मोतिबय् तःजि मोतिलक्ष्मी

छन्द : मालिनी
छुमां : ।।। ।।। द्रद्रद्र ।द्रद्र ।द्रद्र

सतछि दँ हन्य भाग्यं दैगु झीसं थुजाम्ह
गन दइ थन मेपिं मोतिलक्ष्मी समान

लिलि जक चिलिपिं नेवाः मिसापिं सकेस्त
सरस च्वसु च्वया नं प्रेरणा गाक्क ब्यूम्ह
कवि 'ह्दय' लिसें तुं कर्मयोगय्१ दुनीम्ह
गुलि सल उलि हे झं नाइकाः सः नँ त्वीम्ह

मदु 'जि' व 'जिगु'या च्याः२ बौद्ध आदर्श ल्यूम्ह
गृहि विनय ब्वना थें शीलया मू च्वछाःम्ह
सिचुगु वचनया लं 'चित्त'या क्लेश३ पूम्ह
सुगत नियमया खँय् दाजु बय् म्हो मजूम्ह

जतन जुगति यायां मुंगु सर्बय् प्रदान
सुरक्षिँत जुइ भाःपाः यात संस्थाय्४ विशेषं
सफुलि, लुँ-म्वह, चित्र, ग्रन्थ, पौभाः, च्वना-छेँ
सतत बुँ५ बिल माको दयेकि धाधां दबू छेँ

अनवरत सु-सेवां, गय् मचायात मामं
अबुजु सम गुम्हेस्यां दाजु भाःपाः च्वनीम्ह
जुल अमर निम्हं झी मातृभाषा प्रतीक
जुइ 'परिषद'६ धन्यें छ्यं फुसय् कल्पवृक्ष७

१) लिच्वः (सिरपाः) स आसाकुति मजुसे यायेगु कर्तव्य
२) मोह वा आशक्तिया विकार
३) शोक वा लधुताभासया ग्रन्थी
४) स्वयम्भू विकास मण्डल नेपालभाषा मंकाः खलः नेपालभाषा परिषद आदि
५) ससुख्वाः (वज्र होटल नाप)या जग्गा
६) नेपालभाषाया आपालं सफू व पत्रिका प्रकाशन संस्था, नेपालभाषा परिषद
७) चित्तधर 'ह्दय' व मोतिलक्ष्मीपिनि यशकीर्ति रुपी ताःआयु म्वाइगु सिमा ।

- लाभरत्न तुलाधर

More Stories Like this