थुगुसीया एसएलसी व मांभासं शिक्षा

सुनिता मानन्धर

जगत सुन्दर ब्वनेकुथिया ब्वँमिपिंसं थुगुसी दकलय् न्हापां एसएलसी ब्वति काःगु खः । थुगुसी ब्वनेकुथिपाखें एसएलसी ब्वति काःपिं मुक्कं झिंस्वम्ह ब्वँमि मध्ये राजन श्रेष्ठ, अक्षय मानन्धर, रज्जु महर्जन, अनिता चित्रकार, विपिशना श्रेष्ठ व मेरिना स्थापितं विशिष्ट श्रेणी हःगु खः ।

मचांनिसें मांभासं आखः ब्वनाः एसएलसी ब्वति कयागु इलय् गुलि थाकुल धइगु लिसलय् ८४.१२५ प्रतिशत हयाः विशिष्ट श्रेणी पास जूम्ह अनिता चित्रकारं धयादिल एसएलसी जाँच गुलि थाकुइ धकाः बिचाः यानागु खः उलि थाकु मजू खनी । न्हियान्हिथं बांलाक कुतः याःसां अःपुक हे बांलागु लिच्वः वइ । थुकी न्ह्यागु भाषं ब्वंसां छुं पनीमखु । अथे हे अक्षय मानन्धर व विपिसना श्रेष्ठ थःपि न्हापा हे विशिष्ट श्रेणी हये फइ धइगु खँय् ढुक्क जूगु खँ कनादिल । मेम्ह विशिष्ट श्रेणी हःम्ह मेरिना स्थापितं थःम्ह ब्वनेकुथि दुने जाँच बियागु स्वयाः एसएलसी जाँच बियागु इलय् अःपु ताःगु खँ प्वंकादिल । राजन श्रेष्ठं थः विशिष्ठ श्रेणी वइ कि मवइ धकाः ग्याःगु बिचाः नं प्वंकादिल । राजन श्रेष्ठं थः विशिष्ट श्रेणी वइ धइगु विश्वास दुगु खःसां एसएलसी न्ह्यागु जुइफु धाःगु खँ न्यानागुलिं थः विशिष्ट श्रेणी वइ कि मवइ धका ग्याःगु बिचाः नं प्वंकादिल । अथे हे थः विशिष्ट श्रेणीं पास जूगुलि रज्जु महर्जनं अतिकं लय्ताःगु खँ कनादिल । न्हापांगु श्रेणीं पास जूम्ह सजीव श्रेष्ठं थः छुं भचा जक ल्याः म्हो जूगुलिं विशिष्ठ श्रेणी मवःगुलि दुःख तायेकादिल ।

थुगुसी ब्वनेकुथिपाखें एसएलसी ब्वति काःपिं सकलें प्राथमिक तह निसें ब्वनेकुथि मांभाय् माध्यमं आखः ब्वनावःपिं खः । मांभाषं आखः ब्वना एसएलसी ब्वने फइ धइगु विश्वास दु ला धइगु लिसलय् विशिष्ट श्रेणी हम्ह विपिशना श्रेष्ठं धयादिल ब्वनेकुथि ब्वनेगु सफू दक्व हे सत्याल पब्लिकेशन व एकता बुक्स पब्लिकेशनया (अंग्रेजी भाय्या) खः । थुकी मथूगु भचा नेपालभाषां थुइका बीसा मेगु दक्व हे अंग्रेजी भाषं ब्वने च्वयेगु याइ । अंग्रेजी भाषं ब्वनाः एसएलसी नं अंग्रेजी भाषं हे च्वयेगुलिं छुं थाकु मजू ।

थुगुसी दकलय् न्हापा एसएलसी ब्वति काःगु खःसा थुगु ब्वनेकुथिइ लिच्वः अतिकं बांलाःगु खनेदु । न्हापां एसएलसी ब्वति कयाः बांलागु लिच्वः वःगु खँय् ब्वनेकुथिया प्रिसिपल माया मानन्धरं धयादिल थ्यंमथ्यं ५० प्रतिशत ब्वमिपिंसं विशिष्ट श्रेणी पास जुइगु धइगु अतिकं बांलागु नापं लय्ताःगु खँ खः । थ्व ब्वनेकुथिया लागिं जक गर्वया खँ मखुसें सकलें नेवाःतय्गु लागिं नं लय्ताया खँ खः । थुकथं न्ह्यइपुगु लिच्वः हयेया लागिं ब्वनेकुथिया स्यनामिपिं नापं ब्वनेकुथिया सकल जः दुजःपिंसं आपालं कुतः नं यानादीगु दु ।'

अथे ला ने.सं. ११२७ निसें थुगु ब्वनेकुथि प्याब्सनय दुजः नं जूगु खः । जाँच कायेगु इलय् तगिं न्हय्गु तक ब्वनेकुथिया न्ह्यसः पौ बीगु याइसा च्यागू तगिंया लागिं जिल्ला शिक्षा कार्यालयपाखें वःगु न्ह्यसःपौ बी । अथे हे तगिं गुगु वं झिगूया लागिं प्याब्सनया न्ह्यसःपौ पाखे जाँच कायेगु याना वयाच्वंगु दु । न्ह्याथे जाः कथंया न्ह्यसःपौ जूसां ब्वमिपिसं बांलाक हे लिच्वः हयाच्वंगु खनेदु ।

न्हापांगु दँय् एसएलसी ब्वति काःगुलिइ थुकथं उत्साह पर्वक लिच्वः हइ धइगु विश्वास गुलि तक दु धइगु न्ह्यसःया पिलसलय् स्यनामि राजेश महर्जन धयादी, न्हापांगु दँ जूगुलिं बांलागु लिच्वः अप्वयेमा धइगु आशा याना कुतः यानागु खः । थुकि जिमिसं जक मखु ब्वमिपिंसं नं उलि हे कुतः याःगु दु । जिमिसं नं न्याम्ह खुम्ह ला विशिष्ट श्रेणी वइ धकाः मनतुनागु खः । मनंतुना थें हे लिच्वः पिहां वल तसकं न्ह्यइपुसे च्वन ।

थुगुसी न्हापागु श्रेणी एसएलसी पास जूम्ह अनिल शाक्यं धयादी जि यदि मेगु ब्वनेकुथिपाखें एसएलसी बिउगु जूसा सायद फेल जुइफु । टेष्ट जाँचयार् इ तक नं जि भचा कमजोर हे तिनि । अनं लिपा जितः ब्वनेकुथिया स्यनामि व पासापिंस अतिक हे ग्वाहालि यानदिल । जिं बांलाक जाँच बिया बांलागु लिच्वः हये फइ धइगु विश्वास न ब्वलंका बिल । जि नं ब्वनेकुथिपाखें न्हापांगु पुचलय् एसएलसी जाँच बियाः न्हापांगु श्रेणी पास जूगुलिं तसकं लय्ताः ।

ने.सं. ११२५ तक न्हय्गु तगिं तक जक न्ह्यानाच्वंगु थुगु ब्वनेकुथिइ ने.सं. ११२६ निसे च्यागू तगिं दुगु खः । अनंलि गुगू व तगिं झिगू यानाः थुगुसी न्हापांगुखुसी एसएलसी ब्वति काःगु खः । दकलय् न्हापां च्यागू तगिं दुगु इलय् तगिं न्ह्यगुलिं पास जूपिं मुक्कं नीछम्ह ब्वँमि दुगु खः । उगु इलय् नेपालभाषाया माध्यमं आखः ब्वना च्यागू तगिंया जिल्ला शिक्षा कार्यालय् पाखें वइगु न्ह्यसः पौलय् बांलाक जाँच बी फइ मखु धइगु ग्याचिकु पहः दुपिं सकलें हामापिंसं थः मस्तय्त ब्वनेकुथि लिकया मेमेगु ब्वनेकुथि ब्वंके यंकुगु खः । थौं थुगु ब्वनेकुथिया ब्वमिपिसं मांभाय्या माध्यमं आखः ब्वंसां सुं स्वयाः म्हो मजू धइगु खँ प्रमाणित याना बिउगु दु । थौं गुलि नं मस्तय्त आखः ब्वकी सकसियां मू आज्जु धइगु एसएलसी विशिष्ट श्रेणी हयेगु व एसएलसी बांलागु लिच्वः हयाः पास जुइगु हे खः । यदि मांभाय्या माध्यमं आखः ब्वनाः नं थःगु लक्ष्यय् थ्यंसा मेमेगु भासं छाय् ब्वनेगु ?

लुमंकेबहः जू ने.सं. ११११ य् दकलय् न्हापा नेपालभाषाया माध्यमं आखः ब्वंकेया लागि निजीस्तरं हे थुगु ब्वनेकुथि नीस्वंगु खः ।

Related Stories

एसएलसीइ नेपालभाषा विषययात लापरवाही
नेपालभाषा कयाः एसएलसी ब्यूपिं शत प्रतिशत उतिर्ण

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया