तक मन्त्रीमण्डल विस्तार यानाः नं पूवंकेमफुगु थुगु सरकारं नेपाली जनतायात राहत चूलाकी धकाः आशा यायेगु थाय् म्हो हे जक दु ।

गुला तक सरकारय् संलग्न जुयाः नं माओवादीं जनताया हितय् ज्या याये मफुत । जनयुद्धया भावना कथं ज्या यायेमाःगु एकीकृत माओवादीं आः वयाः थःपिं सरकारय् च्वनागु इलय् देश व जनताया लागिं छुं नं ज्या याये मफयागु खँ स्वीकार यायेधुंकूगु दु । आः नकतिनि हे जक चितवनया शिवनगरय् माओवादी अध्यक्ष प्रचण्डं थःगु नेतृत्वया गुलाया सरकारं नं देश व जनताया लागिं छुं याये मफुगु स्वीकार यानादीगु खः । थथे धायेबलय् देश व जनताया सेवा यायेगु ताः तयाः युद्ध याईपं आन्दोलन याईपं व सशस्त्र संघर्षय् संलग्न जुईपंसं हे जनतायात सेवा भावं ज्याखँ याये मफइगु जुल धाःसा सुनां जनताया सेवा याये फइ सत्ताय् मवंतले थ्व याये व याये धाःसां आखिर सत्ताय् थ्यनेवं हे राजनीतिक पार्टीया विचार व चिन्तन पाना वनीगु बांमलाःगु चरित्र म्हिगः थें थौं नं नेपाःया राजनीतिक पार्टीतय्के ल्यं हे दनि । नेपाली कांग्रेस प्रजापरिषद वा तत्कालिन राष्ट्रिय कांग्रेसया सोच व विचार नं उकथं हे विदेशीया न्ह्यःने भ्रष्ट जूवंगुलिं नं विदेशीतय् यःम्ह मनू थनया सरकार प्रमुख जुइ फइगु परिपाटी विकास जुया वयाच्वंगु खः ।

माओवादी सत्तां गथे देश व जनताया सेवा याये मफुगु खः धकाः स्वीकार याःगु खः आः न्हूगु नीस्वंगु माधव नेपालया सरकारं नं खास हे ग्यसुलाक ज्या यायेफइगु छाँट मदुनि । थन हाकनं माओवादीया हे न्हूगु सरकार नीस्वनेगु कासा दुनं दुनं शुरु जुइधुंकूगु दुसा माओवादी नेता डा. बाबुराम भट्टराईनं ला माओवादीया हे नेतृत्वय् राष्ट्रिय सरकार दयेकेमाःगु खँय् हे बः बियादीगु दु । थथे बारम्बार सरकार परिवर्तन जुयाच्वनीगु धइगु राज्यया लागिं छगू तःधंगु भार खःसा नेपाली जनताया हीत सोचे याये मफयेकेगु दाउ नं जूवनेफु । खालि सरकार परिवर्तनय् अलमल यानाः मू उद्देश्य हे अन लाः थन लाः मदइगु जकं खः ला धइगु शंका लगे जूवःगु दु । देशय् न्ह्यागु हे सरकार वःसां न्हूगु संविधान व शान्ति सुरक्षा मू विषय जुयाच्वंगु दु । तर अस्थिर सरकार कायम जुयाच्वंगु घडिइ लाकाः थन बारम्बार लुट अपहरण हत्या व बेपत्ता यायेगु कासात धमाधम अप्वया वनाच्वंगु दु । सुथय् स्कूल वंम्ह मचा बहनी सुरक्षित छेँय् लिथ्यनीगु खः कि मखु अभिभावकं चिन्ता काये मालाच्वंगु दु । बन्द हडताल आकाझाकां घोषणा यानाः तोडफोड मार्फत थःपिनि बन्द सफल यायेत स्वइगुलिं यानाः मस्त स्कूल कलेज वनेगु माने मजुइगु स्थितिइ लानाच्वंगु दु । आपालं शैक्षिक संस्था बन्द जूवनीगुया लिच्वः थौं स्वयां नं न्यय्दँ लिपा लाइगु खः ।

मनूतय्त आधारभूत आवश्यकता नयेगु त्वनेगु पुनेगु बांलाक चूलाके मफुतले मेगु बिचाः यायेगु हे बेकार खः । शिक्षा स्वास्थ्य व रोजगारी थेंज्याःगु जीवन निर्वाह यायेत अःपुकीगु चीजय् सरकारी स्तरं बिचाः मयाःतले जीवनस्तर थहां वइगु छुं हे सम्भावना मदु । अथे जुयाः नं नेपाली जनतायात राहत चूलाकेगु खःसा सरकारं न्हापां गरीब व लिपा लाःपिं वर्गया उत्थानया ज्याझ्वः पित बीमाःगु खनेदु । मखुत धाःसा म्हिगः गथे नेपाली कांग्रेस व एमालें सत्ता चले यानाः नं नेपाली जनता सदां द्यापं लाःगु अनुभूति जुयाच्वंगु खः । थौं गणतान्त्रिक सरकारय् न्हापांखुसी नेपाली कांग्रेस व एमाले वनाः नं अज्याःगु हे दुर्भाग्य भोगे याये मालाच्वनेफु । प्रचण्डया सरकारय् खुगू राजनीतिक दल जक दुथ्याःगु खः । तर आःया सरकारय् थप राजनीतिक दलतय्सं थःपिनि अंश मालाच्वंगु इलय् हे सरकार क्वःथलेगु चाल शुरु जूगु नं अनुभूति जुयावःगु दु । तर सरकार परिवर्तन जुयां नेपाली जनतायात राहत चूलाइगु धाःसा मखु । ज्या यानाः नयेमाःपिं मजदूर किसानतय्गु निंतिं राहत बीगु खःसा नये त्वनेगु व रोजगारीया ग्यारेन्टी यायेमाः । अले हे जक देशय् धाथें परिवर्तन वःगु महसुस जुइ । मखुसा न्ह्याम्ह हे जोगी वःसां न्हाय्पं चिरिबाःपिं जक जुइ ।

More Stories Like this