देश विदेशय् प्रतिभा थ्यंम्ह राधेश्याम

कृष्ण

नेपालय् दयेकूगु सिँया थीथी सामग्रीत जर्मनी लगायत विश्वया थीथी थासय् थ्यं धायेबलय् पत्याः यायेत थाकुइफु । तर ख्वपया राधेश्याम शिल्पकारं तःदँ न्ह्यःनिसें हे थज्याःगु ज्या यानाच्वनादीगु दु । वय्कः २०१६ सालपाखे ख्वपया खौमा त्वालय् बूम्ह खः । थः अबु कृष्ण शिल्पकार नं उलि हे च्वन्ह्याःम्ह शिल्पकार जूगु कारणं वय्कःयात थःगु छेँय् हे च्वनाः थीथी कथंया सिँया सामग्री दयेकेगु ह्वःताः चूलात । मां विश्वलक्ष्मी व अबु कृष्ण शिल्पकारया काय राधेश्याम शिल्पकारं न्हापा न्हापा ला दराज, झयाः नापं थीथी कथंया छेँयात माःगु फर्निचर सामग्री जक दयेकूगु खः । आः धाःसा वय्कलं द्यःया मूर्ति, त्वनासिँ, गणेद्यःया मूर्ति नापं विश्व विख्यात ख्वपया म्हय्खाझयाः तकं तयार यानाः मीगु ज्या यानाच्वनादीगु दु । ख्वपय् तसकं दुर्लभ बुट्टाया ज्या सःपिं सिँकःमित मध्यय् वय्कः छम्ह नं खः गुम्हेसियां देश विदेशय् तकं थःगु सीप प्रदर्शन व मीगु ज्या नं यानादीगु खः । राधेश्याम शिल्पकार, इन्द्रकाजी शिल्पकार व सीताराम शिल्पकार धायेवं ख्वपय् बुट्टाज्या सःपिं हस्ती हे कथं नांजाः ।

राधेश्यामया अप्वः धइथें बुट्टेदार निर्माणत जर्मनीइ थ्यनाच्वंगु दु । अन वय्कःया अलग्ग हे छगू स्थायी संग्रहालय नं दु । पूर्व जर्मनीइ तयातःगु उगु सिँया सामग्री जकया स्थायी संग्रहालयय् नेपाल स्थलय् लानाच्वंगु म्हय्खाझयाः व च्यासिंमण्डप वय्कलं तयार यानादीगु खः । छम्ह नर्टकी देवीया सिँया मूर्ति वय्कःया पासा इन्द्रकाजी शिल्पकारं तयार यानादीगु खः । नापं यलया छम्ह शिल्पकारं तयार यानादीगु ३२ ताराया मर्ूर्ति नं अन स्थायी रुपं ब्वयातःगु दु । उगु संग्रहालयय् दुहां वनेत टिकट कायेगु इलय् हे छगः एयर फोन नं बिया छ्वइ । दुने दुहां वनेगु इलय् थः यःगु सामानया बारे सीकेत अन तिकातःगु कोड नम्बर तीवं उगु सामग्री छु खः, उकिया कलाकारया नां छु खः व उगु सामान गुलि दां तूगु धइगुनिसें कयाः कलाकारया सामान्य बायोडाटा हे कम्प्यूटर प्रविधिं न्यंकी । राधेश्यामया बारे नं अथेहे जर्मनीइ छगू बायोडाटा तयार जुयाच्वंगु दु । थः अबु कृष्ण शिल्पकार बुट्टाज्या उलि मसःगु कारणं थः पासा इन्द्रकाजीया अबु इन्द्रबहादुर शिल्पकारयाके वय्कलं बुट्टाज्या सयेकादीगु खः । लिपा उगु इलय् जर्मन विकास परियोजनां ख्वपय् थीथी निर्माण ज्या न्ह्याकूगु इलय् बुट्टा ज्याय् संलग्न जुयाः वय्कलं थःगु प्रतिभायात भरपूर रुपं छ्यलेगु ज्या यानादीगु खः ।

आः नं जर्मनी नापं थीथी थासय् वय्कलं तयार यानातःगु सामग्रीत थ्यं । न्हापां तचपाः त्वाःया छगू मठय् थःगु याकःचिया सिँया बुट्टाज्या सम्बन्धी प्रदर्शनी यानाः म्हसीका न्ह्यब्वयादीम्ह राधेश्याम शिल्पकारं आः तक दर्जनौं न्हूपिं मस्तय्त नं थुगु बुट्टाज्या स्यनादीगु दु । नापं थःम्हेस्यां स्यना सयेकूपिं मस्तय्सं आः कारखाना हे चायेकाः थुगु लजगाः यानाच्वंगु नं वयकलं कनादिल । नेपालय् ब्वज्या यायेधुंकाः जर्मनीया थीथी खुगू शहरय् खुथाय् वय्कलं रविन्द्र पुरी, इन्द्रकाजी शिल्पकारपिं नापं वनाः सिँया सामाग्री हे ज्वनाः वना नं ब्वज्याय् सहभागी जुयादीगु दु । थ्व नेपाल भ्रमण वर्ष२०५८ सालपाखेया खँ खः । पिने स्वापू दुपिंसं बुट्टाज्यां अःपुक यक्व दां नं कमे यानाच्वंगु, मखुसा ला थन न्ह्याक्व हे बांलाक सामान दयेकूसां घारघुर दयेकीपिंसं थें यक्व कमे याये थाकुयाच्वंगु खँ राधेश्याम शिल्पकारं कनादिल ।

More Stories Like this